Ինչպես վերահսկողության տակ պահել քաշի նվազման գործընթացը

Ավելորդ քաշը բավական տարածված խնդիր է, որի դեմ պայքարում են միլիոնավոր մարդիկ։ Ընդ որում՝ նիհարել ցանկացողները որպես կանոն միշտ հետևում են այդ գործընթացին՝ առաջին հերթին հետևելով քաշի տատանումներին, մինչդեռ մասնագետները հորդորում են խուսափել այդ մեթոդից, քանի որ այն կարող է ոչ միայն անարդյունավետ լինել, այլև վնասակար։

Ինչպես նշել է ֆիթնես-մարզիչ ու սննդաբան Եկատերինա Մեդուշկինան իր ինստագրամյան էջում, շատերը հաշվի չեն առնում, որ անգամ կայուն քաշի դեպքում մարդու կազմվածքը կարող է զգալի փոփոխությունների ենթարկվել, ուստի միայն քաշի տատանումներին հետևելն արդյունավետ մեթոդ չէ այդ գործընթացը վերահսկողության տակ պահելու համար։

Մասնագետի խոսքով՝ շատերը չեն կարողանում ճիշտ գնահատել իրենց արդյունքները, քանի որ ուշադրություն են դարձնում միայն մի ցուցանիշին՝ քաշին՝ կշռվելով օրական երկու անգամ, սակայն նման մոտեցումը կարող է հիասթափեցնող լինել։ Բանն այն է, որ նման դեպքերում քաշը կարող է պարբերաբար տատանվել, ինչի հետևանքով արտաքին դրական փոփոխությունները կանտեսվեն։ Նման խնդիրներից խուսափելու համար Մեդուշկինան խորհուրդ է տալիս հետևել երեք պարզ քայլի, որոնք թույլ կտան վերահսկողության տակ պահել քաշի նվազեցման գործընթացն ու խուսափել հիասթափություններից։

Ճիշտ կշռվել

Մասնագետի խոսքով՝ հարկավոր է կշռվել շաբաթական միայն մեկ անգամ, առավոտյան և դատարկ ստամոքսին։ Ընդ որում՝ հարկավոր է օր ու ժամ որոշել և միշտ կշռվել շաբաթվա այդ օրերին ու միևնույն ժամին։ Հարկ է հիշել, որ դրական արդյունքի հասնելու և օրգանիզմին վնաս չհասցնելու համար քաշը շաբաթական պետք է նվազի 500-700 գրամով կամ ընթացիկ քաշի 0,5–1 տոկոսով։

Կանոնավոր չափումներ անել

Ավելորդ քաշի դեմ պայքարում արդյունքի հասնելու համար հարկավոր է անպայման կանոնավոր չափումներ անել ու գրանցել մարմնի տարբեր հատվածների չափորոշիչները։ Ընդ որում՝ չափումները հարկավոր է անել շաբաթական մեկ անգամ, միևնույն հատվածներում։

Հիմնական չափորոշիչներն են կրծքի, գոտկատեղի և ազդրերի չափերը, սակայն ոչ պակաս կարևոր է նաև ձեռքերն ու ոտքերը (և՛ աջ, և՛ ձախ), կրծքից անմիջապես ներքև գտնվող հատվածն ու պորտի հատվածը չափելը։ 

Այս չափումները թույլ են տալիս հստակ տեսնել կազմվածքի փոփոխության գործընթացի, մինչդեռ քաշը կարող է անփոփոխ մնալ։ Սա պայմանավորված է նրանով, որ ճարպային հյուսվածքներն ավելի թեթև են, սակայն ծավալով ավելի մեծ, մինչդեռ մկանային հյուսվածքները կարող են ավելի փոքր ծավալ ունենալ, բայց ավելի շատ կշռել։ Սա է պատճառը, որ հաճախ անգամ ճարպից ազատվելու դեպքում քաշը շարունակում է նույնը մնալ։

Լուսանկարվել

Ֆիթնես-փորձագետի խոսքով՝ լուսանկարը լավագույն միջոցն է երկարատև ջանքերի արյունքները համեմատելու և ակնհայտ տարբերությունը տեսնելու համար, ուստի ավելորդ քաշի դեմ պայքարում հարկավոր է կանոնավոր լուսանկարվել։ Լուսանկարը պետք է արվի լավ լուսավորության պայմաններում, միայն ներքնաշորով և շաբաթական մեկ անգամ։ Ընդ որում՝ լուսանկարները պետք է լինեն երեք դիտանկյունից` կիսադեմ, անֆաս և մեջքից։ Ավելին՝ շատ ավելի մանրակրկիտ վերլուծության համար կարելի է նաև լուսանկարել խնդրահարույց հատվածները։