«Շատ ընկերներ կորցրեցի»․ Սրբուկը՝ հիասթափությունների և անձնական կյանքի մասին

Դեռ մանկուց բոլոր ճանապարհները Սրբուկին տարել են դեպի երաժշտություն, հստակ քայլերի սկիզբը դրվեց «X-Factor» հեռուստանախագծով, Ուկրաինայի «Ձայնը» նախագիծը ամրապնդեց նրա քայլեր, հաջորդ քայլը դարձավ «Եվրատեսիլ» միջազգային մրցույթում հայաստանը ներկայացնելը։ Նախագծերի միջակայքում, իհարկե, մեծ և բարդ ճանապարհ է եղել։

Tert.am Life–ը Սրբուկի հետ զրուցել է անցած ուղու, հիասթափությունների և պայքարի մասին։

«Ինձ համար երաժիշտ լինելն ամենաուժեղ մասնագիտությունն է։ Հայրս ուզում էր, որ իրավաբան դառնայի, բայց բոլոր ճանապարհներն ինձ տարան երաժշտական ոլորտ։ Այդ ճանապարհի ընթացքում ես հասկացա, որ կարևորը մարդ մնալու արվեստն է։ Շատերը կորցնում են իրենց մարդկային արժեքները, հասկանում ես, որ շատ դժվար է այս ոլորտում ընկերներ ունենալ, եթե այս ոլորտում ձեռք ես բերում եզակի ընկերների, նրանք մնայուն են»,- ասաց նա։

Սրբուկի խոսքով՝ շոու բիզնեսում լինելն ավելի է հասունացնում մարդուն, քանի որ շատ են դժվարություններն ու հիասթափությունները։ Նա նկատեց, որ Ուկրաինայի «Ձայնը» նախագծին մասնակցելու ընթացքում շատ էին ոգևորող արձագանքները, իսկ երբ Հայաստանը ներկայացնում էր «Եվրատեսիլ»–ում, բախվել է հիասթափությունների։ «Եվրատեիլի» ժամանակ եզրափակիչ չանցնելը նրա վրա ծանր է անդրադարձել։

«Ինձ շատ են դավաճանել, շատ հարվածներ եմ ստացել տարբեր մարդկանցից, լսարանից նույնպես։ Այսպիսի մի խոսք կա՝ հաղթանակը բոլորինն է, պարտությունը՝ մեկինը»։ Ես դա զգացել եմ իմ մաշկի բոլոր բջիջներով։ Մեր երկրում շուտ են մոռանում տվյալ արտիստի լավը, հիշում են միայն վատը, որն ավելի թարմ է։ «Եվրատեսիլից» հետո ես շատ ընկերներ կորցրեցի և հասկացա, որ նրանք իմ կողքին էին, երբ ես հաջողություններ ունեի և սիրված էի։ Դժվար է բարձրանալ բեմ, երբ կորցրել ես ծնողիդ, բայց դա ոչ ոքի չի հետաքրքրում, բացի քո ընտանիքից և հարազատ մարդկանցից, դու ուղղակի երգչուհի ես և անում ես քո պարտականությունը»,- ասաց Սրբուկը, ով «Եվրատեսիլին» մասնակցելուց առաջ կորցրել էր հորը։

Երգչուհու խոսքով՝ հոր կորստից հետո հոգեբանական ապրումներն ու լարվածությունը ազդել էին ձայնալարերի վրա, մինչև «Եվրատեսիլին» ելույթ ունենալն ունեցել է խնդիրներ, որոնց պատճառով իրեն արգելել են երգել։

«Բժիշկն ասաց, որ չեմ կարող երգել։ Նա ցանկանում էր դեղ լցնել ձայնալարիս երակի վրա։ Բայց ներքին ձայնս, կարծես, ինձ չէր թողնում, քանի որ դեղն ավելի վտանգավոր կարող էր լինել։ Վոկալիս ուսուցիչը նույնպես ասաց, որ դա ռիսկային է, պետք չէ անել։ Փորձի ժամանակ բժիշկը դահլիճում նստած էր, երբ երգեցի նա ապշել էր, քանի որ չէր հավատում, որ ես կարող էի երգել այդ վիճակում»,- պատմեց երգչուհին։

Սրբուկն իր կարիերայի լավագույն շրջանը համարում է «Ուկրաինայի ձայնը» նախագծին մասնակցությունը։ «Այնտեղ հարգանք կար արտիստի նկատմամբ։ Ես իմ կյանքում առաջին անգամ զգացի, թե ինչպես են վերաբերում և գնահատում արտիստին։ Այնտեղ մնալու առաջարկներ կային, բայց ես գերադասեցի ընդունել Հայաստանի առաջարկը, բացի այդ կարոտում էի իմ երկիրը, իրականում չեմ փոշմանել, քանի որ այդ ամենի միջով անցնելով՝ շատ ուժեղացա»,- ասաց նա։

Խոսելով հայ հասարակության վերաբերմունքի մասին՝ երգչուհին ասաց, որ այստեղ իր համար դժվար է համատեղել անձնական կյանքն ու մասնագիտությունը․ «Հասարակությունը շատ անգամ շփոթում է բեմի արտիստին և անհատին։ Դա տարանջատելը դժվար է հատկապես տղամարդկանց համար։ Իրենց թվում է՝ եթե դու բեմում կրակոտ շարժումներ ես անում, հագնում ես բաց շորիկ, ուրեմն կյանքում այդ տեսակով ես քայլում փողոցում, իրական կյանքում այդպիսի շարժումներ ես անում։ Ու շատ դժվար է բացատրել մարդուն, որ դու սովորական մարդ ես և ուզում ես քո անկյունում լինել հանգիստ, խելոք աղջիկ։ Դա խանգարում է մարդկանց հետ առողջ հարաբերություններ ունենալ»։

Սրբուկն ասաց, որ տղամարդկանց նման վերաբերմունքը իրեն դարձրել է ավելի բծախնդիր, իր համար շատ դժվար է անձնական կյանք կառուցել։ «Ես հիմա չունեմ անձնական կյանք, մեր ոլորտում շատ դժվար է անկեղծ ֆոնի վրա հարաբերություններ կառուցելը։ Ես փորձում եմ մարդուն չստեղծագործել և չհորինել, այլ ճանաչել և ընդունել իր քայլերով։ Եթե ես հասկանամ, որ տվյալ մարդու հետ ապագա չկա, չեմ շփվի նրա հետ։ Ինձ համար ընտանիքն առաջնային է, եթե ես ընտանիք կազմեմ, պետք է այն ստեղծված լինի առողջ հարաբերությունների վրա»,- ասաց երգչուհին։

Անկախ դժվարություններից Սրբուկը կարևորում է այն մարդկանց հավատը, որոնք «X-Factor» հեռուստանախագծից սկսած հետևում և ոգևորում են իրեն․ «Այդ մարդկանց սիրուց ավելի ես ոգևորվում և պատասխանատվությամբ լցվում նրանց նկատմամբ։ Ներկա պահին էլ աշխատում եմ զուգերգի վրա, մոտ ժամանակներս այն պատրաստ կլինի։ Ունեմ նաև հեղինակային երգեր։ Իմ երգերը չեմ գովազդում, պարզապես տեղադրում եմ Յութուբում և վայելում այդ պրոցեսը։ Գիտեմ, որ դրանց մեջ շատ սեր կա և այդ սերը մի օր ինձ է վերադառնալու»,- եզրափակեց երգչուհին։

Գոհար Պետրոսյան