Գլխացավի 8 տարածված տեսակ, որոնց մասին պետք է իմանան բոլորը

17:39 • 11.11.19

Գլխացավը բավական տարածված խնդիր է, որին մարդիկ ոչ միշտ են պատշաճ ուշադրություն դարձնում, մինչդեռ մասնագետները նախազգուշացնում են, որ այս խնդիրն ունի մի քանի տեսակ և զարգացման տարբեր պատճառներ, որոնք տարբերելը շատ կարևոր է: Ձեր ուշադրությանն ենք ներկայացնում գլխացավի ամենատարածված տեսակները, որոնց մասին պետք է իմանա յուրաքանչյուրը:

Լարվածության գլխացավ

Առողջապահության համաշխարհային կազմակերպության տվյալներով՝ գլխացավի այս տեսակից ամեն օր տառապում է յուրաքանչյուր քսաներորդ մարդը: Ընդ որում՝ այս խնդիրն առավել հաճախ նկատվում է կանանց մոտ: Այն դրսևորվում է ճակատի շուրջը ճնշման զգացողությամբ և զարգանում է սթրեսի, մարմնի սխալ դիրքի կամ քնի պակասի հետևանքով:

Միգրեն

Միգրենի գլխացավն իր տարածվածությամբ երկրորդն է: Այս դեպքում ցավոտ զգացողություններն առավել հաճախ առաջանում են գլխի միայն մի հատվածում, իսկ որոշ դեպքերում դրանք ուղեկցվում են նաև սրտխառնոցով ու լույսի և ձայների նկատմամբ գերզգայունությամբ:

Գլխացավեր քթի խոռոչների բորբոքման հետևանքով

Քթի խոռոչների բորբոքման հետևանքով առաջացող գլխացավն առավել հաճախ տարածվում է այտոսկրերի ու քթի հատվածում և դրսևորվում մշտական ցավով:

Հորմոնալ գլխացավեր

Գլխացավի այս տեսակն առավել հաճախ առաջանում է կանանց մոտ դաշտանային ցիկլի որոշակի ժամանակահատվածում, հղիության վաղ փուլերում կամ դաշտանադադարի շրջանում: Այս դեպքում ցավը պայմանավորված է լինում օրգանիզմում էստրոգեն հորմոնի մակարդակի անկմամբ, ուստի գլխացավի պատճառ կարող են դառնալ նաև հակաբեղմնավորիչ դեղահաբերի ընդունմամբ պայմանավորված հորմոնալ տատանումները:

Մարսողությամբ պայմանավորված գլխացավեր

Շաքարի և ածխաջերի մարսման հետևաքով ստամոքսում մեծ քանակությամբ գազեր են կուտակվում, որոնք պարունակում են որոշակի քանակությամբ ածխաթթու գազ: Այդ ածխաթթու գազի մակարդակի բարձրացումը կարող է դառնալ գլխի մի հատվածի ցավի պատճառ:

Ֆիզիկական ծանրաբեռնվածությամբ պայմանավորված գլխացավեր

Գլխացավի պատճառ կարող է դառնալ նաև ֆիզիկական ծանրաբեռնվածությունը: Բացի այդ, ֆիզիկական ակտիվությամբ պայմանավորված գլխացավ կարող է համարվել նար հազի կամ փռշտոցի հետևանքով առաջացող ցավը: Սակայն այս դեպքում, որպես կանոն, գլխացավը կարճատև է լինում և շուտ է մեղմվում:

Պարանոցի կամ ծոծրակի ցավեր

Նման ցավերը հաճախ հուշում են արթրիտի, ինչպես նաև գլխի արյունատար անոթների այտուցի և լարվածության մասին:

Ճակատային երկկողմ ցավ

Ցավի այս տեսակը կարող է պայմանավորված լինել հոգնածությամբ կամ աչքերի գերլարվածությամբ:

Մասնագետները նախազգուշացնում են, որ գլխացավերը կարող են շատ ավելի կարևոր ու վտանգավոր նախանշան լինել, ուստի հարկավոր է շատ զգոն լինել: Վերոնշյալ տեսակները տարբերելը շատ կարևոր է, քանի որ գլխացավը կարող է լինել և որևէ վտանգավոր խանգարման մասին հուշող ախտանշան: Հարկ է հիշել, որ ցավազրկող դեղամիջոցները միայն մեղմում են ցավը, մինչդեռ այն ոչ միշտ է պայմանավոված լինում անվնաս խնդրով: Սա է պատճառը, որ հաճախակի ու երկարատև գլխացավերի, ինչպես նաև առավոտյան սաստիկ ցավի դեպքում հարկավոր է շատ զգոն լինել ու անպայման դիմել բժշկին:

Նյութի աղբյուրը՝ medikforum.ru