Նկարիչ, քանդակագործ Արմինե Աղայանցի աշխատանքները կցուցադրվեն «Նյու Յորք Արտ Էքսպո 2023»-ի շրջանակում

13:41 • 17.01.23

Նկարիչ, քանդակագործ Արմինե Աղայանցի աշխատանքները կցուցադրվեն «Նյու Յորք Արտ Էքսպո 2023»-ի շրջանակում: Tert.am Life-ի հետ զրույցում նկարիչը պատմեց, որ մրցույթին մասնակցել է նաև 2017 թվականին:
Նյու Յորքի ցուցահանդեսից հետո Արմինե Աղայանցի ստեղծագործական պլաններում կան ցուցահանդեսններ Իտալիայում և Ֆրանսիայում։

«Մտահղացումներս բազմապիսի են, պլաններս էլ՝ շատ: Նոր լիցքերով եմ տարին սկսել և առաջիկա ցուցահանդեսներից հետո (նաև ցուցադրությունների միջակայքում) ուզում եմ սկսել նաև կավե հարթաքանդակների հետ աշխատանքս, ինչն ինձ շատ է հոգեհարազատ: Ցավոք, մի կողմ էի թողել այն, հիմա մի տեսակ կարոտել եմ և համոզված եմ, որ միանգամայն նոր էներգիա եմ ստանալու։ Այս նպատակով արված բազմաթիվ էսքիզներ ունեմ»,-Tert.am Life-ի հետ զրույցում նշեց Արմինեն:

Նա նաև նշեց, որ մինչև այս մասնակցել է բազմաթիվ հայրենական և արտասահմանյան ցուցահանդեսների՝ թե՛ ցուցահանդես-մրցույթների, թե՛ որպես թեմատիկ, բարեգործական կամ վարպետության դասերի ձևով (Փարիզում) և այլն.

«Իհարկե, ունեցել եմ նաև անհատական ցուցահանդեսներ, որոնք իրականացվում են ամեն անգամ, երբ աշխատանքներիս կեսից ավելին նորացված են, քանզի տեսանելի և թարմացված են ասելիքներս, նորամուծություններն ու ստեղծագործական աճը»:

Ինչ վերաբերում է ցուցահանդեսներին ներկայացվող գործերին, Արմինեն նշեց, որ առհասարակ ցուցահանդեսներին ներկայացնում է գեղանկարչական և լուսանկարչական աշխատանքներ, ինչպես նաև քանդակային և դիզայներական աշխատանքներ.

«Ոճերը տարբեր կլինեն: Մասնավորապես գեղանկարչության մեջ այժմ ավելի հետաքրքրված եմ նոր նյութերի տեխնիկաներով՝ դեկորատիվ էլեմենտներով և ասիմետրիկ ֆորմաներով, ձգտում եմ նաև մոտենալ նորաձև կիրառական արվեստին, քանզի նաև պահանջարկն է այդպիսին: Քանդակներս նույնպես պահանջարկված են և հիմնականում տարբեր առանձնատների ու հասարակական շինությունների ինտերիերային միջավայրերի ձևավորման նպատակով են: Բավականին լուրջ ուշադրություն եմ դարձնում լուսանկարներիս, չնայած՝ այն ավելի շատ հոբի եմ դիտարկում: Դրանք այժմ ավելի սև ու սպիտակ ֆորմատի մեջ են»:

Մեզ հետ զրույցում Արմինեն պատմեց նաև, որ արվեստի նկատմամբ սերը նրան է փոխանցվել ծնողներից.

«Մեր ընտանիքը, կարելի է ասել, միշտ էլ արվեստի ձգողական ուժի ներքո է եղել: Հայրս մասնագիտությամբ ճարտարապետ է, ունի գրաֆիկ նկարներ, գծանկարներ և բազմաթիվ քանդակներ տարբեր նյութերից՝ փայտից, պղնձից, կավից... հրաշալի աշխատանքներ ունի: Մայրս նույնպես շնորհալի է՝ հատկապես հետաքրքիր ասեղնագործության, շյուղագործության ու մաքրոմեի աշխատանքներ ունի՝ ազգային մանրանկարչության տարրերով: Մենք շատ հետաքրքիր մանկություն ենք ունեցել: Մեր ընտանեկան տիկնիկային թատրոնը Հայաստանի Տիկնիկային Գործիչների միության կողմից կազմակերպված փառատոնների մասնակից թատրոն էր և ուներ բազմաթիվ մրցանակներ: Տիկնիկային պիեսից, երաժշտական ձևավորումից, խաղարկային տարբեր տիկնիկների պատրաստումից մինչև բեմի ձևավորման ու ատաղձագործական աշխատանքներ. ամենը կատարվում էին մեր ընտանիքի ուժերով... ի դեպ, ստվերների տիկնիներով հիանում էին նաև մեծահասակները... ներկայացումների դերակատարները նույնպես մենք էինք ծնողներս, քույրս, եղբայրս և ես»:

Դեռ դպրոցական տարիքից՝ 4-րդ դասարանից հաճախել է Հակոբ Կոջոյանի անվան արվեստի դպրոց, ապա ուսումը շարունակել Հայաստանի գեղարվեստի պետական ակադեմիայում, որտեղ անցել է մեր ժամանակի ամենահեղինակավոր գեղանկարիչների դպրոցը.

«Տեսնելով իմ մեջ սերն ու հետաքրքրությունը գեղանկարչության հանդեպ և ամնեակարևորը իմ մեծ ցանկությունը՝ ծնողներս ճիշտ խորհուրդներ ու ճիշտ ուղղություն ցույց տվեցին ինձ: Իհարկե, շնորհակալ եմ նաև Գեղարվեստի Ակադեմիայի ամբողջ դասախոսական կազմին, ովքեր ջանք չեն խնայում արվեստի ոլորտում հայկական դպրոցի զարգացման ու նաև հանրահռչակման համար: Յուրաքանչյուր մարդ պետք է սիրի իր աշխատանքը և միայն այդպես հաջողություն կունենա և երջանիկ կլինի, երբ կատարում ես սիրածդ աշխատանքը, այն չես էլ ընկալում որպես աշխատանք, դու ուղղակի հաճույք ես ստանում այդ պրոցեսից։ Արվեստի ուժը շատ հզոր է, իսկ բնագավառը՝ շատ ճկուն: Իմ մասնագիտության մեջ անընդհատ կարողանում եմ փնտրտուքներիս հագուրդ տալ՝ սկսած ինտերիեր-էքստերիեր դիզայնից՝ մինչև նկարչություն ու քանդակագործություն, հարթաքանդակային կավագործություն, ինկրուստացիա… նույնիսկ երբեմն ուզում եմ մի քանի բան միաժամանակ անել և մեծ բավականություն եմ ստանում հենց բուն պրոցեսից։ Շատ երջանիկ եմ, որ հենց այս մասնագիտությունը ունեմ և զբաղվում եմ սիրածս գործով՝ հատկապես, երբ տեսնում եմ ավարտուն աշխատանքիս արդյունքը»:

Արմինեի խոսքով՝ ստեղծագործելու համար ինքը ոգեշնչվում է բնությունից, երաժշտությունից, ֆիլմերից և մեզ շրջապատող յուրաքանչյուր բանից, ինչը գեղեցիկ է.

«Գիտե՞ք, թե որքան գեղեցիկ է Տիեզերքը, Երկիր մոլորակը և նրա ամեն մի անկյունը, ամեն մի դետալը, գույնը, բնության զմայլելի երաժշտությունը: Ես կարող եմ օգեշնչվել դասական երաժշտությունով, ինչ-որ երգով, գեղարվեստական լավագույն ֆիլմերով, նույնիսկ փողոցում լսած որևէ մտքով, խոսակցությունով, որոնք իմ առջև բացում են մարդկային բնավորության՝ խարակտերի շերտերը, որից առաջացած գաղափարից արդեն մտքումս տեսնում եմ ապագա աշխատանքը: Երբեմն երազում եմ տեսնում այն պատկերները, որոնք դառնում են գեղարվեստական աշխատանքներ, բայց ինձ ամենից շատ ոգեշնչում են յուրաքանչյուր աշխատանքի ծննդից առաջ ստեղծվող ճեպանկարները՝ հատկապես առաջինը: Հենց այս փուլն է, որ մտահղացումդ ֆիքսում է և հենց այդ էսքիզներն են, որոնք հետագայում հանձնվում են կտավին ու հետո էլ հանդիսատեսին: Այս պահին ունեմ մի քանի ալբոմ, որոնք լցված են ճեպանկարներով ու սպասում են իրենց ավարտուն ստեղծման ժամանակին»:

Հեղինակ՝ Մարինե Գասպարյան