«Անգամ հղիությանս ընթացքում ավելի նիհար էի, քան ուսանող ժամանակ»․ Օլյա Հակոբյանը՝ առանց պլաստիկ միջամտության նիհարելու և ձիգ որովայն ունենալու գաղտնիքի մասին

Դերասանուհի Օլյա Հակոբյանը նոր ֆոտոշարք ունի, որը տրամադրել է Tert.am Life–ին: Դերասանուհին վերջին տարիներին ակտիվ մարզվում է։ Պարզվում է՝ ժամանակին քաշի խնդիր է ունեցել։ Հիմա առողջ ապրելակերպը նրա առօրյայի անբաժանելի մասն է։ Այս ամենի մասին հետաքրքիր զրույց ենք ունեցել Օլյայի հետ։

Նոր ֆոտոշարքում Օլյան ներկայանում է նոր կերպարով, թեև դա մեծ փոփոխություն չի համարում։ «Առհասարակ, ինձ համար չկա էդպիսի լուրջ կերպարային փոփոխություն, քանի որ ես սիրում եմ տարբեր բաներ փորձարկել, երևի, միայն մազերս կարճ կտրելու հետ չեմ կարող հարմարվել։ Յուրաքանչյուր ոճ կարելի է կիրառել, կարելի է նաև խառնել ոճերը։ Չեմ սիրում մնալ նույն կերպարի մեջ, ամեն նոր բան ինձ մոտ նոր տրամադրություն է բերում, էնպես որ, տրանսֆորմացիան հաճելի է»,– ասաց դերասանուհին։

Վերջին տարիներին նկատելի է, որ Օլյան սկսել է շատ ավելի շատ հետևել իրեն։ Հարցին, թե ինչո՞վ էր պայմանավորված ոճափոխությունը, նա պատասխանեց․ «Ըստ իս՝ ոչ թե ոճս փոխվեց, այլ սկսվեց ձևավորվել ոճ։ Կարծում եմ՝ դա ավելի շատ կապ ուներ իմ հասունանալու հետ։ Երբ ուշադիր ես մանրուքների նկատմամբ, դա նկատելի է դառնում»։

Օլյան սկսել է նաև կանոնավոր մարզվել, ինչը դարձել է նրա կենսակերպը։ Ժամանակին Օլյան նաև քաշի խնդիր է ունեցել, իսկ հիմա ունի ձիգ և գեղեցիկ մարմին։ Ասում է՝ առանց պլաստիկ միջամտության։

«Շատ տարիներ առաջ, երբ դեռ 1–ին կուրսում էի սովորում, դժգոհ էի իմ կազմվածքից։ Այդ ժամանակ չափից ավելի գեր էի։ Սակայն նիհարելուցս ի վեր չեմ գիրացել։ Անգամ հղիությանս ընթացքում, երբ պիտի բալիկներ ունենայի, ավելի նիհար էի, քան ուսանող ժամանակ։ Ես միշտ ձգտում եմ առավելագույնին։ Աննկարագրելի ուրախություն է տեսնել ևս մի արդյունք։ Ինձ հաճախ են հարցնում՝ արդյոք վիրահատել եմ որովայնս, քանի որ այն տափակ է, հարցնում են՝ ինչպե՞ս երկու բալիկ ունենալուց հետո այս տեսքն ունեմ։ Ի դեպ, այս արդյունքն ունեմ կեսարյան հատումից հետո։ Մարզումների ժամանակ ես շատ եմ անում «կարդիո», պարապմունքներս տեղադրում եմ էջումս, որպեսզի մարդիկ, ովքեր հնարավորություն չունեն գնալու մարզասրահ, տանն անեն։ Այդ պարապմունքների արդյունքում է որովայնս այդպիսին, ես վիրահատական ոչ մի միջամտություն չունեմ որովայնիս շրջանում»,– ասաց դերասանուհին։

Օլյան պարտադիր է համարում մարզվելը՝ անկախ տարիքից և կարգավիճակից, կարծում է, ցանկության դեպքում մարդը կարող է ստեղծել հնարավորություն․  «Կարևորն այն է, որ հայելու մեջ նայելով հպարտ լինես, հայելու արտացոլանքդ գլուխը չկախի։ Չեմ ընդունում ժամանակ չունեմ կամ հոգնել եմ արտահայտությունները։ Մարդու մտքին տեղ լինի»։

Դերասանուհին նշեց, որ շատ է ոգևորվում դրական արդյունք գրանցելիս։ «Վերջերս սկսել եմ սիրել ամեն նոր մկան, նկատում եմ, ուրախանում, որ փոփոխվում է։ Այդ ամենը մեծ հաճույք է պատճառում, կարող եմ ասել, որ կախում ունեմ մարզումներից։ Վերջերս որոշեցի մեկ ամիս դադար տալ, քանի որ ամառ է, շոգ է, նախընտրում եմ լողավազան այցելել։ 20 օր է անցել, իսկ ես արդեն ուզում եմ վերադառնալ մարզումներին։ Այսպես մի տեսակ լիարժեք չեմ։ Ի վերջո, ես չեմ հորինել, որ մարզվելն առաջացնում է էնդորֆին, սերոտոնին, դոֆամին, օքսիտոցին, որոնք կոչվում են երջանկության հորմոններ։ Եթե մարդ անգամ չգիտի այս մասին, կփաստի, որ մարզանքից հետո լինում է երջանկության, ինքնագոհության զգացողություն,  և դա հրաշալի է»։