Չինաստանում բուբոնային ժանտախտով վարակման դեպք է գրանցվել

Չինաստանի Նինսյա-Հուեյ ինքնավար մարզի Ինչուան քաղաքային շրջանում բուբոնային ժանտախտով վարակման դեպք է գրանցվել։ Այս մասին հաղորդում է Սինհուա գործակալությունը՝ հղում անելով ժանտախտի դեմ պայքարի ու կանխարգելման տարածաշրջանային շտաբին։

Գործակալության տվյալներով՝ հիվանդը 45-ամյա շանհայցի տղամարդ է, որը զբաղում է անասնապահությամբ և վերջերս է Ինչուան վերադարձել Ներքին Մոնղոլիա ինքնավար մարզից։ Հիվանդության առաջին ախտանշանները (տենդ, հոգնածություն, գիտակցության կորուստ) նրա մոտ ի հայտ են եկել հուլիսի 12-ին, իսկ հաջորդ օրը նա արդեն դիմել բժշկին։ Հուլիսի 19-ին նրա մոտ բուբոնային ժանտախտ ախտորոշումը հաստատվել է։

Վարակման դեպքի հաստատումից հետո Նինսյա-Հուեյ ինքնավար մարզի իշխանությունները սահմանել են համաճարակաբանական սպառնալիքին արձագանքման չորրորդ մակարդակ։ Նշվում է, որ սա հակահամաճարակային միջոցառումների չորս մակարդակներից ամենացածրն է և ենթադրում է միայն վարակվածի լիարժեք մեկուսացում մինչև ապաքինումն ու համաճարակաբանական իրավիճակի վերահսկողություն։

Բուբոնային ժանտախտը ժանտախտի երեք տեսակներից մեկն է, որի հարուցիչը Yersinia pestis բակտերիան է։ Բակտերիայի՝ օրգանիզմ թափանցելուց 1-7 օր հետո զարգանում են գրիպանման ախտանշաններ, այդ թվում՝ ջերմություն, գլխացավեր և փսխում։ Ընդ որում՝ ախտանշաններն ի հայտ են գալիս կտրուկ։ Հիվանդությունը դրսևորվում է նաև ավշային հանգույցների այտուցներով ու ցավով, իսկ երբեմն այտուցված ավշային հանգույցները կարող են բացվել։ Մյուս ախտանշանների շարքին են դասվում ընդհանուր թուլությունն ու հոգնածությունը, դողը, մկանացավը, ցնցումներն ու անգամ ծայրանդամների փտախտը։ 

Ժամանակին միջոցներ չձեռնարկելու դեպքում հիվանդությունը կարող է հանգեցնել կոմայի կամ անգամ մահվան։ Բուբոնային ժանտախտի ժամանակ բուժում ստացած դեպքերում մահացությունը կազմում է 1-15%, իսկ բուժում չստացած դեպքերում ՝ 40-60%։