Արևիկ Սիմոնյանի հավաքածուի ցուցադրությունն ու հայտնի հյուրերը

Կարեն  Դեմիրճյանի անվան մարզահամերգային համալիրում կայացել է Արևիկ Սիմոնյանի H2Օ Emotional Exposition խորագրով ինտերակտիվ ցուցադրությունը՝ համեմված նորաձևության էլեմենտներով։ Միջոցառմանը ներկա էին Սիրուշոն, Նազենի Հովհանիսյանը, Սոֆի Դևոյանը, Նունե Եսայանը, Ավետ Բարսեղյանը, Արևիկ Ուդումյանը, Սոնան և այլ հայտնի մարդիկ։

Tert.am Life–ը ներկայացնում է երեկոյի մանրամասները։

«Գաղափարի հիմքում ոչ թե հագուստի ցուցադրությունն էր, այլ հայկական մշակույթի պահպանման կարեւորության շեշտադրումը:  Մենք աշխարհին կարող ենք ներկայանալ մեր մշակույթով, մենք ունենք գեղեցիկը տեսնելու ու տարածելու ներուժ։ Հատկապես այս վերջին իրադարձություններից հետո հասկացանք, որ սկզբունքներ, արժեքներ կորցնելու վտանգի առաջ ենք կանգնած։ Գուցե ես 4 տղաների մայր եմ, դրա համար եմ այդպես մտածում: Այնուամենայնիվ, կարծում եմ, որ սա համամարդկային ցավ է»,-ասաց Արևիկ Սիմոնյանը։

Ցուցադրության գաղափարը ծնվել է հետպատերազմական շրջանում: Դիզայներն իր հավաքածուն ցուցադրեց 8 տարբեր անկյունով, որոնցից յուրաքանչյուրն իր խորագիրն ուներ՝ «Երկինք», «Ծնունդ», «Մկրտություն», «Օրհնություն», «Մեղսագործություն», «Ցավ», «Կորուստ», «Դատարկություն»:

«Ես ցանկացել եմ ցույց տալ ոչ թե այն, որ պատերազմը մեծ ցավ է, այլ շեշտադրել այն, որ մենք մարդ ենք, որից պատերազմը շատ կարեւոր բաներ է խլում: Մենք ցանկացել ենք ցույց տալ մարդու կյանքի ճանապարհը՝ հիմնավորելով, որ ամեն ինչ կախված է մեր ընտրությունից: Դրա համար մենք պետք է ընտրենք բարին, իսկ դրա կողքին մեր եկեղեցին է, մեր հավատը: Ես ուզում եմ, որպեսզի այս  ցուցադրությունից դուրս գալիս հանդիսատեսը ոչ թե ասի՝ «հետաքրքիր ցուցադրություն էր», այլ իր հետ տանի ինքն իրեն վերանայելու, արժևորելու ու  մեր ունեցածը գնահատելու գաղափարը»,֊– ընդգծեց Արևիկը։