«Մարտունուց Երևան եմ եկել իմ երազանքների հետևից, ծնողներս ոչ հարուստ էին, ոչ էլ ծանոթ ունեի»․ «Նոր ալիքում» Հայաստանին հաղթանակ բերած Սարո Գևորգյանը՝ դժվարությունների և նպատակների մասին

2021 թվականը միջազգային երգի մրցույթների ասպարեզում Հայաստանի համար հաղթանակների տարի էր։ «Նոր ալիք 2021»-ի հաղթող ճանաչվեց Հայաստանի ներկայացուցիչը՝ Սարո Գևորգյանը:

Tert.am Life-ի հետ զրույցում Սարոն պատմել է այս շրջանի զբաղվածության, Ֆիլիպ Կիրկորովի հետ համագործակցության, Արթուր Գրիգորյանի և Նադեժդա Սարգսյանի հետ աշխատանքի, դժվարությունների, Դուբայ մեկնելու ու անձնական կյանքի մասին։

««Նոր ալիք 2021»-ից հետո հանգստի մեկնելու, ամեն ինչից կտրվելու ցանկություն ունեի, բայց այդ շրջանի զբաղվածությունս թույլ չէր տալիս,- ասաց Սարոն և շեշտեց, որ արվեստի ոլորտի ներկայացուցիչների համար կարևոր են դադարները։ -Երկար աշխատելուց և գումար հավաքելուց հետո այս փուլում լավագույն որոշումներիցս մեկը 10 օրով Դուբայ մեկնելը, լիցքաթափվելն ու նոր ուժերով աշխատանքի վերադառնալն էր»։

Երգիչը նաև պատմեց այս շրջանի երաժշտական զբաղվածության մասին։ «Պատրաստվում եմ եմ նոր երգեր թողարկել, դրանով պայմանավորված աշխատանքային բուռն շրջան է ինձ մոտ,- ասաց նա, ապա, անդրադարձավ «Մանկական Եվրատեսիլ 2021»-ի հաղթող Մալենայի հետ համատեղ հրապարակումներին, ասաց,- Մալենայի հետ հաճախ ենք հանդիպում ձանագրման ստուդիայում, երգում ենք, երաժշտական նոր փորձարկումներ անում, բայց այս փուլում համատեղ աշխատանք չենք ներկայացնելու»։

Սարոն 4 տարեկանից զբաղվում է երգով, այդ հասակից էլ երազել է մեծ բեմերում երգելու և ոլորտի կարկառուն ներկայացուցիչների հետ աշխատանքի մասին։ «Փոքր տարիքից երազում էի գոնե մի անգամ աշխատել Արթուր Գրիգորյանի և Նադեժդա Սարգսյանի հետ։ Երաժշտական առաջին քայլերս արել եմ «Դո-Ռե-Մի» վոկալ-ստուդիայում, որից հետո ընդունվել եմ Հայաստանի Երգի պետական թատրոն, 2 տարի սովորելուց հետո մեկ տարի առանձին աշխատել եմ նաև Արթուր Գրիգորյանի հետ,- ասաց նա և հավելեց, որ երաժշտական ոլորտում սովորել է լավագույններից։ -Հետագայում կատարվեց նաև մյուս երազանքս․ սկսեցի աշխատել Նադեժդա Սարգսյանի հետ, բայց անհատապես մենք այդ ձևաչափով աշխատել ենք 4 տարի ,  իսկ բանակից հետո աշխատել եմ երգչուհի Սրբուկի հետ և մեկնել «Եվրատեսիլ», որպես բեք-վոկալիստ»։

Սարոն հիշեց, որ ծառայության ընթացքում նկատել են իր երաժշտական տվյալները և աջակցել։ «2 տարի ծառայել եմ Արցախում, որից 3 ամիսը Մարտունու շրջանում, հետո իմ ձայնային տվյալները նկատեց գեներալներից մեկն ու միջնորդեց, որպեսզի տեղափոխվեմ Ստեփանակերտի նվագախումբ, այդ հանգամանքն ինձ բավականին օգնել է, որպեսզի ծառայության ընթացքում ևս զբաղվեմ երգով»,- ասաց նա։

Սարոյի խոսքով՝ մասնակցել է 20-ից ավելի միջազգային մրցույթների, միշտ գրավել առաջին և պատվավոր հորիզոնականը։ «Շատ մրցույթների մասնակցել եմ նաև Հայաստանում, բայց երբեք չեմ հաղթել, այնուամենայնիվ, դա ինձ չի կոտրել։ Հայաստանյան շոու-ծրագրերում, մրցույթներում մասնակցելուց հետո հասկացել եմ, որ շնորհակալ եմ այդ փորձի համար, քանի որ նաև այդ «պարտություններն» ինձ ավելի ուժեղ են դարձրել ու ստիպել աշխատել,- ասաց նա և շեշտեց, որ հասկացել է, թե ինչու չի հաղթահարել մրցույթային որոշակի շեմեր և փուլեր։ -Հետագայում սկսել եմ աշխատել բացթողումներիս վրա։ «Դեպի Եվրատեսիլ», «X ֆակտոր» նախագծերից հետո ես ունեցել եմ կրկրնակի մոտիվացիա»։

Սարոն խոսեց նաև ընտանիքի մասին և պատմեց, որ ընտանիքում ոչ ոք կապ չունի երաժշտական ոլորտի հետ։ «Ընտանիքս իմ ցանկացած նախաձեռնություն ողջունել է։ Ես սովորական, աշխատող և ոչ հարուստ ընտանիքից եմ։ Երևան եկել եմ իմ երազանքների հետևից՝ Մարտունուց։ Մայրս աշխատել է խանութում, հայրս շինարարրությամբ է զբաղվել։ Նրանք աշխատած գումարն ուղարկում էին Երևան, որպեսզի ես կարողանամ այստեղ սովորել ու հասնել նպատակներիս, իսկ այժմ ես ինձ շատ լավ եմ զգում, որ կարողանում եմ ֆինանսապես նրանց օգնել»,- պատմեց երգիչը։

Սարոն «Նոր Ալիք» մրցույթին մասնակցել է առանց պրոդյուսերի։ Նա նշեց, որ դա առաջացրել է որոշակի դժվարություններ, բայց ոչ ընկճվածություն․ «Երբևէ ծնողներիս կողմից չեմ լսել, որ պետք է ծանոթ, բարեկամ ունենամ, որպեսզի հասնեմ հաջողության։ Ծնողներս միշտ ասում էին, որ պետք է դասեր քաղեմ ու շարժվեմ առաջ, բոլոր տեղերում էլ առավելություն է, երբ ունենում ես «թիկունք», բայց ես հովանավորներ չունեմ»։

Մրցույթի ավարտին Սարոն համագործակցության առաջարկ է ստացել ռուս երգիչ Ֆիլիպ Կիրկորովից։ «Ֆիլիպ Կիրկորովի հետ ծանոթացել եմ դեռևս «Եվրատեսիլ 2019» մրցույթի շրջանակում, երբ նա նկատեց ինձ ու ասաց, որ պետք է տաղանդս օգտագործեմ, որպես անհատ երգիչ ներկայանամ մասշտաբային միջազգային մրցույթներում։ Նման երգչից գովեստի խոսքեր ստանալն ինձ մոտիվացրեց,- ասաց նա և շեշտեց, որ այդ հանդիպումն ու Կիրկորովի խորհուրդները մղել են մասնակցելու «Նոր ալիք» մրցույթին։ -Հայաստան վերադառնալուն պես սկսեցի աշխատել «Նոր Ալիք 2021»-ին մասնակցելու ու Հայաստանը ներկայացնելու համար, ինչի մասին ոչ-ոք չի իմացել, երբ Կիրկորովն ինձ տեսավ «Նոր Ալիք 2021»-ում բավականին ուրախացավ ու շեշտեց՝ եթե չարդարացնեմ իր հույսերն ու պատկերացումները, հենց նրա կողմից կվաստակեմ ամենացածր միավորը»։

Երգիչը  որոշ ժամանակ առաջ մեկնել էր ՌԴ, որպեսզի իրականացներ համագործակցությունը Կիրկորովի հետ։ «Մեր աշխատանքային կապը մինչև օրս կա։ Հաղթանակից հետո գնացի Մոսկվա, մենք աշխատում ենք, բայց աշխարհաքաղաքական իրավիճակով պայմանավորված այս պահին չեմ կարող մեկնել նրա մոտ՝ մյուս ծրագրերն իրականացնելու։ Հեռավար ռեժիմով շատ հարցերի շուրջ խորհրդակցում եմ իր հետ, ինձ համար պատիվ է նման մասնագետի հետ աշխատելը»,- ասաց նա։

Այժմ երգիչը չի նախատեսում մեկնել արտերկիր աշխատելու։ «Հիմա աշխատում եմ Հայաստանի շուկայի հետ ու հայերեն երգեր եմ հանձնելու հանդիսատեսի դատին, հետագայում, իհարկե, ցանկալի է, որ կարողանամ գործունեությունս ծավալել նաև արտերկրում, բայց այս շրջանում ինձ համար կարևոր է Հայաստանում աշխատելը»,- պատմեց երգիչը։

Սարոյի խոսքով՝ երազանքների և նպատակների մասին խոսելը ճիշտ չէ, քանի որ պետք է խոսել շատ աշխատելուց և հաջողություններ գրանցելուց հետո․ «Հետագայում ևս մասնակցելու եմ միջազգային ծրագրերի և պատվով եմ ներկայացնելու Հայաստանը, բայց այս փուլում մրցույթների հետ կապված ինձ դադար է պետք, քանի որ պետք է շարունակեմ աշխատել ու ձգտել ավելիին»։

Սարոն նաև խոսեց անձնական կյանքի մասին և հավելեց, որ այս փուլում իր  համար առաջնայինն աշխատանքն է։ «Աշխատելու ընթացքում ես հասկացել եմ, որ ընկերուհու ունենալու հանգամանքը սկսում է ինձ խանգարել, այս փուլում չունեմ կողակից, մոտակա ժամանակահատվածում չեմ էլ ցանկանում ընկերուհի ունենալ, քանի որ այս պահին կենտրոնացած եմ աշխատանքիս վրա»,- ասաց նա։

Թերեզա Հովհաննիսյան