Եղանակն՝ այսօր
Մենք ունենք քաղաքական կամք ու կարողություն այլևս գծատերեր չունենալու. փոխքաղաքապետ
Երևան քաղաքի հասարակական տրանսպորտի բարեփոխումների ծրագրի աշխատանքային խմբի ղեկավար Վահե Նիկոյանն այսօր հայտարարեց, թե քաղաքային տրանսպորտի բարեկարգման հիմնական շեշտադրումներից մեկն այն է, որ այլևս գծատերեր չլինեն:
Tert.am-ը Նիկոյանից հետաքրքրվեց՝ պատրա՞ստ են գծատերերի դժգոհություններին՝ հաշվի առնելով այն, որ որոշ ժամանակ առաջ արդեն իսկ որոշ երթուղիներ շահագործողներ դժգոհել էին: Վահե Նիկոյանն ի պատասխան հայտարարեց, որ եթե այսօր հայտարարում են, որ գծատերերի բացառումն իրենց համար սկզբունքային է, նշանակում է, որ ունեն քաղաքական կամք ու կարողություն այն իրագործելու:
«Մեր նոր համակարգում պետք է ներգրավված լինեն ոչ թե գծատերերը կամ մարդիկ, այլ պետք է ներառված լինեն չափորոշիչներ և մեխանիզմներ: Այս առումով՝ մարդկանց ներառելու խնդիր մենք մեր առաջ չեն դրել»,- ասաց նա:
Մեր մյուս հարցին՝ ի վերջո կյանքի կկոչվի՞ էլեկտրոնային չվացուցակների ծրագիրը, քաղաքապետի տեղակալը պատասխանեց՝ նշելով, թե ինքն անձամբ շատ կարևորում է այդ հարցը և այն, անպայման, իրականություն կդառնա:
«Հասկանալով, որ օպտիմալացմամբ երթուղային ցանցն ամբողջությամբ փոխելու է երթուղիները, մենք մեծ աշխատանք ունենք իրականացնելու այս ոլորտում: Նոր երթուղային ցանցը պետք է ունենա ոչ միայն կանգառներում էլեկտրոնային չվացուցակներ, այլև խնդիր կա նոր ծրագրային ապահովումներով հասանելի դարձնել դրանք նաև հեռախոսներով: Մենք հասկանում ենք, որ այս համակարգը երկար տարիներ չի փոխվել, և նոր մոտեցումները պետք է ամբողջությամբ ընկալելի լինեն հասարակության համար: Յուրաքանչյուրն իր երթևեկությունը պլանավորելու համար պետք է կարողանա բոլոր հնարավոր միջոցներով տեղեկատվություն ստանալ ավտոբուսների կայանելու և այլնի վերաբերյալ»,- շարունակեց Վահե Նիկոյանը:
Քաղաքապետի տեղակալը չբացառեց, որ քաղաքում տեղից տեղ շարժվելու համար ավտոբուսի փոփոխության կարիք լինի: Նրա գնահատմամբ՝ մարդը հնարավորություն է ունենալու պլանավորել իր ամբողջ երթևեկությունը:
Studio One