«6 ամսից կգնամ բանակ»․ «Լքված ամրոցի պահապանները» սերիալից Վահագն Տուլբենջյանը՝ առաջին դերի, հայտնիության և ծառայությունից հետո կարևոր նպատակի մասին

18:42 • 04.04.22

«Լքված ամրոցի պահապանները» հեռուստասերիալից Սարոն՝ իրականում՝ Վահագն Տուլբենջյանը, լսարանին առաջին անգամ ներկայացավ «Մեր թաղի տղերքը» հեռուստասերիալում, որտեղ մարմնավորում էր Արսեն Լևոնյանին՝ փոքր տարիքում։

Tert.am Life-ի հետ զրույցում Վահագն Տուլբենջյանը խոսել է ոլորտում առաջին քայլերն անելու, նախագծում ստացած դերի, աշխատանքն ուսման հետ համատեղելու և հետագա ծրագրերի մասին։

«18 տարեկան եմ, սովորում եմ Երևանի Տարածաշրջանային N1 պետական քոլեջի Ռեժիսուրայի բաժնում։ Քոլեջ ընդունվելուց դեռ շատ տարիներ առաջ էլ հաճախել եմ «Ավետիք Իսահակյանի» անվան գրադարանի թատերական ստուդիա»,- ասաց նա և հավելեց, որ աշխատանքը չի խանգարում ուսմանը։

Երիտասարդ դերասանը պատմեց, որ «Մեր թաղի տղերքը» հեռուստասերիալում ընդգրկվել է քաստինգի մասնակցելուց հետո։ Նախագծի հաջողությունը շատ է որգևորել նրան։ «Նկարահանվելու ժամանակ սպասում էինք դրական արձագանքների, բայց ոչ այս քանակությամբ։ «Մեր թաղի տղերքից» հետո նոր նախագծի վերաբերյալ առաջարկների սպասումներ չկային։ Ես կենտրոնացած էի «Մեր թաղի տղերքը» հեռուստասերիալի վրա, որպեսզի լավ կերտեմ առաջին հեռուստատեսային կերպարս»,- ասաց նա։

Մարմնավորած կերպարների մասին խոսելիս Վահագնը շեշետեց, որ բնավորությամբ նման է մարմնավորած հերոսներին։ «Թե՛ նախորդ, թե՛ այս նախագծում մարմնավորում եմ բնավորությամբ թեթև մարդկանց, իրականում ես նույնպես այդպիսին եմ՝ թեթև և հումորով»,- ասաց նա։

«Լքված ամրոցի պահապանները» հեռուստասերիալում երիտասարդ դերասանի կերպարային հիմնական գիծը փոխկապակցված է Միկա Ղափլանյանի հետ։ Վահագնը պատմեց, թե ինչպես է անցնում աշխատանքն ավագ սերնդի հետ։

«Ավագ սերնդի ներկայացուցիչների հետ աշխատում ենք մեկ ընտանիքի պես, լսում և ընդունում ենք նրանց մասնագիտական խորհուրդները։ Շատ ուրախ եմ, որ հանդիսանում եմ նման թիմի փոքրիկ մասնիկը,- ասաց երիտասարդ դերասանը և շեշտեց, որ նման թիմում աշխատելու արդյունքում երիտասարդ անձնակազմը հեշտությամբ է անցնում դժվարությունների միջով։ -Նկարահանման հրապարակում աշխատում ենք մեկը բոլորի, բոլորը՝ մեկի համար տրամաբանությամբ, ինչն էլ կրկնակի հեշտացնում է աշխատանքը»։

Դժվարությունների մասին խոսելիս դերասանն ընդգծեց, որ ամենաբարդը նկարահանումների սկզբնական փուլն էր։ «Պետք է կարողանաս նախ ինքդ ընկալել կերպարը, հետո փորձես այն ճիշտ մատուցել հեռուստադիտողին,- ասաց Վահագնը և ընդգծեց, որ ոլորտ մտնելու ժամանակ հայտնի դառնալու ցանկություն չի ունեցել։ -Այս ոլորտում ունեմ և ունեցել եմ մի նպատակ՝ ընտրած մասնագիտությանս մեջ լինել լավագույններից մեկը»։

Երիտասարդ դերասանը խոսեց նաև իր շրջապատի և ծնողների արձագանքների մասին․ «Առօրյայումս էական փոփոխություններ չեն եղել միայն ավելացել է հանրության ուշադրությունն անձիս նկատմամբ։ Ծնողներս շատ դրական են արձագանքում իմ աշխատանքին և ձգտումներին այս ոլորտում»։

Վահագնը պատմեց, որ ընտանիքում միակն է, որ այս ոլորտի հետ առնչություն ունի, բայց ծնողները դեռևս փոքր տարիքից նկատել են իր սերը դերասանական աշխատանքի նկատմամբ։ «2011 թվականից հաճախել եմ թատերական ստուդիա։ Տարիներ շարունակ մասնակցել եմ «Նռան հատիկ» հանրապետական մանկապատանեկան թատերական փառատոնին՝ կերտելով թատրոնում տարբեր կերպարներ, համատեղ այցելել եմ պարային ստուդիա»,- ասաց նա։

Բացի դերասանությունից Վահագնը հետաքրքրվում է նաև մոնտաժային աշխատանքով, բայց հետագա նպատակները կապված են դերասանական ոլորտի հետ․ «Այս պահին ուսումնական տարկետում ունեմ 6 ամսով։ Քանի որ 18 տարեկան եմ, շուտով մեկնելու եմ բանակ ծառայության։ Արդեն ծառայությունից հետո նպատակա ունեմ ընդունվել համալսարան և զուգահեռ աշխատել թատրոնում»։

Թերեզա Հովհաննիսյան