Գիտնականները նշել են՝ որ ըմպելիքներն են նպաստում զարկերակային ճնշման բարձրացմանը

19:32 • 24.02.21

Զարկերակային բարձր ճնշումը շատ վտանգավոր խնդիր է, որը բարձրացնում է մի շարք լուրջ հիվանդությունների զարգացման հավանականությունը, ուստի զարմանալի չէ, որ մասնագետները հորդորում են վերահսկողության տակ պահել ճնշման ցուցանիշներն ու անմիջապես կարգավորել այն լուրջ տատանումների դեպքում։ Այս ցուցանիշների վրա բացասաբար են անդրադառնում ամենատարբեր գործոնները, սակայն այժմ գիտնականները պարզել են, որ դրանցից մեկը կարող է լինել նաև որոշակի ըմպելիքների գործածությունը։

Գիտնականների անցկացրած նոր հետազոտությունը ցույց է տվել, որ զարկերակային ճնշումը կարող է բարձրանալ որոշ ըմպելիքների չարաշահման հետևանքով։ Մասնագետների խոսքով՝ վտանգավոր կարող են լինել, մասնավորապես, գազավորված ըմպելիքների, կաթնային կոկտեյլների, էներգետիկ ըմպելիքների, սուրճի ու ալկոհոլի գործածությունը, ուստի դրանք հարկավոր է հնարավորինս սահմանափակել։

Հետազոտությանը մասնակցել է միջինում 19 տարեկան 25 առողջ մարդ։ Կամավորներն էներգետիկ ըմպելիքներ են խմել, որից կես ժամ անց գիտնականները նրանցից արյան նմուշներ են վերցրել ու ստուգել են զարկերակային ճնշումը։ Պարզվել է՝ այս ըմպելիքը 6,2 տոկոսով բարձրացրել է սիստոլիկ ճնշումը և 6,8 տոկոսով՝ դիաստոլիկ։

Հետազոտությունը ցույց է տվել, որ զարկերակային ճնշման ցուցանիշների վրա բացասաբար կարող է անդրադառնալ նաև սուրճի գործածությունը, սակայն այս դեպքում նման տատանումները կարող են անհատական բնույթ կրել և ոչ բոլորի մոտ դրսևորվել։

«Պարզելու համար՝ ազդում է արդյոք կոֆեինը զարկերակային ճնշման բարձրացման վրա, հարկավոր է գիտափորձ անցկացնել։ Պարզապես անհրաժեշտ է չափել ճնշումը սուրճ խմելուց առաջ և հետո», - նշում է բժիշկ Շելդոն Շեփսը՝ հավելելով, որ եթե սուրճի ընդունման ֆոնին զարկերակային ճնշումը բարձրանում է 5-10 միավորով, ապա խորհուրդ է տրվում նվազեցնել կոֆեինի գործածությունը։

Գազավորված ըմպելիքների ու քաղցր կոկտեյլների ընդունումից հետո ինքնազգացողության վատթարացում նկատելու դեպքում հարկավոր է նվազեցնել նաև դրանց քանակությունը։ Բանն այն է, որ դրանց մեծ մասը պարունակում է կոֆեին, ինչպես նաև ունի բավական բարձր կալորիականություն։ Նման ըմպելիքների հաճախակի գործածությունը հանգեցնում է մարմնի զանգվածի մեծացման, ինչն էլ կարող է դառնալ զարկերակային գերճնշման զարգացման պատճառ։

Բացի այդ, զարկերակային ճնշման ցուցանիշների վրա բացասաբար կարող է անդրադառնալ նաև ալկոհոլի չարաշահումը։ Հազվադեպ ալկոհոլ օգտագործելու դեպքում այդ բացասական ազդեցությունը չնչին կլինի, սակայն ալկոհոլի կանոնավոր չարաշահումը կարող է հանգեցնել քրոնիկ հիվանդությունների, այդ թվում նաև զարկերակային գերճնշման զարգացման։

Նյութի աղբյուրը՝ actualnews.org