Ակտիվիստ Արտակ Խաչատրյանին առևանգելու դեպքի առթիվ հարուցվել է քրեական գործ

Երեւանի քննչական վարչության Կենտրոն եւ Նորք մարաշ վարչական շրջանների քննչական բաժնում հարուցվել է քրեական գործ` Երեւանի բնակիչ Արտակ Խաչատրյանին առեւանգելու դեպքի առթիվ, տեղեկացնում է Քննչական կոմիտեն:

«Ահազանգի հիման վրա նախապատրաստված նյութերով պարզվել է, որ 2015թ. փետրվարի 7-ին՝ ժամը 12:00-ի սահմաններում, մի խումբ անձինք, բռնության գործադրմամբ, Երևան քաղաքի Տոլստոյ փողոցում գտնվող «Ծղոտներ» ժամանցային կենտրոնի մոտակայքից առևանգել են Արտակ Խաչատրյանին:

Նկատի ունենալով, որ նյութերում առկա են քրեական գործ հարուցելու օրինական առիթ` քննիչի կողմից քրեական գործ է հարուցվել՝ ՀՀ քրեական օրենսգրքի 131-րդ հոդվածի 2-րդ մասի 1-ին կետով:

Ձեռնարկվում են անհրաժեշտ քննչական եւ օպերատիվ-որոնողական միջոցառումները՝ դեպքի բոլոր հանգամանքները պարզելու, առերեւույթ հանցանք կատարած անձանց ինքնությունը եւ շրջանակը պարզելու ուղղությամբ»,– ասվում է Քննչական կոմիտեի տարածած հաղորդագրությունում:

Նշենք, որ «Կասեցում» շարժման ակտիվիստ Արտակ Խաչատրյանը քանիցս մասնակցել է «Շրջանառության հարկի մասին» ՀՀ օրենքում փոփոխությունների դեմ բողոքի ակցիաներին։ Փետրվարի 7-ին առևանգումից հետո նրան գտել էին ծեծված վիճակում և հոսպիտալացվել։ Նրա եղբայրը լրատվամիջոցներին տեղեկացրել էր, որ Արտակ Խաչատրյանի կյանքին վտանգ չի սպառնում։