«Իսլամական պետության» դրոշները հայտնվել են Պալմիրայի հնագիտական համալիրում

13:43 • 21.05.15

«Իսլամական պետություն» ծայրահեղական խմբավորման դրոշներն արդեն հայտնվել են Սիրիայի Պալմիրա քաղաքի հնագիտական համալիրի վրա, որտեղ գտնվում են բացառիկ հնագույն ավերակներ։ Մինչ օրս պահպանված հռոմեական փողոցների, հայտնի կամարի և սյունաշարքերի, ամֆիթատրոնի, Յուպիտերի տաճարի և նեկրոպոլիսի ոչնչացման սպառնալիքն արդեն իսկ իրականություն է դարձել, գրում է ՏԱՍՍ գործակալությունը։

 

Լույս հինգշաբթի սիրիական զորքերը լքել էին վերջին 3 հենակետերը, որոնք գտնվում էին իրենց ձեռքում Պալմիրայի շրջանում՝ Դամասկոսից 240 կմ հեռավորության վրա։ Ինչպես հայտնում է Skynews Arabiya ալիքը՝ ԻՊ-ի գրոհայիններին հաջողվել է գրավել օդանավակայանը, բանտը և անվտանգության ուժերի շտաբը։

 

Մինչդեռ՝ սիրիացի զինվորները շարունակում են վերահսկել Հոմս, Դամասկոս և Բաղդադ տանող մայրուղին։

 

Այն մասին, որ Պալմիրային կարող է սպառնալ ասորական Նիմրուդ քաղաքի և Իրաքի Մոսուլի թանգարանի ճակատագիրը, զգուշացրել է Թանգարանների և հնությունների վարչության ղեկավար Մամուն Աբդել Քերիմը։ Նա դիմել է երկրի զինված ուժերի հրամանատարությանը և միջազգային հանրությանը՝ կոչ անելով պաշտպանել «Սիրիական անապատի մարգարիտը»։ Նրա խոսքով՝ «անտիկ Պալմիրայի պատերի մոտ պայքար է ընթանում քաղաքակրթության և բարբարոսության միջև»։

 

«Հիմնական արձաններն ու քանդակները մեզ հաջողվել է դուրս բերել, սակայն ներկայիս պայմաններում տարհանել հուշարձաններն անհնար է»,- ասել է նա՝ անհանգստանալով, որ վանդալները կպայթեցնեն հնագիտական կառույցները։

 

Ավելի վաղ հաղորդվել էր, որ գրահայիններին հաջողվել է գրեթե ամբողջությամբ գրավել Պալմիրա քաղաքը, իսկ սիրիական հրամանատարությունը դուրս է բերել զորքերը քաղաքից, որպեսզի ոչնչացման չենթարկի բացառիկ հնագույն ավերակները։