Դելոյի ամերիկյան կյանքն ու նոր նախագիծը 5-ամյա որդու հետ

Տարիներ առաջ Ամերիկայի Միացյալ Նահանգներ տեղափոխված դերասան Դելոն՝ Վահագն Ստեփանյանը, տևական լռությունից հետո նոր նախագիծ է սկսել՝ իրապատում շոու, որի շրջանակում կներկայանան ինքն ու որդին՝ 5-ամյա Նարեկ-Քրիստոն:

Դերասանը նոր նախագծի մասին պատմել է Tert.am Life-ին, ինչպես նաև խոսել է տարիների դադարի ընթացքում չմոռացվելու և ԱՄՆ-ում դժվար փուլերով անցնելու մասին:

ԱՄՆ-ում ապրելու 8 տարվա ընթացքում Դելոն տարբեր աշխատանքներ է արել: Խոստովանում է՝ բարդ է, հատկապես, այն պատճառով, որ մենակ է:

«Երկար ժամանակ է՝ զբաղված եմ տարբեր աշխատանքներով: Այն, ինչ սիրում եմ, ցավոք, չէր ստացվում: Ժամանակ առ ժամանակ ներգրավվել եմ տարբեր նախագծերում, բայց փոքր մասնակցություն եմ ունեցել: Այս ընթացքում դեռ ծանոթանում էի ամերիկյան կյանքին, ինչ-որ բան էի մտածում, սկսում ու հասկանում, որ մենակ եմ: Տարբեր փորձություններով եմ անցել մինչև տղաս մեծացավ, սկսեց խոսել, հասկացա, որ տաղանդ ունի, որոշեցի շոու սկսել, որտեղ կտեսնեն մեզ, մեր ընկերներին, մեր երեխաներին»,- ասաց նա:

Դերասանը նկատեց, որ նախագծի միտքը հղացել է հենց որդու հետ զրույցի ժամանակ. «Տղաս Youtube-ում ինչ-որ բաներ էր նայում, հարցրեցի՝ կուզե՞ս մենք էլ լինենք Youtube-ում, ասաց՝ հա, Դել: Սկզբում ուզում էի նախագծի անունը դնել «Դելո և Քրիստո», բայց դիտողները կնկատեն՝ ինչպես է Նարեկն ինձ դիմում ու կհասկանան, թե ինչու որոշվեց «Պապա և Քրիստո»: Ձևաչափն իրապատում է:  Մենք գնում ենք տարբեր տեղեր, հանդիպում իմ հայտնի ընկերներին, որոնք արդեն ծնող են: Շփվում ենք իրար հետ, երեխաների հետ և այդ ամենը որպես լավ հիշողություն տեղադրում ցանցում»:

Դելոն հայտնեց, որ առաջին եթերաշրջանի 4 մասը նկարահանել են ԱՄՆ-ում, 5 մասը՝ Հայաստանում: Նախատեսում են նաև 2-րդ եթերաշրջան ունենալ:

Ըստ հայրիկի՝ Նարեկը չի խուսափում տեսախցիկներից, իրեն շատ ազատ է զգում. «Նաև բացահայտում ենք տղայիս տաղանդները: Մեր շոուն և՛ մեծերի համար է, և՛ փոքրերի»:

Ժամանակին Դելոն Հայաստանում բավականին մեծ հայտնիություն ուներ, տարիների լռության ընթացքում դաշտում նոր դեմքեր հայտնվեցին: Նրանից հետաքրքրվեցինք՝ իր կարծիքով որքանո՞վ է լսարանն իրեն հիշում, ո՞ւմ է համարում իր մրցակիցը:

«Թե՛ ԱՄՆ-ում, թե՛ Հայաստան գալիս, ես չեմ զգում, որ ինձ մոռացել են: Ավելի շատ կասեի՝ մարդիկ ինձ կարոտել են: Թող անհամեստ չհնչի, բայց հաճախ եմ լսում «ինչո՞ւ նոր բան չես անում» արտահայտությունը: Կարծում եմ՝ հիմա այնպիսի ժամանակաշրջան է, որ մրցակցություն չկա: Բոլորն էլ տաղանդավոր են: Ամեն մեկը յուրովի է ներկայացնում իր տաղանդը: Կարծում եմ՝ այսօր մրցակցություն չկա, քանի որ ինտերնետի շնորհիվ յուրաքանչյուր մարդ կարող է անել այն, ինչ ուզում է ու ունենալ իր լսարանը»,- եզրափակեց նա: