«Կերպարի համար ես պատրաստ եմ ցանկացած արտաքին փոփոխության». Նորայր Եղյանը՝ կնոջ դերը մարմնավորելու և առաջին անգամ հումորային նախագծում ներգրավվելու ժամանակ

Տարբեր հեռուստասերիալներից հայտնի դարձած դերասան Նորայր Եղյանն առաջին անգամ լսարանին ներկայանում է հումորայի ժանրի նախագծում: Դերասանն այս շրջանում նկարահանվում է «Բոլոլա» սիթքոմում, որի շրջանակում մարմնավորում է միանգամից 2 կերպար, որոնցից մեկը  երիտասարդ աղջիկ է: Tert.am Life-ին դերասանը վստահել է առաջին մանրամասները՝ պատմելով կերպարի, կեղծամ կրելու և նոր ոճում ներկայանալու մասին: 

Ինչպես հայտնել էինք նախագծում հոր դերում է Արմեն Պետրոսյանը՝ Մենչը, որի ավագ դստեր դերում է դերասանուհի Մագա Հարությանը: Նախագծում Նորայր Եղյանի և Մագա Հարությունյանի մարմնավորած հերոսներն ունեն սիրային պատմություն, բայց հայրը դեմ է, որ ավագ դուստրն ընկերություն անի որևէ երիտասարդի հետ և նման ֆորսմաժորային իրավիճակում հայտնվելով՝ Ալեքսը կերպարանափոխվում է՝ դառնալով Աննա: 

«Ես համաձայնվել եմ հենց այդ հանգամանքով պայմանավորված, որ ներկայանալու եմ հումորային նախագծում՝ մարմնավորելով երկու կերպար և երկուսի պարագայում էլ մարդկանց համար անսպասելի է: Կար հստակ որոշում, երբ ավարտվեց նախորդ նախագիծը ես հասկացա, որ այդ շրջանում չեմ ցանկանում նկարահանվել, բայց ստացա Արմենից նման առաջարկ, որը չէի կարող մերժել, քանի որ իսկապես սպասված առաջարկ էր: Արդեն 9 տարի է ինչ այս ոլորտում եմ, հասցրել եմ նկարահանվել տարբեր հեռուստանախագծերում, բայց առաջին անգամ է, որ նման ժանրում եմ ներկայանալու և նման կերպարներով»,- ասաց Նորայր Եղյանը:

Դերասանը նշեց, որ սիրում է փորձարկումներ և փորձել է ամեն նախագծից հետո այլ կերպ ներկայանալ հանդիսատեսին, բայց անգամ այդ պարագայում նա նշում է, որ նման լուծումներն անսպասելի են լինելու: 

«Երբ ստանում եմ աշխատանքային առաջարկներ և պրոդյուսերը ճշտումներ է անում արտաքին փոփոխությունների հետ կապված ես միշտ նշում եմ՝ կերպարի համար ես պատրաստ եմ ցանկացած արտաքին փոփոխության` սափրել գլուխս, կրել կեղծամ, ես պատրաստ եմ անգամ, որ այրեն ինձ կադրում, եթե ամեն բան արդարացված է, քանի որ դերասան լինելը ենթադրում է, որ դու քեզ հանձնում ես ռեժիսորին, որը գիտի՝ ինչ պետք է անել»,- նշեց դերասանը:

Նորայր Եղյանի խոսքով՝ բարդ է, երբ երկրում ճգնաժամային իրավիճակ է, բայց դերասանները և հանրային մարդիկ կարողանում են շարունակել իրենց աշխատանքը՝ փորձելով փոխանցել դրականը:
«Ուզում եմ, որ գնահատվի այն ամենն ինչ անում ենք, քանի որ մեր աշխատանքի պարագայում ամեն բան արվում է հեռուստադիտողի համար: Ես ի սկզբանե հեռուստադիտողի առաջ ներկայացել եմ ժամանցային ձևաչափով, քանի որ եղել եմ ժամանցային նախագծի հաղորդավար, չնայած այդ շրջանի սերունդն արդեն մեծացել է»,- պատմեց Նորայր Եղյանը: 

Դերասանը նշեց, որ կնոջը մարմնավորելու հարցում ունեցել է կարճատև մտավախություն, որը տևել է րոպեներ և կարողացել է արագ որոշում կայացնել:
«Դու պետք է ենթարկվես ընտրված մասնագիտության կանոններին և յուրաքանչյուրի որոշումն է համաձայնվել, թե՝ ոչ: Իմ պարագայում ես լիովին վստահել եմ թիմին, իսկ այս մասնագիտությունը խայտառակ սիրում եմ և կարծում եմ, որ պատրաստ եմ նման զոհողությունների: Պետք է նշեմ, որ կեղծամն աննկարագրելի անհարմար է, շատ անսովոր է կրել թարթիչներ, ունենալ նման գրիմ, բայց միևնույն է հասկանում ես, որ սցենարական առումով նման մոտեցումն արդարացված է, քանի որ սիրահարված երիտասարդը սիրելիի աղջկա հետ հանդիպումից հետո, պետք է փորձի դուրս գալ տանից, որպեսզի նաև հայրը չհասկանա, որ ես նրա դստեր ընկերուհին եմ»,- ասաց Նորայր Եղյանը: