Լարված աշխատանքի հետևանքով 6 կգ նիհարել եմ. Օլյա Հակոբյանը՝ մասնագիտական դադարի, արտաքին փոփոխությունների ու նոր բիզնես սկսելու մասին

Դերասանուհի Օլյա Հակոբյանն այս շրջանում մասնագիտական դադարի մեջ է և զբաղվում է սեփական բիզնեսով: Tert.am Life-ի հետ զրույցում դերասանուհին խոսել է մասնագիտական դադարի, ծանրաբեռնվածության հետևանքով քաշը կորցնելու, նոր բիզնեսի և հետագա ծրագրերի մասին:

«Շատ եմ առնչվել խնդրի, երբ կերպարներս նույնացվում են ինձ հետ, բայց գրագետ հեռուստադիտողները կարողանում են տարբերակել մարդուն և նրա մարմնավորած կերպարը, ու շնորհակալ եմ հենց նրանց: Դադարը պայմանավորված է նրանով, որ սկսել եմ իմ սեփական գործն ու ժամանակ չունեմ նկարահանումների համար»,- ասաց դերասանուհին:

Դերասանուհու խոսքով՝ այս շրջանում նրա ներկայությունը սեփական բիզնեսում առաջնային է:

«Բիզնեսն այս պահին թելադրում է իմ անմիջական ներկայությունը խանութում ու ընդհանուր գործընթացի մեջ, չեմ ուզում այս շրջանը բաց թողնել՝ բացակայելով: Վստահաբար, երբ այս նախագիծը կայանա, ես կվերադառնամ իմ մյուս սիրելի գործին՝ դերասանությանը: Ոլորտում գրեթե բոլորը գիտեն իմ զբաղվածության մասին ու գիտեն՝ այս շրջանում զբաղված եմ: Որպես դերասանուհի նման դադարները կարևոր են, քանի որ դու չպետք է հոգնեցնես հեռուստադիտողին ու այդ ընթացքում պետք է պաշար հավաքես նորովի ներկայանալու համար: Տարիների հետ դարձել եմ ինքնաբավ ու հիմա խնդիր չունեմ անընդհատ հեռուստաէկրանին երևալու»,- նշեց Օլյա Հակոբյանը:

Խոսելով կերպարների մասին՝ նա հավելեց, որ իր մարմնավորած կերպարներից որևէ մեկն իրեն հոգեհարազատ կամ նման չէ:

 «Իհարկե սիրում եմ մարմնավորածս բոլոր կերպարներին ու նրանց գույները, բայց որևէ մեկին նման չեմ, գուցե բնավորության որոշակի առանձին գծեր նման լինեն իմ բնավորության գծերին, բայց ոչ նույնությամբ: Կարևոր է, որ նման չլինելով հանդերձ, դու ներդաշնակ լինես մարմնավորածդ կերպարին ու կարողանաս պահել կերպարային գիծը, երբ անգամ այն քեզ հոգեհարազատ չէ»,- ասաց նա:

Օլյան նաև խոսեց սեփական բիզնեսը սկսելու և ոլորտի ընտրության մասին:

«Շատ եմ սիրում հագուստների ոլորտը, դրանով էլ պայմանավորված հենց այդ ոլորտում եմ սկսել աշխատանքը: Իհարկե, կան բազմաթիվ դժվարություններ, որոնք փորձում  եմ հաղթահարել և հենց  նման դժվարություններն էլ ավելի հետաքրքիր են դարձնում կյանքն ու աշխատանքը»,- ասաց Օլյա Հակոբյանը:

Վերջին շրջանում դերասանուհին դիմել է ոճային փոփոխության՝ ներկելով մազերը:

«Տեսակով շատ ակտիվ եմ ու չեմ կարողանում երկար ժամանակ օրինակ՝ նստել գեղեցկության սրահում, իսկ շիկահեր մազերը խնամելը երկարատև ու բարդ աշխատանք է, ու որոշեցի փոխել մազերիս գույնն ու հիմա ինձ այսպես բավականին դուր է գալիս»,- ասաց դերասանուհին:

Օլյայի խոսքով՝ այս շրջանն իր մոտ եղել է ծանրաբեռնված, ինչի արդյունքում մարզասրահ հաճախել չի հասցրել, բայց քաշ է կորցրել:

 «Իսկապես նիհարել եմ, հավանաբար վերջին մեկ ամսվա կտրվածքով լարված աշխատանքի արդյունքում 6 կգ նիհարել եմ , բայց դա ստացվել է ինքնաբերաբար: Լիահույս եմ, որ նախագծերս կկայունանան, հետևաբար գրաֆիկս նույնպես, ու կկարողանամ շարունակել մարզվել, առողջ ապրելակերպ վարել»,- ասաց Օլյա Հակոբյանը:

Թերեզա Հովհաննիսյան