3 տարածված ախտանշան, որոնք հուշում են օրգանիզմում վիտամին D-ի դեֆիցիտի մասին

14:06 • 24.07.21

Վիտամին D-ն մարդու օրգանիզմի համար կենսական նշանակություն ունեցող սննդարար նյութերից մեկն է, որը սինթեզվում է օրգանիզմում արևի ճառագայթների տակ կամ ընդունվում սննդամթերքի որոշ տեսակների կամ վիտամինային հավելումների տեսքով։ Օրգանիզմում այս կարևոր տարրի բավարար մակարդակն օգնում է պաշտպանվել մի շարք վտանգավոր հիվանդությունների զարգացումից ու բարձրացնում է օրգանիզմի դիմադրողականությունը, մինչդեռ դրա դեֆիցիտը կարող է բավական լուրջ խնդիրների պատճառ դառնալ և սովորաբար ուղեկցվում է մի շարք տհաճ ախտանշաններով։

Nutrition Research պարբերականը հրապարակել է մի նոր հետազոտության զեկույցը, որի հեղինակները պնդում են, որ վիտամին D-ի դեֆիցիտն իրականում շատ ավելի տարածված խնդիր է, քան շատերն են կարծում: Գիտնականների հաշվարկների համաձայն՝ այս խնդրին բախվում է մոլորակի հասուն բնակչության 40 տոկոսը, մինչդեռ այս տարրը ոչ միայն բարելավում է իմունային համակարգի աշխատանքը, այլև կարգավորում է արյան մեջ կալցիումի մակարդակը, որը կենսական նշանակություն ունի ոսկորների առողջության համար: Սա է պատճառը, որ դրա մակարդակին հետևելն իրականում այդքան կարևոր է:

Գիտնականների խոսքով՝ այս կարևոր վիտամինի դեֆիցիտը դրսևորվում է տարբեր ախտանշաններով, սակայն դրանց շարքում առանձնանում են երեքը, որոնք ոչ մի դեպքում չի կարելի անուշադրության մատնել: Ձեր ուշադրությանն ենք ներկայացնում այդ ախտանշանները:

Հոգնածություն

Համաձայն Medicine պարբերականի հրապարակած տվյալների՝ վիտամին D-ի դեֆիցիտը հանգեցնում է մշտական հոգնածության, թուլության, գլխացավերի ու անգամ ընկճախտի զարգացման: Սա պայմանավորված է նրանով, որ այն օրգանիզմում կատարում է բազմաթիվ հորմոնների կենտրոնական կարգավորիչի դեր, ուստի զարմանալի չէ, որ այս տարրի դեֆիցիտը հանգեցնում է նման հետևանքների:

Ոսկրային ցավեր

Musculoskeletal Medicine պարբերականի հաղորդմամբ՝ այս վիտամինը շատ կարևոր դեր է խաղում կմախքի վիճակի հարցում, իսկ դրա դեֆիցիտը հանգեցնում է ոսկրային զանգվածի նվազման ու օստեոպորոզի և ոսկորները թուլացնող այլ հիվանդությունների զարգացման: Սա է պատճառը, որ ոսկորների արտասովոր ցավերի դեպքում հարկավոր է անպայման ստուգել օրգանիզմում վիտամին D-ի մակարդակը:

Մկանային սպազմներ

Վերոնշյալ ախտանշաններից բացի չի կարելի անտեսել նաև մկանային սպազմները: Գիտնականները պարզել են, որ այս տարրը շատ կարևոր է նաև մկանների լավ վիճակի պահպանման համար, մինչդեռ դրա պակասը հանգեցնում է ցավոտ զգացողությունների, սպազմների, մկանային թուլության ու հաճախակի վնասվածքների (ընկնելու հետևանքով):