Վերնիսաժում տեղի ունեցած սպանության դեպքի առթիվ քրգործ է հարուցվել (թարմացված, լուսանկարներ, տեսանյութ)

17:32 • 14.09.17

17.32

Վերնիսաժում այսօր տեղի ունեցած սպանության դեպքի առթիվ քրեական գործ է հարուցվել ՀՀ քրեական օրենսգրքի 3 հոդվածով՝ ՀՀ քրեական օրենսգրքի 104-րդ հոդվածի 2-րդ մասի 6-րդ կետով, 34-104-րդ հոդվածի 2-րդ մասի 1-ին կետով եւ 235-րդ հոդվածի 1-ին մասով։

Քրեական գործով նախաքննությունը հանձնարարվել է ՀՀ ՔԿ ՀԿԳ քննության գլխավոր վարչությանը։ Ստեղծվել է քննչական խումբ։

Այս մասին հայտնում է ՀՀ քննչական կոմիտեի նախագահի խորհրդական Սոնա Տռուզյանը՝ Facebook կայքի իր էջում։ 

17.20

Վերնիսաժի հարևանությամբ,  Թուֆենկյան հյուրանոցի մոտ հրաձգության արդյունքում վիրավորում ստացած Վահագն Աբգարյանին այս պահին վիրահատում են. «Արմենպրես»-ի հետ զրույցում ասել է «Աստղիկ» ԲԿ-ի գլխավոր բժիշկ Ռոբերտ Կուրղինյանը։

Նրա խոսքով՝ վիրահատությունը կավարտվի մեկ ժամից: «Վիրավորը կրծքավանդակի աջ կողմում և նախաբազկային հատվածում վնասվածք է ստացել»,-ասաց նա:

17.13

Վերնիսաժում կրակոցների հետևանքով վիրավորվածը Ալավերդիում քրեական հեղինակություն, 1978 թվականին ծնված Վահագն Աբգարյանն է, ով տեղափոխվել է «Աստղիկ» բժշկական կենտրոն: Նրա նկատմամբ 2015-ին մահափորձ է իրականացվել։

14.45 

Tert.am-ի հետ զրույցում Ոստիկանության ԶԼՄ-ների հետ կապի բաժնի պետ Էդգար Ջանոյանն ասաց, որ Վերնիսաժում սպանվածի ինքնությունը պարզվել է: 

«Ոստիկանության ծառայողները պարզել են սպանվածի ինքնությունը։ Նա 1974 թվականին ծնված Գ.Մ-ն է, ով Լոռու մարզի Ալավերդի քաղաքի բնակիչ էր»,-ասաց նա։

ՀՀ ոստիկանության հասարակայնության ու լրատվության հետ կապերի վարչության պետ Աշոտ Ահարոնյանն էլ նշեց, որ կա 1 զոհ և 1 վիրավոր, երկուսն էլ Լոռու մարզից են։

14.37 

Վերնիսաժի տարածքում՝ որտեղ կրակոցներ են հնչել, ոստիկանությունը շղթա է կազմել։ Դեպքի վայրում են Երևանի փոխոստիկանապետ Վալերի Օսիպյանն ու ՀՀ ոստիկանապետի տեղակալ Հունան Պողոսյանը։

Իրավապահ մարմինների ներկայացուցիչներն իրականացնում են համապատասխան միջոցառումներ։ Դեպքի վայրում հայտնաբերվել է մեկ ատրճանակ և մեկ ինքնաձիգ։ 


 

14.03 

Երևանում՝ Վերնիսաժի հարևանությամբ գտնվող «Խարբերդ» ռեստորանային համալիրի մոտ հնչել են կրակոցներ։ 

Ոստիկանության ԶԼՄ-ների հետ կապի բաժնի պետ Էդգար Ջանոյանը Tert.am-ի հետ զրույցում ասաց, որ ոստիկանությունը կրակոցների մասին ահազանգ ստացել է։ 

«Ահազանգ ստացվել է։ Ոստիկանության տարբեր ստորաբաժանումների ծառայողներն այս պահին դեպքի վայրում են, կատարվում են համապատասխան աշխատանքներ հանգամանքները պարզելու ուղղությամբ»,-ասաց Ջանոյանը։