«Երևանը հիմա հեքիաթային է և համարժեք երգերի կարիքը կար». yellowheart.-ը նոր ալբոմի մասին

15:48 • 30.12.22

Երիտասարդ երգչուհի yellowheart.-ը վերջին տարվա ընթացքում կարողացել է գրավել մարդկանց սրտերն իր հեղինակային երգերով, որոնք հաշված օրերի ընթացքում դառնում էին հիթեր և հնչում ամեն վայրից: «Էլի ես ու դու», «Մետրո», «Մենք», «Թվում ա, թե» երգերը յութուբում գրանցել են հարյուր հազարավոր և որոշները նաև միլիոնավոր դիտումներ:

Ամանորին ընդառաջ երգչուհին իր լսարանին է ներկայացրել ամանորյա երգեր հենց հայերենով: Tert.am Life-ի հետ զրույցում երգչուհին պատմեց երգերի ստեղծման և 2022-ի մասին:

«Նոր Տարի» ալբոմիս 3-րդ երգը գրել էի դեռ ԱՄՆ-ում սովորելու ընթացքում, ասեմ ավելին՝ աշնանը, երևի Նոր Տարվան շատ էի սպասում, իսկ առաջինն ու երկրորդը վերջին 2 շաբաթում են ստեղծվել: Մի տեսակ չկար այն ամանորյա տրամադրությունը, որը միշտ ունեցել եմ, երբ փոքր էի: Որոշեցի երգերի միջոցով ստեղծել, ու շատ էի ուզոմ հենց հայերեն Ամանորյա երգեր թողարկել այս տարի»,- ասաց երգչուհին:

Լիլին նշեց, որ այս օրերին հայկական երգերի ստեղծումը կարևոր է, քանի որ անգլալեզու երգերը շատ են, իսկ հայալեզու երգեր չկան: Նա նաև պատմել է՝ որն է եղել ոգեշնչվելու աղբյուրը:

«Ոգեշնչվել եմ Երևանի կենտրոնում քայլելիս, մանավանդ Հրապարակը հիմա շա՜տ հեքիաթային է, մի տեսակ մանկություն է տանում: Երևի համարժեք երգի պակասը կար»,- նշեց նա:

Ամփոփելով տարին երգչուհին շեշտեց, որ իր կարիերայի վերելքը սկսվել է հենց այս տարի:

«2022-ն ամենախառը, ոգևորող, փորձություններով լի տարին է եղել ինձ համար: Ամեն ինչ սկսվեց հենց 2022-ում: Անգլերեն տիպիկ բառ կա «Rollercoaster», ամերիկյան ատրակցիոնները, երբ մեկ վերևում ես, մեկ ներքևում, իսկ տեմպն էլ շատ արագ»,- ասաց երգչուհին:

Խոսելով 2023-ի մասին երգչուհին ծիծաղելով նշեց, որ, եթե պատմի երեզանքների մասին՝ նրանք չեն կատարվի:

Ամանորյա ալբոմում ներառված է 3 երգ, մասնավորապես՝ «Ուրիշ ա լինելու», «Հեյ, ձմեռ պապ», «Թող մի քիչ սեր բերի»:

Երգչուհին Ինստագրամի իր էջում հրապարակել է կարճ հոլովակներ Ամանորի շնչով լցված երևանյան փողոցներից՝ մաղթելով ուրախ տարի իր հետևորդներին և ընգծելով՝ 2023-ին երազանքները մեր հաստաաատ կկատարվեն: