Ամենաարդյունավետ բնական միջոցները գլխացավն առանց դեղորայքի մեղմելու համար․ 8 բաղադրատոմս

Գլխացավերն ու միգրենն ամենատարածված խնդիրներից են, որոնք կարող են պայմանավորված լինել ամենատարբեր պատճառներով, այդ թվում՝ սթրեսով, հոգնածությամբ, առողջական որոշակի խնդիրներով և այլն։ Նման տհաճ զգացողությունները կարող են խիստ բացասաբար անդրադառնալ մարդու կյանքի որակի վրա, ուստի զարմանալի չէ, որ մարդիկ փորձում են հնարավորինս շուտ ազատվել ցավից։ 

Գլխացավերը մեղմելու համար մարդիկ սովորաբար ցավազրկող դեղամիջոցներ են ընդունում, սակայն լինում են դեպքեր, երբ ցավը կտրուկ է ի հայտ գալիս, իսկ ցավազրկող միջոց ձեռքի տակ չի լինում։ Բացի այդ, շատերը պարզապես խուսափում են ցավազրկողներից, քանի որ դրանք բավական լուրջ կողմնակի բարդություններ են առաջացնում, իսկ հաճախակի գործածության դեպքում կարող են անգամ դադարել օգնել։ Նման դեպքերում օգնության են հասնում փորձված բնական միջոցները, որոնք օգնում են շատ արագ մեղմել ցավն ու կանխել խնդրի կրկնությունը։ 

Ձեր ուշադրությանն ենք ներկայացնում ամենաարդյունավետ ու հասանելի բնական միջոցները, որոնք կօգնեն հեշտությամբ մեղմել ցավն ու խուսափել դեղամիջոցների գործածությունից։

• 1 ճաշի գդալ չորացրած հազրեվարդի տերևներին ավելացնել 1 բաժակ եռման ջուր, ծածկել տարան ու թրմել 10 րոպե, այնուհետև ստացված թուրմը քամել ու խմել։
• Խառնել հավասար քանակությամբ երիցուկի մանրացրած ծաղիկները, անանուխի տերևները, հոռոմ-սամիթի պտուղներն ու կատվախոտի արմատը, այնուհետև խառնուրդի 2 ճաշի գդալը լցնել թերմոսի մեջ, ավելացնել կես լիտր եռման ջուր ու թրմել ամբողջ գիշեր։ Ստացված թուրմը հարկավոր է խմել օրվա ընթացքում որպես թեյ։
• 2 ճաշի գդալ լորենու չորացրած ծաղիկներին ավելացնել 2 բաժակ եռման ջուր, 10 րոպե եփել թույլ կրակին, այնուհետև ստացված թուրմը  խմել օրական 4 անգամ ½ բաժակ։
• Խառնել 20-ական գրամ լվածաղկի ծաղիկները, լորենու ծաղիկներն ու պատրինջի տերևները, այնուհետև խառնուրդի 2 ճաշի գդալին ավելացնել կես լիտր եռման ջուր ու թրմել մեկ ժամ։ Քամել թուրմը, բաժանել երկու մասի, որոնցից մեկը խմել ուտելուց երկու ժամ անց, իսկ մյուսը՝ քնելուց առաջ։
• 1 ճաշի գդալ չորացրած խնկածաղկին ավելացնել 300 մլ եռման ջուր, 1 ժամ թրմել որևէ տաք տեղում, այնուհետև քամել և ընդունել օրական 3 անգամ ½ բաժակ։
• 1 ճաշի գդալ չորացրած սրոհունդին ավելացնել մի բաժակ ջուր, 10 րոպե եռացնել թույլ կրակին, այնուհետև թրմել ևս 30 րոպե և քամել։ Ստացված թուրմն ընդունել օրական 3 անգամ ¼ բաժակ։
• 1 ճաշի գդալ չորացրած ու մանրացրած կապույտ տերեփուկի ծաղիկներին ավելացնել մի բաժակ եռման ջուր, 2 ժամ թրմել, այնուհետև քամել և ընդունել օրական 3-4 անգամ ուտելուց առաջ ⅓ բաժակ։
• 2:1 հարաբերակցությամբ խառնել մանրացրած խնկածաղիկն ու սրոհունդը, այնուհետև ստացված խառնուրդի 1 ճաշի գդալին ավելացնել 1 բաժակ եռման ջուր ու թրմել 1 ժամ։ Թուրմը համեմել կիտրոնի կեղևի քերուկով կամ դարչնով (ըստ ճաշակի) և խմել տաք վիճակում ուտելուց 30 րոպե առաջ ⅓ բաժակ։

Այս պարզ բնական միջոցները կարող են շատ արդյունավետ լինել, սակայն հարկ է հիշել, որ որոշ դեպքերում գլխացավը կարող է պայմանավորված լինել առողջական որոշակի խնդիրներով, ուստի մինչ դրանց դեմ պայքարելը հարկավոր է նախ բուժզննում անցնել ու բացառել վտանգավոր հիվանդությունները։ Բացի այդ, հարկ է հիշել, որ նման բնական միջոցներն ունենում են որոշակի հակացուցումներ և ինքնաբուժությունը կարող է շատ տհաճ հետևանքներ ունենալ, ուստի առաջին հերթին հարկավոր է դիմել բժշկին: Լուրջ խնդիրների դեպքում միայն փորձառու մասնագետը կկարողանա պարզել գլխացավերի առաջացման պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru