Դասադուլը շարունակվելու է. ավարտվեց ԿԳ նախարարի և ուսանողների հանդիպումը (լուսանկարներ, տեսանյութ)

15.46


Կրթության և գիտության նախարար Լևոն Մկրտչյանն ուսանողների հետ հանդիպման ժամանակ նշեց, որ դասադուլի մեջ իմաստ չի տեսնում: «Չեմ կարծում, որ այս օրենքը հարված է հասցնում կրթությանը և գիտությանը»,-ասաց նա:

Այսպիսով հանդիպումը ավարտվեց և ուսանողներից Դավիթ Պետրոսյանը լրագրողների հետ զրույցում ասաց, որ իրենց որոշ մտահոգություններ նախարարը կիսեց:

«Դասադուլը շարունակելու ենք և խնդրեցինք նախարարին միանա մեզ` կասեցնելու օրինագծի երկրորդ ընթերցումը: Նախարարն ասաց, որ դա չի կարող անել, և մենք հասկանում ենք»,- ասաց նա և նշեց, որ փորձելու են այլ կերպ ազդեցություն ունենալ նախագծի որոշման վրա:

 

15.34

Կրթության և գիտության նախարար Լևոն Մկրտչյանը ուսանողների մտահոգությունները լսելուց հետո արձագանքեց դրանց: «Երկու սկզբունք է դրված` ՀՀ յուրաքանչյուր քաղաքացի հայրենիքի ծառայության համար արտոնություն չունի, իսկ երկրորդ սկզբունքը` դրա համար մեխանիզմներ ձևավորելն է»-ասաց նա:

Անդրադառնալով գիտության ոլորտին` Լևոն Մկրտչյանը նշեց, որ գիտության խնդիրը ոչ թե ավելի շատ տարկետումով է պայմանավորված, այլ պայմանավորված է գիտությունը երիտասարդի համար մոտիվացնելով:  Նա համաձայնեց, որ գիտության նկատմամբ պետք է շատ լուրջ ուշադրություն դարձնել։

«Կարող ենք երեք այսպիսի դահլիճ լցնել մարդկանցով, ովքեր թեկնածուական ունեն, բայց բացարձակ մոտ չեն գիտությանը, գիտության հոտը չգիտեն: Մեղավորությունը, պատասխանատվությունը ունե՞նք, իհարկե ունենք, բայց դրա համար կառուցվածքային փոփոխություններ պետք է անենք»,- ասաց նա և ավելացրեց, որ օրենքը հետաձգելու անհրաժեշտություն չկա:

Ուսանողները նշեցին, որ դասադուլը շարունակվելու է, քանի որ իրենք կոնկրետ փոփոխություն են ուզում: Նախարարը խորհուրդ տվեց դադարեցնել դասադուլը և նշեց, որ միշտ պատրաստ է հանդիպել: «Այս օրինագիծը անցել է սահմանված բոլոր ընթացակարգերը, ունի հետևում քաղաքական ուժեղ հենարան»,-ասաց նա:

 




15։00

Տարկետման իրավունքի սահմանափակումից դժգոհող ուսանողները շարունակում են իրենց մտահոգությունները ներկայացնել կրթության և գիտության նախարար Լևոն Մկրտչյանին։

Ուսանողուհիներից մեկը նշեց, որ ներկայումս դիմորդների մոտ ձգտում կա անվճար ընդունվելու, և եթե այս օրինագիծն ընդունվի, նրանց մոտիվացիան կորելու է, ավելի շատ չեն ձգտի պարապել, իսկ զինվորականի մասնագիտությունը կդառնա առաջնային:

Մեկ ուրիշ ուսանող ասաց, որ իրենք նույնպես ունեն այն համոզումը, որ ասպիրանտուրան պետք է ազատել կեղծ գիտնականներից, բոլոր այն մարդկանցից, ովքեր հետբուհական կրթությունն օգտագործում են որպես զինծառայությունից խուսափելու գործիք:

Ուսանողները հարց բարձրացրեցին նախարարին, թե ինչու է այդքան անհասանելի, և մինչ այս իրենց հետ չի հանդիպել: «Ես վազեմ բողոքի ակցիային, ասեմ ինձ հետ հանդիպե՞ք»,-արձագանքեց նախարարը և նշեց, որ մինչ այս հանդիպման վերաբերյալ չի եղել առաջարկ:

Լևոն Մկրտչյանը, արձագանքելով մտահոգություններին, ասաց.«Դուք սոցիալական արդարության հարցում դրեցիք շատ կարևոր խնդիր, թե արդյոք այլ համակարգերում  խնդիր լուծվում է, թե ոչ»: Նա նշեց, որ ներկայումս խոսքը զինապարտության մասին համալիր փոփոխությունների մասին:





14։29


Ուսանողները նախարարի հետ հանդիպման ժամանակ անդրադարձան զինապարտության մասին օրենքի փոփոխությունների հետ կապված կոռուպցիոն ռիսկերին՝ նշելով, որ կոռուպցիոն ռիսկ կա, որովհետև ինչ-որ մարդիկ իրենց տեղում չեն։


Ուսանողներից Դավիթ Պետրոսյանը նշեց, թե խնդիրն այն է, որ իրենք վստահ չեն,  որ նման օրինագծի ընդունմամբ լուծվելու է արդարության  խնդիրը: «Այսինքն՝ սկզբունքը շատ լավն է, սակայն տարկետման ինստիտուտի սահմանափակելու օրինագծով կարծում ենք, որ սոցիալական արդարությունը չի վերականգնվի, քանի որ կան այլ շատ ոլորտներ, որոնք օգտագործում են բանակից ազատվելու համար, նույն առողջապահական համակարգում կան սողանցքներ: Մինչև այդ ոլորտներում չի բերվել համապատասխան կարգ ու կանոն, այս ոլորտում կատարել փոփոխություն ՊՆ-ի առաջ քաշած նախագծով, տրամաբանական չէ»,-ասաց նա և նշեց, որ եթե այստեղ խնդիր կա, ինչու ներսում չի լուծվում:

«Այսինքն՝ սկզբունքը լավն է, բայց սկզբունքը լուծելու մեխանիզմները չեն բավարարում»,-ասաց նա և կոչ արեց բանակի հարցը չխառնել այս տարկետման ինսիտուտի հետ, քանի որ իրենք էլ են մտահոգված բանակում առկա խնդիրներով:

Ուսանողները նշեցին, որ դասախոսների մի մասը ևս դեմ է օրինագծի ընդունմանը: Նրանք նկատեցին, որ շարժման մեջ ընդգրկված են մարդիկ, որոնց ընդհանրապես չի վերաբերում է այս օրինագիծը:

13։47


Կրթության և գիտության նախարարին ուսանողները հարցրեցին, թե ինչով է պայմանավորված համալսարաններում ուսանողների` շարժմանը միանալու հետ կապված խոչընդոտները, համալսարանի դռները փակ պահելու ավանդույթը:

Նախարարն օրինակ բերեց, որ Գյուղատնտեսական ակադեմիայի, Ճարտարագիտական համալսարանում նման խնդիր չի եղել և ինքը խոսել է ռեկտորների հետ:


«Ուսանողները դասընթացի մեջ են, և դուք գտնում եք, որ այն պետք է ընդհատվի՞: Խոսքն այն մասին է, երբ մենք ունենք մի վիճակ երբ ուսանողության 90 տոկոսը զորակոչվում է բանակ և կատարում է իր պարտքը հայրենիքի հանդեպ և դա մեր երկրի անվտանգության բաղկացուցիչն է և «Պատիվ ունեմ» ծրագրով առաջարկվում է փաթեթ, որով առաջարկվում է վերականգնել պահեստազորի սպայի հասկացությունը»,-ասաց նա և հարց բարձրացրեց, թե հայրենիքի հանդեպ պարտականությունը բոլորի՞ համար է, թե՞ ոչ:

Ուսանողներից մեկը նշեց, որ նախարարին չեն վստահում, իսկ նախարարը արձագանքեց` դա Ձեր խնդիրն է: Ուսանողները ասացին, իրենց կոչերին արձագանք չի տրվել և այսօր բարձրացրած հարցերը հրատապ լուծում են պահանջում և դա կօգնի ստեղծվի վստահության մթնոլորտ:


Այսպիսով` Լևոն Մկրտչյանը նշեց, որ վերջին 4-5 տարիներին գիտությունների թեկնածուի աստիճանով քաղաքացիներից գիտության մեջ մնացել է 15-17 տոկոսը, որը միջազգային որևէ չափանիշի մեջ չի ներառվում: «Այսինքն՝ սա նշանակում է, որ կոռուպցիոն մեծ ռիսկ ենք կուտակել»,- ասաց նա և նշեց, որ կա սոցիալական արդարության խնդիր:




13:28

Այս պահին Կրթության և գիտության նախարար Լևոն Մկրտչյանը հանդիպում է տարկետման սահմանափակման դեմ բողոքող ուսանողներից 10 հոգու: Ուսանողները շնորհակալություն հայտնեցին իրենց առաջարկին ընդառաջ գնալու և հանդիպելու համար, իսկ նախարարը ասաց, որ ընդառաջ գնալու խնդիր չկա և դա պարտականություն է:

Ուսանողները ներկայացնում են տարկետման ինստիտուտի փոփոխության հետ իրենց մտահոգությունները:

13:00

Ուսանողները քննարկեցին Կրթության և գիտության նախարար Լևոն Մկրտչյանի առաջարկը` հանդիպել ուսանողներից 10 հոգու հետ և որոշեցին ընդունել այն։ 

«Մենք կարծում ենք, որ ամեն դեպքում պետք է հանդիպել, քանի որ լուսաբանվող է հանդիպումը: Հանդիպման ժամանակ նաև լինելու է հրավեր՝ ուղղված նախարարին հանդիպել ԵՊՀ-ում: Հանդիպումը երկար չի տևելու, հիմնական հղումներն անելու ենք, դուրս ենք գալու: Դրական, բացասական ռիսկերը հաշվի առնելով՝ ավելի նպատակահարմար է հանդիպել: Մենք կլինենք ավելի արձագանքող, բարեհոգի, քան իրենք»,-ասաց ակտիվիստներից Դավիթ Պետրոսյանը:





12:57 

Քիչ առաջ Կրթության և գիտության նախարարության շենքի մոտ գտնվող` տարկետման սահմանափակման դեմ բողոքող ուսանողներին մոտեցան նախարարության ներկայացուցիչները: 

Ուսանողները հայտարարեցին, որ երեկ թեժ գծի միջոցով կրթության և գիտության նախարարին հրավիրել էին հանդիպման ԵՊՀ շենքի մոտ, որ ներկայացնեն իրենց անհանգստությունը, թեև նախարարը ոչ եկավ, ոչ էլ որևէ արձագանք եղավ: 

«Հիմա քանի որ ընդմիջման ժամ է, կարծում ենք, որ ճաշի ժամը պարոն Մկրտչյանը կարող է հատկացնել, և մենք քննարկենք այն խնդիրները, որ տեսնում ենք»,-ասացին ակտիվիստներից: 

Ուսանողները նշեցին, որ իրենց մտահոգություններն արդեն մի քանի անգամ բարձրաձայնել են:  

«Այսօր մեր այստեղ գալու նպատակը նրանում է, որ հետագայում հանկարծ այնպես չստացվի, որ դուք հայտարարություն անեք, թե ուսանողները մեզ հետ կապի դուրս չեն եկել»,-ասաց ակտիվիստներից մեկը և նշեց, որ այստեղ գալը վկայում է այն մասին, որ ցանկանում են լսել հակափաստարկներ: 

Նախարարության ներկայացուցիչները հայտնեցին, որ այս պահին Լևոն Մկրտչյանը պատրաստ է ուսանողներից տասը հոգու ընդունել: Ուսանողները հարցրին, թե արդյոք լրատվամիջոցները կարող են ներկա լինել և ստացան դրական պատասխան:  

Այնուամենայնիվ ուսանողները կոչ արեցին ԵՊՀ մեծ դահլիճը տրամադրել հանդիպման կազմակերպման համար:

Ուսանողները ժամանակ խնդրեցին քննարկելու առաջարկը և խնդրեցին իրենց առաջարկն էլ փոխանցել նախարարին:



12:41

Այս պահին տարկետման սահմանափակման դեմ բողոքող ուսանողները Կրթության և գիտության նախարարության շենքի դիմաց են: Ակտիվիստներից մեկը նշեց, որ այդտեղ գալու նպատակը կրթության և գիտության նախարարի հետ հանդիպելու ցանկությունն է:

«Պարո՛ն Լևոն Մկրտչյան, մենք Ձեզ սպասում ենք այստեղ»,- ասաց նա և կոչ արեց ուսանողներին սադրանքների չգնալ և արտահայտություններում լինել կոռեկտ:

Ուսանողները 30 րոպե ժամանակ տվեցին նախարարին` ընդունելու իրենց հանդիպման առաջարկը:


12։19

Այս պահին տարկետման սահմանափակման դեմա բողոքող ուսանողները շարժվում են դեպի Կրթության և գիտության նախարարության շենք:





11:55

2015-2017 թվականին ՀՀ զինված ուժերում ժամկետային ծառայություն անցած ԵՊՀ ուսանողներից Լևոնն անդրադարձավ կրթության վրա բանակի ազդեցությանը: Նա նշեց, որ ուսանողը, երբ մեկնում է ծառայության և վերադառնում է բանակից, իր տարիքային ցենզը բարձրանում է և սոցիալական պահանջներ է ունենում:

«Որոշակի մանիպուլյացիոն քաղաքականություն է իրականացվում, որ ծառայածների, կամ ապրիլյան պատերազմի մասնակիցների միջոցով փորձում են պառակտում մտցնել մեր երիտասարդության մեջ: Այսինքն՝ հայ զինվորի կերպարը փորձում են հակադրել մեր գաղափարներին: Ոչ, մեր գաղափարը բանակում չծառայելը չէ, մենք կողմ ենք ծառայելուն»,-ասաց նա:

Երիտասարդ գիտնականներից մեկն էլ նշեց, որ իրենք պայքարում են հանուն գիտության զարգացման: «35 տարեկանից ցածր գիտնականների քանակը կազմում է 15 տոկոս, եթե այս օրենքն ընդունվի գիտության աստիճան կարող է դառնալ 30 տարում: Ինչպե՞ս կարող է գիտությունը զարգանալ այդ դեպքում»,-ասաց նա:

Նշենք, որ այս պահին ուսանողներն իրենց բացականչություններով շարժվեցին դեպի Հայաստանի տնտեսագիտական պետական համալսարան:

11:22

Այս պահին շարունակվում է ԵՊՀ ուսանողների բողոքի ակցիան` ընդդեմ տարկետման իրավունքի սահմանափակման: Ակտիվիստներից Դավիթ Պետրոսյանը ներկայացրեց, երեկ Պաշտպանության նախարարության նախատեսած հանդիպմանը իրենց չմասնակցելու պատճառները:

«Երեկ պաշտպանության նախարարությունից մեզ զանգեցին ու ասացին՝ հանդիպում է նախատեսվում և բոլոր ԶԼՄ-ներին ուղարկվել է հաղորդագրություն, սակայն կան ԶԼՄ-ներ, որ հրավիրված չեն եղել: Այստեղ արդեն կա խնդիր, բայց ես չեմ ասում, որ մեզ մտադրված խաբել են, սակայն եթե ասում են բոլոր, ուրեմն բոլորը»,-ասաց նա և նշեց, որ ուղիղ եթեր ևս չէին ապահովել:

Ուսխորհրդի վերաբերյալ նա ասաց, որ տարկետման ինստիտուտի հետ կապված ոչ մի  ուսխորհուրդ պաշտոնական հայտարարությամբ հանդես չի եկել: Նա նաև նշեց, որ ՊՆ-ի հանդիպմանը հրավիրված չեն եղել ապրիլյան պատերազմի մասնակիցները:

«Ես բոլորիդ հարց եմ տալիս. եթե այդ ձևաչափով վաղը գնային քննարկման, դուք մեզ հարգելո՞ւ էիք։ Ես անընդհատ լուրջ կասկածներ կունենայի, ոչ մի խնդիր չկա, բայց ինչ պիտակավորում ասես արվում է, դրա համար մենք չենք գնացել: Բայց մեր հրավերը իրենց մնում է ուժի մեջ»,- ասաց նա և նշեց, որ այստեղ ոչ ոք ոչ ոքի վրա չի ցանկանում հարձակվել:

 



10:48


Այսօր շարունակվում է ԵՊՀ ուսանողների բողոքի ակցիան` ընդդեմ տարկետման իրավունքի սահմանափակման: Ակտիվիստներից Դավիթ Պետրոսյանը հանդես եկավ հայտարարությամբ և կոչ արեց ուսանողներին` կոնֆլիկտների չգնալ:

«Խնդրում եմ մի՛ տաքացեք, կոնֆլիկտների մի՛ գնացեք, սա այն տեղը չի, որտեղ մենք կոնֆլիկտի գնանք: Անվտանգության աշխատողները այնպես չի, որ մեր վատն են ուզում, իրենց հետ խնդիր չունենք»,-կոչ արեց նա:

Դավիթ Պետրոսյանը նշեց, որ իրենց ֆեյսբուքյան ռեսուրսները պետք է ավելի լավ օգտագործեն, բայց մամուլի հետ կապված ռեսուրսներ չունեն: «Մենք պետք է պատրաստ լինենք և չեզոքացնենք այն ռիսկերը, որոնք մեր դեմ կարող են օգտագործվել»,-ասաց նա:

Ուսանողները այնուհետև երթով շարժվեցին և բացականչում էին «Տարկետում լինելու է», «Միացում»:

Հիշեցնենք, որ ուսանողների ակցիան սկսվել է երեկվանից: