«Հոգեպես 25 տարեկան եմ զգում». Լուսինե Թովմասյանը՝ ծննդյան օրը նշելու, տարիքից չվախենալու և դստեր անակնկալի մասին

«Միսս Հայաստան 2003», «Վիցե միսս Եվրոպա 2006» Լուսինե Թովմասյանն օրերս նշել է  35-ամյակը: Tert.am Life-ի հետ զրույցում նա ասաց, որ հատուկ խնջույք չի կազմակերպել, նշել են ամենամտերիմ մարդկանցով:

Լուսինեի խոսքով՝ անակնկալներ ևս ունեցել է: «Դրանք միշտ կան, երբ ունես երեխաներ ու ամուսին: Դուստրս՝ Արիանան և ամուսինս լավ պատրաստվել էին ու ինձ ուրախացրին: Արիանան նվիրեց իր ձեռքի աշխատանքը, որն ինձ համար ամենաթանկ նվերն է, շատ եմ գնահատում: Բացիկի վրա գրված էր՝ «Իմ ընտանիք», շատ գեղեցիկ էր: Օրը նշել եմ հարազատների և մտերիմ ընկերների հետ շատ լավ մթնոլորտում: Ոչինչ հատուկ չէի կազմակերպել, տորթը ևս ուղղակի տորթ էր, թեմատիկ չէր: Ուղղակի նախորդ տարին բուռն էր, տխուր, հատուկ ինչ-որ բան կազմակերպելու ցանկություն չկար: Թեև ամեն տարի ծննդյանս օրվան հատուկ սպասում եմ, երեխայի պես հաշվում, թե քանի օր է մնացել, շատ եմ սիրում»,- պատմեց նա:

Լուսինեն այս տարի դարձել է 35 տարեկան: Ըստ նրա՝ մեծացող թվերն իրեն չեն վախեցնում: «Միայն մի փոքր բարդ է 30-ին հասնելը, կարծում եմ 40-ի դեպքում այդպես չի լինի: Երբ 2-ը փոխվում է 3-ի, անսովոր է: Ինձ հոգեպես 25 տարեկան եմ զգում, երիտասարդ մնալու գաղտնիքը կենսուրախ լինելն է: Իմ օրվա խինդ ու ծիծաղն արդեն ապահովում են երեխաներս»,- ասաց նա:

Լուսինեն նկատեց, որ ծննդյան տորթի մոմերի, Ամանորի գիշերվա հետ միշտ նպատակներ է կապում: «Անկարևոր է՝ դրանք կատարվո՞ւմ են, թե՞ ոչ: Ամենակարևորն այն է, որ դու մտապահում ես և հավատում»,- նշեց գեղեցկուհու տիտղոսակիրը:

Խոսելով նպատակների մասին՝ Լուսինեն ասաց. «Նպատակներս արագ չեն կատարվում, մի փոքր դժվար ճանապարհ են անցնում, նոր կատարվում: Գուցե հենց դա է ճիշտը, ի վերջո, իրագործվում են: Նպատակ տանող ճանապարհը երբեմն սիրում եմ, երբեմն՝ ոչ, երբեմն տրտնջում եմ, բայց ճանապարհի կեսից հետ չեմ գնում: Հնարավոր է՝ շատ քիչ է մնացել վերջնակետին հասնելու համար: Այս տարվա հետ կապված նպատակս խաղաղությունն է»: