«Անդադար աշխատում էի, որպեսզի տնից քիչ գումար վերցնեմ». Ժաննա Վելիցյանը՝ ֆինանսական բարդությունների և նախկինում արած աշխատանքների մասին

Դերասանուհի Ժաննա Վելիցյանը տևական ժամանակ է՝ հեռուստատեսային դադարի մեջ է: Tert.am Life-ի հետ զրույցում նա խոսել է առաջին աշխատանքի, ժամանակին որպես խաղավար աշխատելու և իր ֆինանսական վիճակի մասին:

Ժաննայի խոսքով՝ աշխատել է 18 տարեկանից՝ ուսանողական տարիներից: «Այն ժամանակ ակցիաներ էի իրականացնում: Կարծում եմ՝ ցանկացած տարիքում պետք է աշխատել: Ես համալսարան էի ընդունվել անվճարի բալերով, բայց իմ փոխարեն մի տղա էր անցել, որովհետև բանակի խնդիր ուներ: Շատ էի նեղսրտել, անդադար աշխատում էի, որպեսզի անվճար սովորեմ, տնից մաքսիմալ քիչ գումար վերցնեմ: Տեսակով այնպիսին եմ, որ չեմ սիրում կախվածություն ունենալ որևէ մեկից, կապ չունի, որ այդ դեպքում ընտանիքս էր: Ուզում էի ինքնուրույն լինել, իսկ դրա առաջին նախապայմաններից մեկը գումարն էր»,- ասաց նա:

Ըստ դերասանուհու՝ դասերը շատ խիտ գրաֆիկով էին, բայց ակցիաները երկար չէին տևում և կարողանում էր համատեղել: «Ժամանակ առ ժամանակ դասերս տուժում էին, բայց այլընտրանք չկար: Երբ ծնողներս իմացան, որ աշխատում եմ, ողջունեցին այդ քայլս: Միայն մայրս էր անհանգստանում, որովհետև շատ էներգիա էի ծախսում: Երբեմն նույնիսկ հաց չէի ուտում, հոգնած գնում էի տուն, քնում, առավոտյան արթնանում ու գնում համալսարան: Ինքնուրույնություն ձեռք բերելու համար պետք է անցնես ինչ-որ փուլերի միջով: Այդ տարիքում աշխատելն ինձ ներքին առումով շատ բան է տվել, հատկապես, երբ կարողանում ես քո աշխատած գումարով ընտանիքիդ համար ևս ինչ-որ բան անել, ներքին աճ ես ապրում»,- նշեց նա:

Ժաննան պատմեց, որ ակցիաներ իրականացնելուց հետո մեկ այլ աշխատանքով էլ է զբաղվել է: «Դրանից հետո սկսեցի աշխատել որպես խաղավար: Պատասխանատու աշխատանք էր, որովհետև գործ ունեի երեխաների հետ: Պետք է հետաքրքիր լինեի, որպեսզի կարողանայի գրավել նրանց: Հետաքրքրիր էր, որովհետև իմ մասնագիտության հետ կապված էր, ուղղակի ինձնից շատ ավելի էներգիա էր տանում, քան ակցիաները»,- ասաց Ժաննան:

Դերասանուհին ընդգծեց, որ համալսարանական տարիներին չէր նկարահանում, որովհետև այդ ժամանակ չէր կարելի: «Երբ նկարահանվում էիր, պետք է դասերի չգայիր, իսկ ես ուզում էի գնալ, այդ պատճառով ենթարկվում էի օրենքներին: Համալսարանն ավարտելուց հետո ընդունվեցի «Գոյ» թատրոն, կես տարի հետո էլ ընդունվեցի Համազգային թատրոն՝ որպես հիմնական դերասանուհի: Միայն դրանից հետո են ինձ հրավիրել հեռուստասերիալներում նկարահանվելու»,- պատմեց նա:

Դերասաններից շատերի համար հեռուստատեսությունը եկամտի աղբյուր է, իսկ Ժաննան տևական ժամանակ է՝ հեռուստատեսային դադարի մեջ է: Նրանից հետաքրքրվեցինք՝ ֆինանսական ինչպիսի՞ վիճակում է հիմա:

«Դերասանի կյանքը շատ բարդ է՝ չնայած կողքից թվում է, թե մեզ համար հեշտ է: Մեր գործում ստաբիլություն չկա, նույնիսկ, երբ սերիալներում ենք նկարահանվում, այդ սերիալը մի օր ավարտվում է, հավերժ աշխատավարձ չենք ստանում: Իսկ թատրոնի աշխատավարձով անհնար է ապրել մեկ ամիս: Կողքից պետք է զբաղվել նաև այլ աշխատանքով, թեկուզ ոչ մասնագիտական, որպեսզի կարողանաս ապրել: Ես դեռ մեկ անձի մասին եմ խոսում, իսկ մարդիկ կան, որոնք ընտանիք, երեխաներ ունեն: Չնայած այս ամենին՝ միայն եթերում լինելու համար չեմ ուզում խաղալ պատահական դերեր»,- եզրափակեց նա: