Հայկական հագուստ՝ առանց թուրքական կտորի․ «Սերունդ» հայկական նոր բրենդի ցուցադրությունն ու հայտնի հյուրերը

17:16 • 18.10.21

«Սերունդ»․ հայկական նոր բրենդ, որը սկզբունքորեն հրաժարվել է թուրքական հումքից՝ հիմնվելով բացառապես հայկական արտադրանքի վրա և բարձր ազդարարում է իր մուտքը շուկա։ Երեկ կայացավ բրենդի առաջին հավաքածուի ցուցադրությունը, որին ներկա էին մի շարք հայտնի մարդիկ։

Tert.am Life-ը ևս ներկա է եղել ցուցադրությանն ու իր ընթերցողներին է ներկայացնում հետաքրքիր դրվագներն ու մանրամասները։

Թեև վերջին տարիներին Հայաստանում fashion show–ներ շատ քիչ են կազմակերպվում, նորաձևություն թելադրող բրենդների համար այն կարևոր շեշտադրում է։ «Սերունդն» իր քայլերը սկսեց, ինչպես անում են ոլորտի առաջատարները։

«Մեր լոգոտիպը անվերջության նշանն է, որովհետև ուզում ենք մեր և մյուս սերունդների համար ստեղծել անվերջություն ու ամեն հաճախորդի ասել, որ ինքն այդ սերնդի անվերջության մի մասնիկն է,– ասաց բրենդի հիմնադիր Ադրիանա Մարությանը։

24–ամյա Ադրիանան մասնագիտությամբ դիզայներ չէ, բայց հագուստների գաղափարներն իրենն են, որոնք իրագործելու համար համագործակցում է երիտասարդ դիզայներների հետ՝ այսպիսով` հարթակ ստեղծելով նաև նրանց համար։

«Տաղանդավոր հայ երիտասարդները շատ–շատ են։ Որոշեցի համախմբել նրանց մի գաղափարի շուրջ և ստեղծել հայկական բրենդ, որը կլինի որակյալ, կունենա հասանելի գներ։ Մեզ համար շատ կարևոր է, որպեսզի մեր հագուստը կրեն երիտասարդները, դրա համար ընտրել ենք casual ոճ, ջինսեր։ Գները սկսվում են 10.000 դրամից։ Առավելագույն արժեքը 50.000 է»,– ասաց աղջիկը, որն իր շուրջ համախմբել է երիտասարդ թիմակիցների։ Ցուցադրության կազմակերպիչը Light Up Company-ն է, որի հիմնադիր Սվետլանա Իշխանյանը ոլորտի հնաբնակներից է:)

Ցուցադրության առաջին արձագանքները դրական էին և ոգևորող թիմի համար։ Ադրիանան շեշտեց, որ բրենդը ստեղծելիս ամենաբարդը հումքը բացառապես հայկական պահելն էր։

«Դժվարությունը հիմնականում հայկական կտորի, թելերի հարցում էին, սակայն ինձ համար սկզբունքային էր թուրքական հումք չօգտագործելը։ Կտորն ամբողջությամբ հայկական է, ինչը նաև աջակցություն է հայկական արտադրողներին։ Ինքս շատ էի փնտրում հայկական արտադրության հասանելի հագուստ։ Հուսով եմ՝ կդառնանք երիտասարդների զգեստապահարանի անբաժան մասնիկը»,– ասաց բրենդի հիմնադիրը։

Ադրիանան նկատեց, որ ամբողջ աշխարհից ընդունում են պատվերներ օնլայն տարբերակով, ներկայացված են հայկական արտադրանք ունեցող տարբեր խանութներում և հույս հայտնեց, որ տարեսկզբին կբացեն իրենց խանութը։