Առողջական ինչ խնդիրների մասին է հուշում պարանոցի ցավը

Առողջական ցանկացած խնդրի դեպքում օրգնիզմը հուշում է խանգարման մասին տարբեր ախտանշանների միջոցով: Ձեր ուշադրությանն ենք ներկայացնում այն լուրջ խանգարումները, որոնք կարող են դրսևորվել պարանոցի ցավով:

Օստեոարթրոզ

Սա խոշոր ու մանր հոդերի ամենատարածված հիվանդությունն է: Պարանոցի կտրուկ ցավը կարող է խոսել ողերի տեղախախտման կամ գերշարժունության մասին: Վիճակագրական տվյալներով՝ պարանոցի ողերի տեղախախտումներ են հայտնաբերվում 50-ից բարձր մարդկանց 50%-ի մոտ և 65 տարեկանից բարձր անձանց 75%-ի մոտ: Վերջին տարիներին այս խնդիրն առավել հաճախ է ախտորոշվում նաև մինչև 30 տարեկան երիտասարդների մոտ: Մասնագետների խոսքով՝ տարիքային դեգեներատիվ փոփոխոթւոյւնների հարցում որոշակի դեր է խաղում նստակյաց կենսակերպը, անհանգստությունը, դեպրեսիաները, պարանոցի մկանների մշտական լարվածությունն ու տրավմաները:

Մկանային սպազմներ

Պարանոցի սուր ցավերի և սուր ծուռվզության հիմնական պատճառը մկանային սպազմներն են: Առավել հաճախ նման խնդիր է առաջանում 12-30 տարեկան մարդկանց մոտ: Այս խանգարման պատճառները դեռ հստակ չեն: Տեսականորեն այն կարող է կապված լինել միջողային սկավառակների ու հոդերի միկրովնասվածքների հետ:

Պարանոցային ռադիկուլիտ

Պարանոցային ռադիկուլիտը զարգանում է ողնուղեղային նյարդի արմատի սեղմվելու կամ գրգռվելու հետևանքով: Առավել հաճախ այս խանգարումն ախտորոշվում է 40-50 տարեկանից բարձր անձանց մոտ: Հետազոտությունները ցույց են տվել, որ պարանոցային ռադիկուլիտի և ֆիզիկական ծանրաբեռնվածության կամ տրավմաների միջև կապն այդքան էլ էական չէ: Գիտնականները ենթադրում են, որ այս խանգարումը կապված է գենետիկ գործոնի հետ, որը որոշում է մարդու ողնաշարի սկավառակների վիճակը:

Աուտոիմունային գործընթացներ

Պարանոցի ցավը կարող է պայմանավորված լինել նաև հոդերն ու ոսկրային հյուսվածքներն ախտահարող արթրիտային գործընթացներով:

Ինֆեկցիոն հիվանդություններ

Այս հիվանդություններն ազդում են ընդհանուր իմունային համակարգի, ինչպես նաև բոլոր օրգանների վրա: Պարանոցի ցավը կարող է հուշել օրգանիզմում այնպիսի ինֆեկցիոն հիվանդությունների զարգացման մասին, ինչպիսին են մենինգիտը, պոլիոմիելիտը, գոտևորող որքինը, լիմֆադենիտն ու թիրեոդիտը:

Ողնաշարի մտրակային տրավմա

Այս տրավման առավել հաճախ մարդիկ ստանում են ավտովթաների և սխալ սուզվելու հետևանքով:  Այս դեպքում վնասվում են միջողային հոդերը, մկանները, ջիլերը, սկավառակները ու ողնուղեղային նյարդերի արմատները, ուստի նման վնասվածքը դրսևորվում է ոչ միայն պարանոցի ցավով, այլև գլխացավով, գլխապտույտներով ու սրտխառնոցով: Եթե վնասվածքը շատ լուրջ չէ հիվանդը կարող է այն անգամ չնկատել, սակայն խնդիրն այնուամենայնիվ կդրսևորվի պարանոցի անտանելի քրոնիկ ցավերով:

Նյութի աղբյուրը՝ medikforum.ru