Անահիտ Քոչարյանը, Ռոմելա Սարգսյանը, Գևորգ Գրիգորյանը և մի շարք այլ դերասաններ՝ Ելենա Արշակյանի՝ «Լեռները կհիշեն» հեռուստասերիալում

Հոկտեմբերի 9–ից Արմենիա հեռուստաընկերության եթերում կլինի Ելենա Արշակյանի նոր հեռուստասերիալը՝ «Լեռները կհիշեն» հեռուստանովելը, որը պատմելու է լեռնագնացների ընտանիքի մասին, որի շուրջ էլ ծավալվելու է պատմությունը։ Tert.am Life-ի հետ զրույցում նախագծի պրոդյուսեր Ելենա Արշակյանը նշել է, որ հեռուստադիտողը տեսնելու է Հայաստանի գողտրիկ և սիրելի անկյունները, որտեղ զարգանալու է պատմությունը։
«Սցենարի հեղինակը Անահիտ Մխիթարյանն է, որի հետ արդեն տևական ժամանակ է ինչ աշխատում ենք, բայց ամեն տարի մեր աշխատանքը բարդանում է, երբ պետք է տանք նոր նախագծեր, բայց կարծում եմ՝ կարողանում ենք հեռուստադիտողին մատուցել հետաքրքիր նախագծեր»,– ասաց Ելենա Արշակյանը։ 

Այս նախագծում ևս Ելենա Արշակյանը հարթակ է տրամադրում սկսնակ դերասանների համար, բայց հեռուստադիտողը տեսնելու է նաև ծանոթ դեմքերի։

«Հետաքրքիր դերասանական անձնակազմ ենք հավաքել և կարող եմ ասել՝ տեսնելու են դեմքերի, որոնց հասցրել են կարոտել, մասնավորապես՝ ՀՀ ժողովրդական արտիստ Հրաչյա Գասպարյանին և ՀՀ ժողովրդական արտիստ Անահիտ Քոչարյանին, Արմինե Պողոսյանին, որը բնակվում է ԱՄՆ–ում նկարահանվելու է այս նախագծում և կարծում եմ՝ հեռուստադիտողը հասցրել է նրան կարոտել։ Հեռուստասերիալում նկարահանվում են դերասաններ, որոնց հետ նախկինում աշխատել ենք, մասնավորապես՝ Ռոմելա Սարգսյանը, Գևորգ Գրիգորյանը, Հակոբ Տեր–Վարդանյանը, Անահիտ Մանուկյանը և նրանք հետ մի շարք նոր դեմքեր»,– հավելեց պրոդյուսերը։

եռուստասերիալը լեռնագնացների ընտանիքի մասին է և ինչպես նշեցինք սպասվում են մի շարք տեսարաններ, որոնք կլինեն Հայաստանի պատմական անկյուններում։

Մեզ հետ զրույցում Ելենա Արշակյանը նշեց, որ սպասում են հենց այդ տեսարաններին։ 

«Նկարահանումներ են լինելու մեր հայրենիքի ամենագողտրիկ ու սիրուն վայրերում, անհամբեր սպասում ենք մեր Խուստուփում իրականացվելիք նկարահանումներին։ Մեր նկարահանող խումբը բարձրանալու է Խուստուփ և այնտեղ ունենք շատ գեղեցիկ ու տպավորիչ նկարահանումներ, որոնք կայանալու են մեր հայերենիքի պատմական անկյուններում»,– եզրափակեց Ելենա Արշակյանը։