«Փրկենք չափանիշները, որ չափանիշները փրկեն մեզ». Դրամատիկական թատրոնում կայացել է «լորենցաչչո» ներկայացման առաջնախաղը. հայտնի հյուրերն ու մանրամասները (լուսանկարներ)

Հրաչյա Ղափլանյանի անվան Դրամատիկական թատրոնը նորություն ունի իր հանդիսատեսի համար: Թատրոնի խաղացանկն է համալրել «լորենցաչչո» ներկայացումը, որում ներգրավված են թատրոնի 23 դերասանները: Երեկ թատրոնում կայացել է ներկայացման առաջնախաղը, որին ներկա էին մի շարք հայտնիներ: Tert.am Life-ը ներկայացնում է առաջնախաղի մանրամասները, հարցազրույցը թատրոնի գեղարվեստական ղեկավարի և դերասանների հետ, լուսանկարներն ու հետաքրքիր դրվագները:

Թատրոնի ետնաբեմում փակ դիտումից առաջ իրական իրարանցում էր, որտեղ դերասանները պատրաստվում էին ներկայացման, անում վերջում փորձերը, բայց և այդ ժամանակահատվածում հասցնում խոսել լրագրողների հետ: Թատրոնի միջանցնքերում սև հագուստով դերասաններ են, քանի որ հենց այդ «գույնն» ունի ներկայացումը:

 

Բեմադրության հեղինակը Դրամատիկական թատրոնի գեղարվեստական ղեկավար, ՀՀ ժողովրդական արտիստ, ՀՀ պետական մրցանակի դափնեկիր Արմեն Խանդիկյանն է։ 
«Ալֆրեդ դե Մյուսեյի այս պիեսը ինձ դեռ ուսանողական տարիներից է հետաքրքրել։ Այն,
ինչ կատարվում է պիեսում ակտուալ էր և այն տարիներին, և, կարծես, առավել ևս
այսօր»,֊ ասում է Արմեն Խանդիկյանը։

Պիեսի գործողությունները տեղի են ունենում 1530-ական թվականներին Ֆլորենցիայում, որտեղ իշխում էին Մեդիչիները։ Մյուսեի այս ստեղծագործությունը համարվում է «չբեմադրվող պիես»: Ավելի քան 40 գործող անձինք, դեպքեր ու դեմքեր, այս գործը գրվել է միայն ընթերցելւո համար։ Ալֆրեդ դը Մյուսեի կենդանության օրոք պիեսը այդպես էլ չբեմադրվեց։

 

Այս ներկայացմանը Լորենցաչչոյի դերում է ՀՀ Վաստակավոր արտիստ, Հրաչյա Ղափլանյանի անվան Դրամատիկական թատրոնի տնօրեն Արտաշես Մխիթարյանը, որը լրագրողների հետ զրույցում նշում է, որ 18 տարի է աշխատում է դրամատիկականում, բայց առաջին անգամ է նման մասշտաբներով և գույներով լի կերպարի մարմնավորում: 

«Երկար ժամանակ է պահանջվել ինձնից, որ կերտեմ ու ստանամ այս կերպարը, քանի որ ունեցել ենք, և՛ առանձին փորձեր, քննարկումներ, և՛ թիմային ինտենսիվ աշխատանք: Ես մարմնավորում եմ մարդու, որն արդարության համար պատրաստ է զոհաբերել իր կյանքը, իսկ հետագա իրադարձությունները զարգանում են շատ հետաքրքիր: Ներկայացումը շատ ռիթմիկ է, քանի որ առկա է նաև իրոնիկ ժանրը, որը եղել է Արմեն Խանդիկյանի մոտեցումը»,- ասաց Արտաշես Մխիթարյանը:

 

Արմեն Խանդիկյանի խոսքով պիեսի իրոնիկ տրագեդիա ժանրն իր մոտեցումն է, բայց բեմադրությունը լիովին փոխանցում է Մյուսենի ասելիքը: 

«Փորձերի ընթացքում արտիստների հետ միասին ստեղծել ենք կերպարներ, յուրահատուկ բեմական աշխարհ և մթնոլորտ։ Այս գործում չկան միանշանակ կերպարաներ՝ չար կամ բարի, նրանք բոլորը մարդիկ են, իրենց ճշմարտությամբ ու մտքերով։ Ինձ համար այս ներկայացման ժանրը իրոնիկ տրագեդիան է, իսկ ներկայացման մեջ աշխատող արտիստների մեծ մասը Դրամատիկականի նոր սերունդն է։ Կարծում եմ՝ ներկայացումը դիտելիս հանդիսատեսը կմտահոգվի, կժպտա, կմտածի, կծիծաղի… իրոնիկ տրագեդիա»,-մանրամասնում է Արմեն Խանդիկյանը։

 

Թատրոնի դերասանուհի Էմմա Մանուկյանն էլ հաստատում է՝ չնայած իր կերտած դերը փոքր է, բայց ունի շատ ասելիք, շատ գույներ և էմոցիաներ, որոնք փոխանցվում են հանդիսատեսին: Դերասանուհին նաև նշեց, որ ամիսներ շարունակ փորձերի ընթացքում լսել է տողեր, որոնք «դաջվել են» իր մտքում և հոգում: 

«Մարմնավորում եմ Կատարինային, որին կերտելն ինձ համար եղել է շատ հետաքրքիր: Ես չէի կարող պատկերացնել, որ այսքան փոքր դերի մեջ կկարողանամ տեսնել այսքան մեծ աշխարհ, որն այսչափ ինձ կգրավի: Այս ոճում ես Արմեն Խանդիկյանի հետ դեռևս աշխատելու փորձ չէի ունեցել, քանի որ ըստ բնօրինակի իմ դերն այսպիսին չէ և Խանդիկյանն այլ կերպ է տեսել և մատուցել այն: Երբ ծանոթանում էի սցենարին ու կարդացի նամակի տեքստը կարդացի տողեր, որոնք երբեք իմ մտքից չեն ջնջվի. «Թող իմ գրիչը սրտիս արյունով արձանագրի այն, ինչ չեն կարող ասել շուրթերն իմ»...: Կարդացի այս նախադասությունը և ողջ դերը կառուցել եմ այս տողերի վրա՝ որոնք ասելով հերոսուհիս կերպարանափոխվում է»,- ասաց Էմմա Մանուկյանը:

 

Մյուսեի այս ստեղծագործությունը կոչում են «ֆրանսիական Համլետ»։ Բեմադրության իր տարբերակում Արմեն Խանդիկյանն օգտագործել է ասույթներ իր եղբոր Տիգրան Լևոնյանի գրքից։ «Մի խոսքով, եկեք ու նայեք ներկայացումը։ Ձեզ սպասում է ոչ միայն էֆեկտ, այլ նաև
աֆեկտ»,- եզրափակեց Արմեն Խանդիկյանը։

Նշենք, որ «Լորենցաչչո» բեմադրությունը ստեղծվել է Դրամատիկական թատրոնի ամբողջ
անձնակազմ մասնակցությամբ։

 

 

Լուսանկարները՝ Էլեն Միքայելյանի