Դեմքի կոնտուրային պլաստիկայից մինչև կրծքերի ծավալի փոփոխություն․ պլաստիկ վիրաբույժը՝ ժամանակակից թրենդների մասին (լուսանկարներ)

Դեմքի կոնտուրային պլաստիկա, կոպերի պլաստիկա, կրծքերի և մարմնի էսթետիկ վիրաբուժություն․ սրանք «ԴԱ ՎԻՆՉԻ ԿԼԻՆԻԿԱ» բժշկական կենտրոնի պլաստիկ վիրաբույժ Նարեկ Հովհաննիսյանի գործունեության հիմնական ուղղություններն են։

Tert.am Med-ը բժշկի հետ զրուցել է պլաստիկ վիրաբուժության ժամանակակից թրենդների մասին։

 - Որոնք են այսօր ամենապահանջված միջամտությունները, որոնց համար ամենահաճախն են Ձեզ դիմում:

 - Վերջին շրջանում աճել է դեմքի կոնտուրային պլաստիկա անել ցանկացողների թիվը, մեծ է նաև կրծքերի վիրահատությունների պահանջարկը։ Ինչպես գիտեք, Հայաստանում առաջնային պահանջարկ ունի քթի վիրահատությունը, հիմա դրան նաև ավելացել է կրծքի ծավալի փոփոխությունը։ Այսօր բազմաթիվ են այն կանայք, որոնք մինչև մայրանալն են դիմում կրծքերի մեծացման համար․ սա պայմանավորված է այն հանգամանքով, որ ինֆորմացիան դարձել է ավելի հասանելի, նրանք գիտակցում են, որ այդ վիրահատությունները առողջության վրա որևէ բացասական ազդեցություն չեն ունենալու։

 - Խոսեցիք դեմքի կոնտուրային պլաստիկայի մասին: Տարիքի հետ դեմքի վրա հայտնվող անհարթությունները, կնճիռներն ու դեմքի օվալի փոփոխությունը շատ կանանց մոտ տագնապ է առաջացնում: Առհասարակ ե՞րբ է պետք սկսել որոշակի շտկումներ անել։

- Բոտոքսի պարագայում արդյունավետ է, երբ պրոցեդուրան կատարում ենք նախնական փուլում, այսինքն՝ այն ժամանակ, երբ, օրինակ, կնճիռը նոր է սկսում ի հայտ գալ կամ կա գենետիկ հակում։ Ունեմ պացիենտներ, որոնք դիմել են երիտասարդ տարիքից: Այս պարագայում կնճիռները դեռևս ձևավորված չեն լինում, մենք կատարում ենք պրոցեդուրան և կանխում հետագա կնճիռների հայտնվելը։ Խորհուրդ եմ տալիս դիմել մասնագետի այն ժամանակ, երբ արդեն նկատելի են դառնում միմիկական մանր կնճիռները։

- Վերջին շրջանում նաև պահանջարկ է վայելում բլեֆարոպլաստիկան (կոպերի վիրահատություն), ի՞նչ է իրենից ենթադրում այդ միջամտությունը։

- Այո, Դուք ճիշտ եք: Բլեֆարոպլաստիկան վիրահատական միջամտություն է, որի ժամանակ վերին և ստորին կոպերից հեռացվում են ճարպային ճողվածքներն ու ավելորդ մաշկը։ Այս միջամտությամբ հնարավոր է նաև փոփոխել աչքի ձևը, եթե դրա կարիքը կա։

Կոպերի վիրահատությունն օգնում է մարդու դեմքը, հայացքը երիտասարդացնել։ Գուցե մարդն ունենա բարակ շրթունքներ կամ թեթևակի արտահայտված քիթ-շրթունքային ծալքեր, բայց աչքերի շուրջ խնդիրներն ամենաերևացողն են, քանի որ մարդու հետ խոսելիս նայում ես ուղիղ աչքերին, դա ամենաերևացող մասն է։ Այնպես որ խորհուրդ եմ տալիս կանանց, ինչու ոչ նաև տղամարդկանց,անհրաժեշտության դեպքում կատարել  կոպերի վիրահատություն։

- Կա՞ որևէ տարիքային սահմանափակում այս միջամտության համար։

- Հիմնականում դիմում են 40 և ավելի տարիք ունեցող պացիենտները, քանի որ մեծամասամբ կոպերի վիրահատության կարիքը լինում է հենց այդ տարիքում։

- Այնուամենայնիվ ցանկության դեպքում ավելի երիտասարդները կարո՞ղ են դիմել այս միջամտությանը։

- Ինչպես ասացի, սովորաբար այս վիրահատության համար դիմում են տարիքով ավելի մեծ մարդիկ, բայց կան դեպքեր, երբ նման խնդիր առաջանում է վաղ տարիքում։

Մենք ունեցել ենք 18-19 տարեկան պացիենտ, որը, գենետիկ գործոնով պայմանավորված, աչքերի շրջանում ունեցել է արտահայտված ճարպային ավելցուկներ, որոնք պետք էր վիրահատել: Բայց այդ տարիքում, երբ արտահայտված մաշկի ավելցուկ չկա, այլ առկա է միայն հարակնային ճարպի զգալի ավելցուկ, ես խորհուրդ եմ տալիս տրանսկոնյուկտիվ բլեֆարոպլաստիկա անել:

- Խնդրում եմ մի քիչ մանրամասնել՝ ի՞նչ է տրանսկոնյուկտիվ բլեֆարոպլաստիկան։

- Տրանսկոնյուկտիվ բլեֆարոպլաստիկան դա մի մի մեթոդ է, երբ վիրահատությունը կատարվում է առանց մաշի վրա կատարվող կտրվածքների, որի հոտևանքով մաշկի վրա սպի չի լինում։ Գործողության ժամանակ ավելցուկ ճարպային պարկերը հեռացվում են կոնյուկտիվայի վրա արված փոքր անցքերի միջոցով։

- Ինչքա՞ն է տևում այս միջամտությունների հետվիրահատական շրջանը։

- Եթե իրականացվում է կլասիկ բլեֆարոպլաստիկա, ապա մենք բաժանում ենք հետվիրահատական 2 շրջան՝ մինչև կարերը քանդելը և դրանից հետո։ Վիրահատությունից հետո՝ 4-րդ օրվանից սկսած, երբ եռացվում են կարերը, պացիենտը կարող է վերադառնալ իր բնականոն կյանքին: Վիրահատությունները երկու դեպքում էլ կատարվում են տեղային անզգայացմամբ, բայց եթե պացիենտը ցանկություն ունի ընդհանուր անզգայացման, կամքն իրենն է. անում ենք: