Ինչպիսին պետք է լինի 1-3 տարեկան երեխայի սննդակարգը. փոքրիկների սնվելու նորմերը

1 տարին բոլորելուց հետո փոքրիկի կյանքում նոր փուլ է սկսվում, որը բնորոշվում է ոսկրային ու մկանային հյուսվածքների ակտիվ աճով, նոր կաթնատամների ձևավորմամբ և, որպես հետևանք, օրգանիզմի նոր պահանջների ի հայտ գալով: Այս տարիքում երեխային հարկավոր է լիարժեք սնունդ, որը հարուստ կլինի սպիտակուցներով, ածխաջրերով, բուսական ու կենդանական ճարպերով, վիտամիններով ու հանքանյութերով:

 

Այս տարիքում երեխայի ատամների քանակը շատ արագ ավելանում է, ուստի նրա սնունդակարգում պետք է լինի ոչ միայն մանրացրած ու տրորված սննդամթերք, այլև կոշտ բաղադրիչները: Թարմ բանջարեղեն ու մրգեր ծամելը բարենպաստ ազդեցություն է ունենում երեխայի ճիշտ ատամնանստվածքի ձևավորման վրա:

 

1-2 տարեկան երեխայի մոտավոր սննդակարգը

 

1-2 տարեկան երեխան պետք է օրական սնվի 5 անգամ: Նրա ամենօրյա սննդակարգը պետք է պարունակի միս (ցանկալի է անյուղ տավարի միս կամ հավի միս), հատիկաբույսեր, մրգեր ու բանջարեղեն: Շաբաթական երկու անգամ մսային ուտեստը հարկավոր է փոխարինել ձկով ուտեստով: Երեխան կարող է ձվի դեղնուց ուտել շաբաթական երկու անգամից ոչ ավել, սակայն եթե փոքրիկի մոտ նկատվում է ալերգիկ ռեակցիա, ապա այն հարկավոր է բացառել:

 

Երեխայի սննդակարգի կարևոր ու պարտադիր բաղադրիչը պետք է լինի նաև կաթնամթերքը, քանի որ այն պարունակում է աճող օրգանիզմի համար շատ կարևոր կալցիում, ինչպես նաև անփոխարիների կաթնաթթուներ, սպիտակուցներ ու ճարպեր: Փոքրիկի սննդակարգում կարելի է ներառել կաթ (մինչև 1.5 տարեկան երեխաների դեպքում կաթնային խառնուրդ), կաթնաշոռ, կեֆիր, ինչպես նաև ոչ աղի պանիր: Սկզբնական շրջանում փոքրիկի համար նախատեսված կաթնաշոռն ու կեֆիրը հարկավոր է պատրաստել ինքնուրույն, իսկ 2.5 տարեկանից հետո կարելի է արդեն գնել պատրաստի:

 

2 տարեկան երեխայի մոտավոր սննդակարգը

 

Նախաճաշին.

 

·        150 գրամ շիլա (հնդկաձավար, վարսակ, եգիպտացորեն և այլն)՝ եփված կաթով ու կարագով,

 

·        կարագով ու պանրով սենդվիչ,

 

·        ½ հավկիթ,

 

·        խնձոր,

 

·        ոչ քաղցր կոմպոտ, կաթ կամ թեյ:

 

Ճաշին.

 

·        150 գրամ մսով կամ ձկան մսով ապուր,

 

·        150 գրամ շոգեխաշած կոտլետ կարտոֆիլի խյուսով,

 

·        ոչ քաղցր կոմպոտ:

 

Հետճաշիկին.

 

·        50-100 գրամ կաթնաշոռ,

 

·        100 գրամ կեֆիր կամ յոգուրտ,

 

·        չոր ոչ քաղցր թխվածքաբլիթ,

 

·        բանան:

 

Ընթրիքին.

 

·        100 գրամ եփած բանջարեղեն (գազար, բրոկոլի, ծաղկակաղամբ),

 

·        50 գրամ խաշած ձուկ,

 

·        մրգային հյութ,

 

·        չոր թխվածքաբլիթ,

 

·        մրգեր:

 

Շաբաթական երկու անգամ ընթրիքին երեխան կարող է ուտել շիլա կամ մակարոնեղեն: Սա հատկապես օգտակար կլինի այն երեխաների համար, որոնց քաշը նորմայից փոքր է:

 

Մինչև երկու տարեկան երեխայի սննդակարգից ցանկալի է ամբողջությամբ բացառել խաղցրավենիքը: Ավելի ուշ կարելի է շաբաթական մի քանի անգամ փոքրիկին մարմելադ, մրգապաստեղ կամ որակյալ կաթնային շոկոլադ տալ: Սակայն հարկ է հիշել, որ երեխաները շատ արագ են սովորում նման անուշեղենին, ուստի այն հարկավոր է տալ միայն ուտելուց հետո և քիչ քանակությամբ:

 

Նյութի աղբյուրը՝ relaxmam.ru