Ինչպես ազատվել ավելորդ քաշից․ հինգ մթերք, որոնք օգնում են նիհարել

Ավելորդ քաշն ու ճարպակալումն այժմ մարդկության մեծագույն խնդիրներից են, քանի որ զգալիորեն բարձրացնում են մի շարք վտանգավոր հիվանդությունների, այդ թվում՝ սրտանոթային համակարգի ախտաբանությունների, շաքարային դիաբետի և անգամ օնկոլոգիական հիվանդությունների զարգացման հավանականությունը, ուստի զարմանալի չէ, որ բժիշկները հորդորում են օր առաջ լուծել այս խնդիրն ու հնարավորինս շուտ կարգի բերել կազմվածքը:

Ավելորդ կիլոգրամներից ազատվելու համար մարդիկ սովորաբար դիմում են մարզիչների ու սննդաբանների մշակած տարատեսակ սննդակարգերի ու մարզումների օգնությանը, սակայն շատ հաճախ դրանք անարդյունավետ են լինում կամ խիստ բացասաբար են անդրադառնում օրգանիզմի վրա, ուստի բժիշկները խորհուրդ են տալիս խուսափել դրանցից՝ նախապատվությունը տալով քաշի նվազեցման ավելի անվնաս միջոցներին։ Նման միջոցներից մեկը կարող է լինել սննդակարգում ախորժակի նվազեցմանը նպաստող սննդամթերքի տեսակների ներառումը, ինչը կօգնի զգալիորեն նվազեցնել օրվա ընթացքում կիրառվող կալորիաների քանակությունը։

Ձեր ուշադրությանն ենք ներկայացնում ախորժակը նվազեցնող հինգ օգտակար մթերք, որոնք սննդակարգում ներառելը կնպաստի քաշի արագ կարգավորմանը, իսկ հավելյալ ջանքեր գործադրելու դեպքում շատ ավելի արդյունավետ կդարձնի դրանք։ Ավելին՝ քաշի նվազեցման այս մեթոդը ոչ միայն արդյունավետ է, այլև չի առաջացնում կողմնակի բարդություններ և բացառապես դրական ազդեցություն է ունենում օրգանիզմի վրա։

Կծու պղպեղ

Կծու սնունդն ախորժակը նվազեցնող բնական միջոց է, որն օգնում է շատ ավելի քիչ ուտել, ուստի սննդակարգում կծու պղպեղ ներառելը կարող է շատ օգտակար լինել։ Նման ազդեցությունը պայմանավորված է այս մթերքի մեջ պարունակվող կապսաիցինով, որն առհասարակ դրական ազդեցություն է ունենում օրգանիզմի վրա։

Թարմ անանուխ

Ախորժակը նվազեցնող հիանալի միջոց է նաև անանուխը։ Ընդ որում՝ արդյունավետ կարող է լինել անգամ անանուխի բույրը, ինչը գիտնականներն ապացուցել են հետազոտությունների արդյունքում։ Հետազոտության մասնակիցները հինգ օր շարունակ յուրաքանչյուր երկու ժամը մեկ հինգ րոպե թարմ անանուխի բույրն են շնչել, որից հետո գիտնականները հաշվել են նրանց օգտագործած կալորիաների քանակությունը։ Արդյունքում անանուխի բույրի շնորհիվ մասնակիցների մոտ նկատվել քաղցի զգացման զգալի նվազում և շաբաթվա ընթացքում նրանք 1800 կալորիա պակաս են օգտագործել։ Սա է պատճառը, որ ավելորդ քաշից ազատվել ցանկացողներին մասնագետները խորհուրդ են տալիս ուտելուց առաջ որոշ ժամանակ վայելել անանուխի հաճելի բույրը։

Չիա սերմեր

Ինչպես մանրաթելերով հարուստ ցանկացած այլ մթերք, այնպես էլ չիա սերմերը հիանալի միջոց են արագ հագենալու և քաղցի զգացումը բթացնելու համար։ Ստամոքսում հայտնվելուց հետո այս մանր սերմերը մեծանում են 10 անգամ՝ արագ հագեցնելով ու երկար ժամանակով ազատելով քաղցի զգացումից, ինչն էլ օգնում է շատ ավելի քիչ սնունդ օգտագործել։ Պարզապես հարկավոր է հավելել չիա սերմերը յոգուրտին կամ վարսակի շիլային՝ ստանալով մեծ քանակությամբ օգտակար նյութեր ու միաժամանակ նպաստելով քաշի նվազմանը։ 

Խնձոր

Խնձորը հարուստ է պեկտինով, լուծվող մանրաթելերով ու ջրով, որոնց շնորհիվ օգնում է արագ հագենալ ու երկար ժամանակով մոռանալ քաղցի զգացման մասին։ Սա է պատճառը, որ ավելորդ քաշի դեմ պայքարողներին մասնագետները խորհուրդ են տալիս կիրառել բավական հին ու արդյունավետ մի մեթոդ, որը ենթադրում է քաղցի զգացման դեպքում խնձորի գործածություն։ Հարկավոր է քաղցած լինելու դեպքում խնձոր ուտել ու մի փոքր սպասել։ Եթե քաղցի զգացումը չանհետանա անգամ որոշ ժամանակ անց, ապա կարելի է սնվել։

Ջուր

Քաշը նվազեցնելու ևս մի պարզ ու արդյունավետ մեթոդ է ուտելուց առաջ մի բաժակ ջուր խմելը։ Ընդ որում՝ ջուրը, որը ցանկալի է լինի շատ սառը, հարկավոր է խմել դանդաղ ու փոքր կումերով։ Այս դեպքում օրգանիզմն ստիպված է լինելու հավելյալ կալորիաներ վատնել ջրի ջերմաստիճանը մարմնի ջերմաստիճանին հավասարեցնելու համար, ուստի օգտագործած սննդից ստացված կալորիաների մեծ մասը կվերածվի էներգիայի և չի կուտակվի ճարպաշերտերի տեսքով։

Նյութի աղբյուրը՝ healthinfo.ua