«Մենք այնտեղ էինք, որտեղից պարզ երևում էր` ինչի համար են պայքարել մեր նախնիներն ու 44-օրյայի տղաները». Ելենա Արշակյանը՝ Սյունիքում կայացած նկարահանումների մասին (լուսանկարներ)

Հոկտեմբերի 9-ից Արմենիա թիվիի և Արմենիա պրեմիումի եթերում կլինի Ելենա Արշակյան-Անահիտ Մխիթարյան ստեղծագործական զույգի նոր աշխատանքը՝ «Լեռները կհիշեն» հեռուստանովելը, որի նկարահանումների մի մասն անցել է սյունյաց աշխարում:

Նախագծի պրոդյուսերը՝ Ելենա Արշակյանը Tert.am Life-ի հետ զրույցում ներկայացրել է մանրամասներ Սյունիքում կայացած նկարահանումներից՝ տրամադրելով լուսանկարներ: Նկարահանող խումբը մեկնել է Սյունիք, երբ Արցախում սկսվել էին ռազմական գործողությունները և ադրբեջանական  կողմը հրթիռակոծում էր Արցախը:

«Մենք Սյունիքի լեռներում էինք ամենածանր օրերին, երբ կրակում էին Արցախի վրա։ Մենք այնտեղ էինք, որտեղից պարզ երևում էր` ինչի համար են պայքարել մեր նախնիներն ու 44-օրյա պատերազմի մասնակիցները։ Ավելի ծանր նկարահանումներ չեմ հիշում։ Այս պահին մի բան է ստիպում աշխատել ու չկոտրվել ՝ հայրենիքի մասին ևս մի անգամ պատմելը, մարդկանց ցույց տալը մեր հարստությունը, ևս մեկ անգամ ասելը ՝ մենք պիտի միայն վերադառնալ սովորենք։ Մնացեք Հայաստանում, մեր հողը սիրում է մեզ»,- ասաց նա:

Ելենա Արշակյանը հավելեց, որ նախնական աշխատանքների փուլում արդեն իսկ որոշված էր, որ նկարահանումներ պետք է իրականացվեն նաև Խուստուփի բարձունքին:
«Այդ օրերին ես որպես խմբի ղեկավար բարդ ընտրության առաջ էի, մեկնել թե՝ ոչ, քանի որ ինձ հետ էր մեկնում մի ամբողջ խումբ, դերասաններ և կադրից դուրս աշխատող անձնակազմ, որոնց համար ես պատասխանատվություն էի կրում։, բայց, երբ մի պահ սթափվեցի, հասկացա՝ պետք է մեկնել: Մենք որևէ հերոսություն չենք արել, մենք ընդամենը ցույց ենք տվել մեր հայրենիքի մի մասը, կարևոր մասը, որտեղ թաղված են Գարգեին Նժդեհի մասունքները և զորավարի կիսանդրին է, որը հայացքը սևեռված նայում է դեպի սյունյաց բարձունքները»,- մանրամասնեց Ելենա Արշակյանը: 

Նրա խոսքով՝ հայրենիքի այլ հատվածում նկարահանումներ ևս իրականացվելու են: Ելենա Արշակյանը նաև պատմեց նկարահանումների բարդ կողմի մասին:

«Ես խոստանում եմ, որ շարունակելու ենք այցելել մեր հայրենիքի մյուս գողտրիկ, թաքուն ու կարևոր անկյունները, մեր հեռուստադիտողին ցույց տալու մեր պատմական հարստությունը։ Այս արշավն ու նկարահանումները չէին լինի առանց արշավական Գոռ Խալաֆյանի, որն արդեն մեր լավ ու հարազատ ընկերն է դարձել, ճիշտ են ասում, մարդուն ճանաչելու համար ճանապարհ անցիր։ Գոռն իր գործի նվիրյալն է, որը մեզ օգնեց դժվարին նկարահանումներ կազմակերպելու հարցում»,- նշեց նա: