Մեկ մարդ է զոհվել Ֆրանսիայի հարավում պատանդներ վերցնելու հետևանքով

15:38 • 23.03.18

Առնվազն մեկ մարդ է զոհվել Ֆրանսիայի հարավում պատանդառության հետ կապված միջադեպի հետևանքով: Այդ մասին հայտնում է Reuters գործակալությունը:

Ինչպես հայտնում է Associated Press գործակալությունը, Ֆրանսիայի իշխանությունները հայտարարել են, որ ոստիկանական գործողություն է ընթանում երկրի հարավում գտնվող Տրեբ փոքր քաղաքում։


Զինված անձը կրակ է բացել ոստիկանների ուղղությամբ, որի հետևանքով մեկ ոստիկան է վիրավորվել, այնուհետ քաղաքի Super U սուպերմարկետում պատանդներ վերցրել: Զինված անձը հայտարարել է, որ աջակցում է «Իսլամական պետություն» ահաբեկչական խմբավորմանը: AP գործակալությունը, վկայակոչելով ոստիկանությունից պաշտոնյայի, հայտարարել է, որ պատանդ վերցնողն առնվազն մեկ մարդ է սպանել սուպերմարկետի ներսում:

Ֆրանսիայի ներքին գործերի նախարարությունը Twitter-ում հայտնել է, որ ընթանում են ոստիկանական գործողություններ:

Օդ շրջանի իշխանությունները նախազգուշացրել են մարդկանց խուսափել սուպերմարկետին հարող տարածքից:

AFP գործակալությունը, վկայակոչելով իշխանություններին, հայտնում է, որ միջադեպը գնահատվում է որպես ահաբեկչություն:

Այսօր ավելի վաղ Ֆրանսիայի հարավում գտնվող մեկ այլ քաղաքում՝ Կարկասոնում, ոստիկան է վիրավորվել կրակոցից: Դեռևս պարզ չէ, թե արդյոք այդ երկու միջադեպերը կապված են: