Ինձ շատ օգնեցին նկարչական իմ հմտությունները. դիմահարդար Սեդա Գրիգորյանը՝ հեղինակավոր OMC World Champion-2022-ում 2-րդ հորիզոնականը զբաղեցնելու մասին

Tert.am Life-ի զրուցակիցը դիմահարդար Սեդա Գրիգորյանն է, ով վերջերս OMC World Champion-2022 մրցույթում զբաղեցրել է 2-րդ հորիզոնականը:

-Սեդա, OMC World Champion-2022-ի Դուք արժանացաք 2-րդ մրցանակին, ինչի առիթով շնորհավորում ենք Ձեզ: Խնդրում եմ խոսել մրցույթի, ժյուրիի կազմի և Ձեր ներկայացրած աշխատանքի մասին:

-Նախ՝ շնորհակալ եմ: OMC-ն աշխարհի ամենամեծ պրոֆեսիոնալ վարսահարդարման և դիմահարդարման կազմակերպությունն է , որն առաջարկում է գլոբալ հարթակ գեղեցկության ոլորտի բոլոր ներկայացուցիչներին՝ երևալու և դառնալու աշխարհի չեմպիոններ իրենց ոլորտում: OMC HAIRWORLD BRAND՝S-ի հիմնադիր նախագահը եղել է Սալվադոր Ֆոդեռան 2004-2020թ.-ին, 2021թ.-ից նախագահում է Ջիանի Ֆոդեռան: OMC -ի կազմակերպության Հայաստանի ասոցիացիայի նախագահը Մարինա Առաքելյանն է։

Իրականում՝ մրցույթների դիմահարդարումները տարբերվում են իրենց բարդությամբ, դեկորատիվ էլեմենտներով, և այնտեղ գերակշռում է ստեղծագործական միտքը: Եվ այդ պատճառով միայն դիմահարդարումը բավական չէր լինի արդյունքի հասնելու համար։ Մեզ այնտեղ շատ օգնեցին մեր նկարչական հմտությունները, որոնց շնորհիվ մենք զբաղեցրինք բոլոր լավագույն հորիզոնականները։ Հաղթանակը, ճիշտ է, միշտ էլ քաղցր է, բայց կարծում եմ, որ մասնակցության ընթացքը վայելելը մի ուրիշ զգացողություն է, հատկապես երբ դու սիրով ես անում քո աշխատանքը: Շատ ուրախ էինք, որ մեր ջանքերը գնահատվեցին, և մեր աշխատանքները արժանացան մարդկանց համակրանքին:

-Դուք նշում եք, որ մենակ չեք մասնակցել: Մեր ընթերցողի համար նշեմ, որ Ձեզ հետ մրցույթին մասնակցել է նաև Ձեր գործընկերուհին՝ Անուշը, որի հետ, եթե չեմ սխալվում, շուրջ 5 տարի է՝ աշխատում եք: Ու՞մ միտքն էր մրցույթին մասնակցելը: Առհասարակ, ինչպես ստացվեց, որ ներկայացրիք հայտը:

-Այո, միասին ենք մասնակցել և արդեն 5 տարի է՝ միասին աշխատում ենք Beauty Fabric-ում, մեր բոլոր քայլերը միասին ենք սկսել, մինչ օրս էլ միասին քննարկում ենք մեր անելիքները, միմյանց տալիս ենք խորհուրդներ, քանի որ մեզնից լավ ուրիշ ոչ ոք մեզ չի ճանաչում։ Միմյանց օգնելով՝ միշտ ու ամեն տեղ փորձում ենք հասնել հաջողությունների: Ու այսօր նորից վայելում ենք մեր համատեղ հաղթանակը։ Իրականում մեր թիմը միշտ մասնակցում է OMC-ի կազմակերպած մրցույթներին և այս տարին ևս բացառություն չէր։

- Նման մրցույթները ինչ հնարավորություններ են տալիս մասնագետներին և ի՞նչ կշիռ են հաղորդում նրանց կարիերային:

- Նման մրցույթները, ըստ իս, շատ կարևոր են բոլոր մասնագետների համար, քանի որ դրանց շնորհիվ կատարելագործվում ես և բարելավում ես աշխատանքիդ որակը։ Աշխատանքդ գնահատում են այդ ոլորտի շատ լուրջ ու ճանաչված մասնագետներ, ինչը, կարծես, պարտավորեցնում է քեզ դառնալ ավելի լավը։ Խոսելով սեփական փորձից՝ կարող եմ ասել, որ նմանատիպ մրցույթները կարիերայիս ստեղծման գործում կարևորագույն տեղ են զբաղեցրել և շարունակելու են առաջ մղել ինձ։ Մասնավորապես՝ 2019թ.-ին մասնակցել եմ National Beauty Cup of Georgia-ին և զբաղեցրել եմ 1-ին հորիզոնականը, ինչն ինքնին բացել է շատ դռներ իմ առջև։ Ես շարունակելու եմ մասնակցել առաջիկայում սպասվող մրցույթներին և փորձելու եմ գրանցել հաջողություններ և արժանանալ լավ հորիզոնականների։

-Առաջարկում եմ ընդհանուր խոսել Ձեր անցած ուղու մասին, ինչպե՞ս մուտք գործեցիք ոլորտ: Կա՞ր մեկը, ումով ոգեշնչվել եք:

-Ես վաղ հասակից նկարում եմ և, առհասարակ, սերս արվեստի նկատմամբ շատ մեծ է: Սակայն մտքովս անգամ չի անցել, որ մի օր դիմահարդար կդառնամ։ Սիրել եմ այդ գործը շատ, բայց չեմ մտածել, որ այսքան կխորանամ այս մասնագիտության մեջ։ Ինչևէ, կյանքը լի է անսպասելի իրադարձություններով։ Եվ այսպես, դիմահարդարման ոլորտում իմ առաջին քայլերը արվել են Сергей Зверев-ի ակադեմիայում 2017թ.-ին , որտեղ սովորել եմ Աշխեն Կոստանդյանի մոտ։ Ավարտելուց հետո՝ 2018 թ.-ին անցել եմ աշխատանքի Beauty Fabric-ում ու մինչ օրս վայելում եմ աշխատանքիս ամեն րոպեն։ Այդ ժամանակահատվածում ոգեշնչվել եմ Աշխենի աշխատանքներով և ձեռագրով, քանի որ դրանք յուրահատուկ էին և երբեք չէին կրկնվում։ Նա օժտված է ունիկալ հատկությամբ՝ ստեղծել նորը, չկանգնել նույն տեղում, անընդհատ առաջ գնալ։ Եվ այս ամենն է, որ գրավել է ինձ և նույնիսկ փոխել։

 -Դիմահարդարումը ևս արվեստ է, որտեղ կտավի փոխարեն մարդն է: Ձեր աշխատանքում ի՞նչ սկզբունքով եք առաջնորդվում:

 -Աշխատանքիս մեջ թերևս ամենակարևոր սկզբունքը հաճախորդներիս գոհացնելն է, ինչին հասնելու համար ինձ անհրաժեշտ է հասկանալ հաճախորդիս էությունը, որ կարողանամ ստանալ նրան համապատասխան կերպար, չէ՞ որ ինչպես ասել է չին նկարիչ և բանաստեղծ Տին Տունը՝ «Նկարելով ճյուղը՝ պետք է լսել՝ ինչպես է սուլում քամին»:

Հեղինակ՝ Մարինե Գասպարյան