Ծերուկ Վլադից ներողություն կխնդրեմ 2023 թվականից ոչ շուտ. Պուտինին «մարդասպան» անվանած հաղորդավարի արձագանքը

Ամերիկյան Fox News հեռուստաալիքի հաղորդավար Բիլ О'Ռեյլին, որն ԱՄՆ նախագահ Դոնալդ Թրամփի հետ հարցազրույցի ժամանակ Ռուսաստանի Դաշնության ղեկավար Վլադիմիր Պուտինին «մարդասպան» էր անվանել, արձագանքել է Կրեմլի՝ ներողություն խնդրելու պահանջին:

«Պուտինի վարչակազմը պահանջում է, որ ես՝ ձեր խոնարհ լրագրողս, ներողություն հայտնեմ ծերուկ Վլադին մարդասպան կոչելու համար: Ուստի՝ ես արդեն սկսել եմ աշխատել այդ ներողության վրա, բայց դա կարող է մի որոշ ժամանակ տևել: Կարող եք այդ հարցով ինձ դիմել 2023թ. կողմերը»,-О'Ռեյլիի խոսքերը մեջբերում է The Washinghton Post-ը: 

Հիշեցնենք, որ Կրեմլը պահանջել էր ամերիկյան Fox News հեռուստաալիքից ներողություն խնդրել նախագահ Պուտինին «մարդասպան» անվանելու համար՝ նկատելով, որ հաղորդավար Բիլ Օ'Ռեյլիի տվյալ մեկնաբանությունն ուղղակի անընդունելի է:

«Մենք համարում ենք, որ Fox TV-ից նման մեկնաբնություններ լսելն ուղղակի անընդունելի է ու վիրավորական, և, ճիշտն ասած, ուզում ենք, որ նրանք ներողություն խնդրեն»,-ասել էր Պուտինի խոսնակ Դմիտրի Պեսկովը:

Ինչպես ավելի վաղ հայտնել էր Tert.am-ը, Fox News-ին տված հարցազրույցի ժամանակ ԱՄՆ նախագահ Դոնալդ Թրամփն ասել էր, որ հարգում է Պուտինին, ինչից հետո Օ'Ռեյլին ՌԴ ղեկավարին «մարդասպան» էր անվանել:

«Մարդասպանները շատ են: Մեզ մոտ էլ կան բազմաթիվ մարդասպաններ: Կարծում եք՝ մեր երկիրն այդքան անմե՞ղ է»,-հաղորդավարին հակադարձել էր Թրամփը: