Ինչպես ազատվել բշտիկներից ու կորյակներից․ 8 արդյունավետ ժողովրդական միջոց

15:40 • 27.03.21

Բշտիկներն ու կորյակներն սովորաբար ասոցացվում են դեռահասության շրջանի և հորմոնալ տատանումների հետ, սակայն խնդիրն այն է, որ դրանց առաջացումը որևէ կապ չունի տարիքի հետ, ուստի նման խնդիրներ կարող են առաջանալ յուրաքանչյուրի մաշկին ՝ դառնալով շատ տհաճ «անակնկալ»: Մաշկային այս խնդրի առաջացումը կարող է պայմանավորված լինել տարբեր գործոններով, այդ թվում նաև սթրեսով, սխալ սննդակարգով ու գենետիկ նախատրամադրվածությամբ, ուստի դրանց առկայությունը պետք չէ կապել բացառապես հորմոնալ տատանումների հետ։

Մաշկային նմանատիպ խնդիրներից միայն խնամքի միջոցների օգնությամբ ազատվելը երբեմն բավական դժվար է լինում, իսկ համապատասխան դեղամիջոցները հաճախ նաև մի շարք կողմնակի բարդություններ են առաջացնում՝ էլ ավելի վատթարացնելով մաշկի վիճակը, սակայն բնությունը, բարեբախտաբար, մարդկությանը տվել է անհրաժեշտ բոլոր բաղադրիչները տարատեսակ բորբոքումներից ազատվելու և առողջ, հարթ ու գեղեցիկ մաշկ ունենալու համար։ Այս բնական միջոցները բաղկացած են միայն բնական բաղադրիչներից, ուստի ոչ միայն արդյունավետ են ու հասանելի, այլև չեն առաջացնում որևէ կողմնակի բարդություն։

Aif.ru կայքը ներկայացրել է լավագույն ժողովրդական դեղամիջոցները, որոնք կօգնեն հեշտությամբ ազատվել բշտիկներից ու մաշկային նմանատիպ այլ խնդիրներից:

Դդմի պտղամիսը քերիչով մանրացնել, ստացված խյուսը դնել բորբոքված հատվածներին, թողնել 15 րոպե, այնուհետև լվացվել։
Քերիչով մանրացրած կարտոֆիլը հաստ շերտով բամբակյա անձեռոցիկին, դնել այն ախտահարված հատվածներին ու թողնել 20-30 րոպե։
1 ճաշի գդալ վաղենակի չորացրած ծաղիկներին ավելացնել մի բաժակ եռման ջուր, թրմել մինչև հեղուկը սառչի, այնուհետև քամել և ստացված թուրմն օգտագործել ախտահարված հատվածներին թրջոցներ դնելու համար։
1 միջին չափի վարունգը քերիչով մանրացնել, ավելացնել մի քանի կաթիլ կիտրոնի հյութ ու խառնել։ Ստացված զանգվածը քսել դեմքին ու թողնել 15 րոպե։
1 ճաշի գդալ դեղատնային երիցուկի չորացրած ծաղիկներին ավելացնել մի բաժակ եռման ջուր, թրմել մինչև հեղուկը սառչի, այնուհետև քամել և ստացված թուրմն օգտագործել որպես լոսյոն։
1 ճաշի գդալ բանանի խյուսին ավելացնել 1 ճաշի գդալ մեղր, լավ խառնել ու քսել դեմքին։ Թողնել դիմակը 15 րոպե, որից հետո լվացվել։
½ վարունգը քերիչով մանրացնել, ավելացնել մի բաժակ եռման ջուր ու թրմել 15 րոպե։ Ստացված թուրմը քամել, ավելացնել մի քանի կաթիլ կիտրոնի հյութ ու օգտագործել որպես լոսյոն։
1 ճաշի գդալ վարսակը սրճաղացով մանրացնել, ավելացնել 1 ձվի սպիտակուց ու լավ խառնել։ Ստացված խյուսը քսել բշտիկներին, թողնել դիմակը չորանա, այնուհետև լվացվել։

Այս պարզ բնական միջոցները կարող են շատ արդյունավետ լինել, սակայն հարկ է հիշել, որ բշտիկները ոչ միշտ են լինում զուտ կոսմետիկ խնդիր և կարող են պայմանավորված լինել առողջական որոշակի խնդիրներով, ուստի մինչ դրանց դեմ պայքարելը հարկավոր է նախ բուժզննում անցնել ու բացառել վտանգավոր հիվանդությունները։ Հարկ է հիշել, որ ինքնաբուժությունը կարող է շատ տհաճ հետևանքներ ունենալ, ուստի առաջին հերթին հարկավոր է դիմել մաշկաբանին: Լուրջ խնդիրների դեպքում միայն փորձառու մասնագետը կկարողանա պարզել մաշկային խնդիրներից առաջացման պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru