Գիտնականները հայտնաբերել են հիշողությունը բարելավելու հասանելի միջոց

Իտալացի գիտնականները պարզել են, թե հասանելի և բոլորի կողմից սիրելի ո՞ր մթերքն է ամեն օր օգտագործելու դեպքում նպաստում հիշողության բարելավմանը:

Ակվիլի համալսարանի գիտնականները հայտարարել են, որ կակաոն ամեն օր օգտագործելու դեպքում կարող է զգալիորեն բարելավել մարդու հիշողությունը: Հետազոտություններին մասնակցել են տարեց անձիք, ովքեր տառապում էին մի շարք հիվանդություններով (այդ թվում նաև զարկերակային բարձր ճնշումով) և ունեին տարբեր խանգարումներ:

Արդյունքներն ապշեցուցիչ էին. պարբերաբար կակաո օգտագործելուց հետո զգալիորեն բարելավվել են մտավոր ունակությունները, վերականգնվել է խոսքի և ռեակցիայի արագությունը, բարելավվել է պատկերացումն ու ընկալունակությունը, կարգավորվել է արյան ճնշումը, նյութափոխանակությունն ու հորմոնների արտադրությունը, վերականգնվել են մկանային հյուսվածքները: Նման արդյունքներ գիտնականները ստացել են կակաոյի պարբերաբար օգտագործման արդեն 8-րդ շաբաթում:

Բացի այդ, գիտնականները կարծում են, որ կակաոյի օգտագործումը կարող է նվազեցնել սրտանոթային հիվանդություններից մահանալու հավանականությունը 50%-ով:

Հատկապես օգտակար են կակաոյում պարունակվող ֆլավոնոիդները: Ընդհանուր առմամբ՝ կակաոյում պարունակվում է մոտ 300 օգտակար նյութ, այդ թվում նաև «երջանկության հորմոնը»՝ սերոտոնինը, մի շարք վիտամիններ, հանքանյութեր և կենսաբանական ակտիվ միացություններ: Առավոտյան մի բաժակ կակաոն կարող է փոխարինել այդքան հայտնի կենսաբանական ակտիվ հավելումներին և վիտամինային դեղորայքին:

Մասնագետները խորհուրդ են տալիս կակաո պարունակող սննդամթերք օգտագործել ամեն օր, սակայն զգուշացնում են, որ պետք է ուշադրություն դարձնել որոշ առանցքային կետերի: Օրինակ՝ շոկոլադ ընտրելիս՝ անհրաժեշտ է ընտրել կակաոյի բարձր պարունակությամբ, առանց կոնսերվանտների, էմուլգատորների ու սննդային հավելումների արտադրանքը:

Բացի այդ, պետք է նաև հիշել, որ կակաոն պարունակում է կոֆեին, որը ոմանց հակացուցված է և ցանկալի չէ երեխաների համար: Ոմանց մոտ այս մթերքը քիմիական մշակման պատճառով կարող է առաջացնել ալերգիաներ: Մթերքն ընտրելիս՝ անհրաժեշտ է ուշադրություն դարձնել, թե որտեղ և ինչ պայմաններում է այն արտադրվել և ընտրել միայն օրգանական արտադրանք (ամենաանորակը Չինաստանի արտադրությունն է): Բացի այդ, ջերմային մշակումը նույնպես ոչնչացնում է օգտակար նյութերի մի մասը:

Նյութի աղբյուրը՝ gogetnews.info