22։01

Նիկոլ Փաշինյանին մոտեցել է Երևանի փոխոստիկանապետ Վալերի Օսիպյանը և տեղեկացնում է, որ երկվա ցույցից հետո հրապարակում մնացել են ոչ սթափ վիճակում գտնվող վարորդներ, որոնց տարածքից հեռացնելը շատ դժվար է եղել:

21։55

Նիկոլ Փաշինյանը, խոսելով վաղվա անլիքների մասին, ասաց, որ վաղը կսկսեն Էրեբունի համայնքից՝ ժամը 11-ին: Այսօր երթի փոխարեն ցուցարարների համար համերգ կլինի։



21։40

Նիկոլ Փաշինյանն իր ելույթում ներկայացրեց նաև այսօր ՀՀ նախագահ Արմեն Սարգսյանի հետ ունեցած զրույցը: Նրա խոսքով՝ Արմեն Սարգսյանը բանակցությունների կոչ է արել, որին ի պատասխան ինքն ասել է, որ ժողովուրդը երեկ տվել է վարչապետ Սերժ Սարգսյանի հետ բանակցելու հորդորի պատասխանը և ասել, որ ուշ է:

«Նա ասաց, որ ինքը մտահոգված է իրավիճակով, ես ասացի, որ այստեղ հավաքված ժողովուրդն էլ մտահոգված իրավիճակով, ավելին՝ գիտեն լուծումը, թե ինչպես պետք է փարատեն մտահոգությունները, իսկ լուծումը Սերժ Սարգսյանի հեռացումն է: Նա ինձ ասաց՝ հիմա ի՞նչ, բանակցելու կարիք չկա՞, ես ասացի, որ երեկ հանրահավաքում ասել եմ, որ մենք պատրաստ ենք քննարկել իշխանության հեռացումը: Այո՛, մեր առաջադրած օրակարգի շուրջ մենք պատաստ ենք բանակցել: Ըստ էության՝ նա հարցրեց՝ ի՞նչ ֆորմատով և որտեղ,  ես ասացի, որ, քանի որ ինքը այս քաղաքականության մաս չէ, ես նրան հրավիրել եմ Հանրապետության հրապարակ, բայց Սերժ Սարգսյանին չեմ կարող հրավիրել, որովհետև վստահ չեմ, որ կկարողանամ նրա ներկայությամբ այստեղ իրավիճակ կառավարել»,- ասաց նա:

ԱԺ «Ելք» խմբակցության  ղեկավարը շեշտեց, ինքը կառավարական որևէ շենքում չի  հանդիպի վարչապետ Սերժ Սարգսյանի հետ, միայն 3-րդ` չեզոք տեղում: Նա ևս մեկ անգամ արձանագրեց, որ ինքը միայն կբանակցի Սերժ Սարգսյանի վարչապետությունից հեռացման և իշխանություն անցնցում փոխանցելու շուրջ:  Փաշինյանը ներկայացրեց իրենց ճանապարհային քարտեզը:

«Սերժ Սարգսյանը հրաժարական է տալիս վարչապետի պաշտոնից, ԱԺ-ն վարչապետ է ընտրում ժողովրդի թեկնածուին, որը կընտրի այս հրապարակում: Ձևավորվում է ժամանակավոր կառավարություն, մաքսիմալ արագ օրենսդրական փոփոխություն է լինում Ընտրական օրենսգրքում ու Կուսակցությունների մասին օրենքում: Ստեղծվում է օրենսդրական երաշխիքներ, որ կարող է տեղի ունենալ արտահերթ, ազատ, արդար խորհրդարանական ընտրություններ, քաղաքական պայմանավորվածության արդյունքում օրենքով սահմանված ժամկետում ԱԺ-ն  չի ընդունում կառավարության ծրագիրը, որից հետո օրենք ուժով արտահերթ խորհրդարանական  ընտրություններ է հրավիրվում»,- ներկայացրեց նա և հավելեց, որ սա իրենց միակ պլանը չէ՝ կա նաև պլան Բ և Գ:

Նրա խոսքով՝ նախագահ Սարգսյանը մտավախություն է հայտնել՝ բռնությունների հետ կապված, որին ի պատասխան ինքն ասել է.«Ես ասացի՝ ինչո՞ւ պիտի լինեն բռնություններ, հայտարարեցի, որ մեր կողմից պաշտոնապես երաշխավորում եմ, որ մեր շարժման որևէ մասնակից, որևէ բռնություն չի գործադրելու: Մենք բռնություն գործադրելու որևէ ծրագիր չունենք, մենք մեր կողմից բացառում ենք բռնության գործադրումը»,- ընդգծեց Նիկոլ Փաշինյանը:

Վերջինս խնդրեց իրեն լիազորել հավաքվածների անունից բանակցելու:

21։25

Պատգամավորը շեշտեց՝ իրեն ձերբակալելով որևէ բան չի փոխվի, քանի որ շարժումը մեծ է:

«Պետք է ԱԺ բերեք ինձ, հատուկ նիստ անեք: Ես լինելու եմ ԱԺ-ում և հենց այդ օրը, երբ ԱԺ ամբոնից ելույթ ունենամ, դա կլինի ձեր իշխանության վերջին օրը: Երբ փորձում էինք ինձ ձերբակալել, փակվեց Զվարթնոց օդանավակայանը, Բագրատաշենի անցակետը, Մեղրի ճանապարհը, Նոյեմբերյանի ճանապարհը, Մասիվը: Սթափվե՛ք»,- ասաց նա:

Նա շեշտեց, որ երեկ երեկոյանից բերման են ենթարկում իր կողմանակիցներին, իսկ գիշերը բանդաները սկսել են ջարդել ավտոմեքենաներ:

«Հարց տանք մեզ՝ ինչի՞ համար են այս ամենն անում, բայց մինչև այդ հարցին անցնելն ասեմ, որ ինչ լինում է, «ժեշտին լինի»: Սա անում են, որ մենք էլ իրենց մեքենաները ջարդենք, բայց մենք դրան չեն տրվի, քանի որ նման բան են անում, որ արտակարգ դրություն մտցնեն: Հարգելիներս, լուրեր կան, որ այսօր երեկոյան նաև խանութներ են ջարդելու ու թալանելու, իսկ հիմա ձեր խոսքով ուզում եմ, որ հաստատեք, որ այն մարդը, որը բռնության կգնա, կվիրավորի ոստիկանին, հարձակում կանի, մեր շարքերից չէ», -շեշտեց  Նիկոլ Փաշինյանը` հավելելով, եթե մի այտիդ հարվածեն, մյուս էլ դեմ տվեք:

21։40

Նիկոլ Փաշինյանն իր ելույթում ներկայացրեց նաև այսօր ՀՀ նախագահ Արմեն Սարգսյանի հետ ունեցած զրույցը: Նրա խոսքով՝ Արմեն Սարգսյանը բանակցությունների կոչ է արել, որին ի պատասխան ինքն ասել է, որ ժողովուրդը երեկ տվել է վարչապետ Սերժ Սարգսյանի հետ բանակցելու հորդորի պատասխանը և ասել, որ ուշ է:

«Նա ասաց, որ ինքը մտահոգված է իրավիճակով, ես ասացի, որ այստեղ հավաքված ժողովուրդն էլ մտահոգված իրավիճակով, ավելին՝ գիտեն լուծումը, թե ինչպես պետք է փարատեն մտահոգությունները, իսկ լուծումը Սերժ Սարգսյանի հեռացումն է: Նա ինձ ասաց՝ հիմա ի՞նչ, բանակցելու կարիք չկա՞, ես ասացի, որ երեկ հանրահավաքում ասել եմ, որ մենք պատրաստ ենք քննարկել իշխանության հեռացումը: Այո՛, մեր առաջադրած օրակարգի շուրջ մենք պատաստ ենք բանակցել: Ըստ էության՝ նա հարցրեց՝ ի՞նչ ֆորմատով և որտեղ,  ես ասացի, որ, քանի որ ինքը այս քաղաքականության մաս չէ, ես նրան հրավիրել եմ Հանրապետության հրապարակ, բայց Սերժ Սարգսյանին չեմ կարող հրավիրել, որովհետև վստահ չեմ, որ կկարողանամ նրա ներկայությամբ այստեղ իրավիճակ կառավարել»,- ասաց նա:

ԱԺ «Ելք» խմբակցության  ղեկավարը շեշտեց, ինքը կառավարական որևէ շենքում չի  հանդիպի վարչապետ Սերժ Սարգսյանի հետ, միայն 3-րդ` չեզոք տեղում: Նա ևս մեկ անգամ արձանագրեց, որ ինքը միայն կբանակցի Սերժ Սարգսյանի վարչապետությունից հեռացման և իշխանություն անցնցում փոխանցելու շուրջ:  Փաշինյանը ներկայացրեց իրենց ճանապարհային քարտեզը:

«Սերժ Սարգսյանը հրաժարական է տալիս վարչապետի պաշտոնից, ԱԺ-ն վարչապետ է ընտրում ժողովրդի թեկնածուին, որը կընտրի այս հրապարակում: Ձևավորվում է ժամանակավոր կառավարություն, մաքսիմալ արագ օրենսդրական փոփոխություն է լինում Ընտրական օրենսգրքում ու Կուսակցությունների մասին օրենքում: Ստեղծվում է օրենսդրական երաշխիքներ, որ կարող է տեղի ունենալ արտահերթ, ազատ, արդար խորհրդարանական ընտրություններ, քաղաքական պայմանավորվածության արդյունքում օրենքով սահմանված ժամկետում ԱԺ-ն  չի ընդունում կառավարության ծրագիրը, որից հետո օրենք ուժով արտահերթ խորհրդարանական  ընտրություններ է հրավիրվում»,- ներկայացրեց նա և հավելեց, որ սա իրենց միակ պլանը չէ՝ կա նաև պլան Բ և Գ:

Նրա խոսքով՝ նախագահ Սարգսյանը մտավախություն է հայտնել՝ բռնությունների հետ կապված, որին ի պատասխան ինքն ասել է.«Ես ասացի՝ ինչո՞ւ պիտի լինեն բռնություններ, հայտարարեցի, որ մեր կողմից պաշտոնապես երաշխավորում եմ, որ մեր շարժման որևէ մասնակից, որևէ բռնություն չի գործադրելու: Մենք բռնություն գործադրելու որևէ ծրագիր չունենք, մենք մեր կողմից բացառում ենք բռնության գործադրումը»,- ընդգծեց Նիկոլ Փաշինյանը:

Վերջինս խնդրեց իրեն լիազորել հավաքվածների անունից բանակցելու:

21։17

Ամեն նոր օր գալիս է ապացուցելու, որ ՀՀ -ում սկսած ոչ բռնի, «թավշյա հեղափոխությունն» ակնասելի է, հաղթանակն էլ՝ անխուսափելի: Հանրահավաքային իր ելույթում նման հայտարարություն արեց ԱԺ «Ելք» խմբակցության պատգամավոր Նիկոլ Փաշինյանը: Նա հիշեցրեց, որ այսօր իր երթը սկսել է Մասիվի 7-րդ զանգվածից, որի ժամանակն էլ ապշել է ստեղծված իրավիճակից:

Փաշինյանը զարմացել է, որ տեղատարափ անձևի տակ մարդիկ նույնիսկ ժամանակից շուտ հավաքվել էին, իսկ երթը սկսելուց հետո ոստիկանություն արգելել է երթը, և հայտարարվել էր, թե որոշում է կայացվել իրեն հավաքից հեռացել, ինչը փաստացի նշանակում էր, որ որոշել են իրեն բերման ենթարկել.« Ես ուղիղ եթերում դիմեցի քաղաքացիներին, և ընդամենը 20 րոպեում  քաղաքացիները 4-5 կողմից փակեցին մոտակա բոլոր ճանապարհները: Տեղի ունեցավ աներևակայելի բան՝ առաջին անգամ շենքերից ու պատուհաններից նայող չկար: Հասկացա, որ բոլորը մասնակցում էիր մեր երթին»,- ասաց նա:

Փաշինյանի գնահատմամբ՝ ամեն բան վկայում է նրան մասին, որ իշխանությունները ի վիճակի չեն գնահատել հանրապետության իրավիճակը. «Չեն գիտակցում, որ իրավիճակ է փոխվել, և  իրենց իմացած Հայաստանն ու Երևանն այլևս գոյութուն չունի, իրավիճակ է փոխվել»,- շարունակեց Փաշինյանը:

20։58

Այստեղ կանգնածներդ պիտի գիտակցեք, որ ձեր համախբվածությամբ հնարավորություն եք տալիս, որ մարդիկ չարտագաղթեն, այլ ներգաղթեն: Այսօր իր հանրահավաքային ելույթն այսպես մեկնարկեց «Քաղաքացիական պայմանագիր» կուսակցության նախագահ, ԱԺ «Ելք» խմբակցության պատգամավոր Սասուն Միքայելյանը:

«Փառք ու պատիվ ձեզ ու ձեր միասնությանը: Հայ ժողովուրդ, սա մի նոր գարուն է, գարուն է Հայաստան և Արցախ աշխարհի վրա, որի բույրը ժողովրդավարություն է: Ասում էին` հայոց արգանդը չորացել է, այն չի չորացել և չի չորանա, և այն մայրերը, որոնց որդիները զոհված են, այս հողի վրա են ապրելու: Մենք պիտի հասկանանք, որ գոյատևել են և այս հողը սրբացրել է մեր նահատակներով»,- ասաց Սասուն Միքայելյանը:

Պատգամավորը շեշտեց, որ ինքը երբեք որևէ մեկին բան չի խնդրել, բայց այսօր իր և ժողովրդի անունից խնդրանք ունի իշխանություններին.«Ի սեր Աստծո, առանց արյուն հեռացեք, չեմ հասկանում ինչպիսի՞ պաշտոն պետք է լինի դա, որ բռնանա մի ամբողջ ազգի ազատության ու կամարտահայտության վրա: Մենք չենք ցանկանում նմանվել ձեզ, հեռացեք խաղաղ»,-եզրափակեց Սասուն Միքայելյանը։

20։50

Այսօր համատարած հերոսություն եք արել. հաանրահավաքի մասնակիցներին դիմելով` ասաց ԱԺ «Ելք» խմբակցության պատգամավոր Արարատ Միրզոյանը: Նա շեշտեց, որ հատկապես Երևանում, ոստիկանությունն անօրինական գործողություններ է կատարել:

«Ոստիկանությունը, գերազանցելով իրենց տրված լիազորություններ, անցնելով օրենքի սահմանները, բազմաթիվ ապօրինություն է արել, բայց դուք կանգնել եք, ձեր մեքենաներն ապօրինաբար ջարդել են, ձեզ բերման են ենթարկել, բայց դուք կանգնել եք, հաղթել եք, այսօր է եղել հաղթանակը: Երբ այս ամենն ավարտվի, իսկ այս ամենը մի քանի օրից մեր ուզած ելքով կավարտվի, իմացեք՝ այսօր է լինելու հաղթանակը»,- ասաց նա:

Պատգամավորը խոսեց այսօր ՀՀ իշխանությունների և դեսպանների հետ հանդիպման մասին և շեշտեց, թե փորձել են ներկայացնել, թե իրենց հավաքը խառնիճաղանճ ամբոխ է, և իրենք պետք է միջոցներ ձեռնարկեն:

«Ուզել է ստանալ միջազգային հանրության «դաբրոն», բայց չեն ստացել»,- նշեց պատգամավոր:

Արարատ Միրզոյանը շեշտեց, որ այս իրադարձությունից հետո իրենք հայտարարություն են ընդունել ոստիկանության ապօրինի գործողությունների մասին:

20։33

Ելույթ ունեցավ նաև լրագրող Համլետ Ղուշչյանն էլ նշեց, որ երբեք իր հաղորդումներ վարելիս չի հուզվել, բայց հիմա հուզվում է՝ տեսնելով միասնական բազմությանը։

Նա պատմեց, որ Ռուսաստանից է գալիս, որտեղ ստացել է մրցանակ «Տարվա մենեջեր» միջազգային մրցանակը, և հիմա եկել է այդ մրցանակը նվիրելու «թավշյա հեղափոխությանը»: «Սիրելի՛ բարեկամներ, ես ձեր հետ եմ, ձեր կողքին»,- ասաց նա:

 

20։29

Հայ ժողովուրդ, այս օրերին դու ցույց տվեցիր երկար տարիներ ծամծմված միտքը՝ քո հավաքական ուժի մասին, իսկ այսօր քո հավաքական ուժն արդեն պատմություն է ստեղծում: Այսօր հանրահավաքի ժամանակ իր ելույթն այսպես սկսեց քաղաքացիական ակտիվիստ Դավիթ Սանասարյանը: Նա շեշտեց՝ հայ ժողովրդի հավաքական ուժն արդեն ճակատագրեր է փրկում: 

«Նայեք ցանկացած փողոց, ցանկացած քաղաքացու աչքին և կտեսնեք լույսը, սերն ու ժպիտը, որին երկար եք սպասել: Այսօր մենք այստեղ ենք, ոչ թե նրա համար, որ ատում ենք այդ մարդուն, այլ այստեղ ենք, որովհետև սիրում ենք մեր երկիրը, քաղաքացուն, զինվորին ու ոստիկանին»,- ասաց նա:

Դավիթ Սանասարյանը նաև հորդորեց որևէ ոստիկանի նկատմամբ բռնություն  չկիրառել, անգամ, եթե իրենց նկատմամբ կիրառվի.«Ուզում եք՝ ծեծեք ինձ, ես չեմ հակադարձելու»,- շարունակեց Դավիթ Սանասարյանը:

20։23

Գերմանիայի Թյուրինգի նահանգի հայ համայնքի նախագահ Անդրանիկ Վարդանյանը ևս ելույթ ունեցավ Հանրապետության հրապարակում: Նա պատմեց, որ հինգ օր առաջ՝ ուսումը, ընտանիքը, սիրելիին թողած՝ եկել է հայրենիք:

Նա կոչ արեց աշխարհի բոլոր հայերին գալ Հայաստան: «Մենք ամեն մի հայի կարիքը ունենք: Մենք ձեր կարիքը ունենք,- ասաց նա՝ նշելով, որ մի սպասեք, որ հայրենիքում իրավիճակը լավանա ու նոր վերադառնաք,- հիմա՛ վերադարձեք»:

Նա, դիմելով Սփյուռքի հայերին, ասաց, որ պետք չէ անվստահությամբ վերաբերել այս շարժմանը: Ըստ նրա՝ Նիկոլ Փաշինյանին պետք է վստահել: «Ինձ շատերն ասում էին՝ քեզ պե՞տք է գնաս Հայաստան, Գերմանիայում լավ ապրում ես։ Այդ ժամանակ ես նրանց չպատասխանեցի, բայց հիմա եմ պատասխանում՝ ինձ պետք  չէ օտար երկրում լավ ապրելը, ինձ պետք է Հայաստանում լավ ապրել»: 

20։07

Հանրապետության հրապարակում մեկնարկեց ԱԺ «Ելք» խմբակցության ղեկավար Նիկոլ Փաշինյանի հանրահավաքը:  Առաջինը ելույթ ունեցավ նկարիչ Կարեն Արեյանը:

Նա իր խոսքը ուղղեց Հայաստանի ոստիկանությանը՝ նշելով, որ ժողովրդի կողմը անցնելով՝ վերջ կդնեն «մեր բոլորիս գլխին կուտակված խնդիրներին: «Արե՛ք այդ քայլը, և հավատացեք, կդառնաք աշխարհի ժողովուրդների սրտում հերոս»,- ասաց նա:

Նկարիչը նորից դիմեց ոստիկաններին՝ ասելով․ «Դուք դուրս եք եկել ժողովրդի սրտից, ձեր արյունը այս ժողովրդի մեջ է, ոչ թե պագոնների, ինչը ավելի կարևոր է»:

19:41

Այս պահին շարունակում է ցուցարաների կողմից փակ մնալ Մաշտոց-Ամիրյան խաչմերուկը: Ցուցարարները մայթերին և փողոցիմեջտեղում տարբեր խաղեր են խաղում:

19:26

Նիկոլ Փաշինյանը բազմության միջից ուղեկցեց նախագահ Արմեն Սարգսյանին: Լրագրողի հարցին, թե բանակցելու հույս կա՞, Արմեն Սարգսյանը պատասխանեց՝ հուսամ: Լրագրողի մեկ այլ հարցին, թե կարող է ուժ չկիառելու վերաբերյալ երաշխիք տալ, Արմեն Սարգսյանը չպատասխանեց:

19։15

Այս պահին Արմեն Սարգսյանն ու Նիկոլ Փաշինյանը զրուցում են։

19:11

Նախագահ Արմեն Սարգսյանին ուղեկցում է ԱԺ նախկին պատգամավոր Թևան Պողոսյանը:

19:06

Այս պահին ՀՀ նախագահ Արմեն Սարգսյանին արդեն դիմավորեց ԱԺ «Ելք» խմբակցության ղեկավար Նիկոլ Փաշինյանը:

19։03

ՀՀ նախագահ Արմեն Սարգսյանը Հանրապետության Հրապարակում է։ Ցուցարաները, տեսնելով Արմեն Սարգսյանին, սկսեցին «միացում» վանկարկել:

Արմեն Սարգսյանը հրապարակ է իջել ոտքով` Աբովյան փողոցով։ 

18։59

Գյումրիում ոստիկանական բաժանմունք է բերվել Ժուռնալիստների «Ասպարեզ» ակումբի նախագահ Լևոն Բարսեղյանը, որի հետ այս պահին կապ հաստատել չի հաջողվում։  

Ոստիկանությունը Tert.am-ի հետ զրույցում հաստատեց, որ Լևոն Բարսեղյանը բերման է ենթարկվել և ներկայացվել նախաքննություն իրականացնող մարմնին:

18։35

ԱԺ «Ելք» խմբակցության պատգամավոր Նիկոլ Փաշինյանը, որն այս պահին գտնվում է Հանրապետության հրապարակում, արձագանքեց ՀՀ նախագահ Արմեն Սարգսյանի իր հետ հանդիպման կոչին: 


«Եթե Արմեն Սարգսյանը ցանկանում է հանդիպել ինձ, ապա ես պատրաստ եմ 19:00-ին հանդիպել Արմեն Սարգսյանին այս հրապարակում: Այս ժողովրդի ներկայությամբ նրան կընդունեմ և մենք կխոսենք: Ենթադրում եմ՝ ինձ բան ունի ասելու, ապա կարող ենք այստեղ խոսել»,- ասաց նա: 

Դիտարկմանը, որ Դուք հայտարարել էիք, որ իշխանության հետ միայն իրենց հրաժարականի հարցը կքննարկեք, Նիկոլ Փաշինյանն ասաց, որ այդ խոսքը վերաբերում է ՀՀԿ-ին: 

Ինչ վերաբերում է ակցիայի մասնակից Արմեն Սարգսյանի ձերբակալությանը և առաջադրված մեղադրանքին, Փաշինյանն ասաց, թե զավեշտալի մեղադրանք է, ավելին՝ պահանջում է անհապաղ ազատ արձակել Արմեն Սարգսյանին:

 
18։08

Մեր բոլոր գործողությունները լիազորված են ժողովրդի կողմից: Այս մասին հայտարարեց Նիկոլ Փաշինյանը: «Պատկերացնո՞ւմ եք՝ ինչ կլինի, եթե ինձ բռնելու կամ բերման ենթարկելու փորձեր լինեն»,- ասաց նա իր խոսքն ուղղելով ոստիկանությանը նշեց, որ նրանց դիմում է որպես եղբայր, ավագ եղբայր:
 

17։51

Նիկոլ Փաշինյանը և երթի մասնակիցները արդեն Հանրապետության հրապարակում են, և միացել են Մաշտոցի պողոտայի երթի մասնակիցներին: Հրապարակում նրանց շրջափակել են բազմաթիվ ոստիկաններ:


17։49

Արարատի մարզի բնակիչները փակել են Երևան-Մեղրի միջպետական մայրուղին: Ոստիկանները ժամանել են այստեղ: Մի պահ լարված իրավիճակ ստեղծվեց՝ ցուցարարների և մի շարք այլ քաղաքացիների միջև: Ոստիկանները հրեցին՝ քաղաքացիներին՝ դուրս հանելով նրանց ճանապարհից:


17։46

Մի խումբ մայրեր այսօր նախաձեռնել են մանկասայլակներով երթ` միանալով «Իմ քայլը» նախաձեռնությանը: Նրանք նախատեսում են միանալ հանրահավաքի մասնակիցներին: Մասնակիցներից Նինել Հովհաննիսյանը Tert.am-ի հետ զրույցում նշեց, որ իրենք իրենց դժգոհության ձայնը բարձրացնում են հանուն իրենց երեխաների ապագայի, որպեսզի նրանք ապրեն արժանավայել և չարտագաղթեն:

«Սա մեր երեխաների ապագայի հարցն է և չենք կարծում, որ ոստիկանները, տեսնելով երեխաներին, ինչ-որ քայլեր կձեռնարկեն»,-ասաց նա:

17։09


«Ազատություն ռադիոկայանի» տեսախցիկը ֆիքսել է, թե ինչպես է նախկին ՀՀԿ-ական պատգամավոր Առաքել Մովսիսյանը Էջմիածինում` Փարաքարի հատվածում, մի խումբ քաղաքացիների օգնությամբ հրահանգներ տալիս, որ փակեն Երևան եկող ճանապարհը։

«Ազատություն ռադիոկայանի» լրագրողի հարցին, թե ինչու է այստեղ, Առաքել Մովսիսյանն ասաց, որ իր գյուղն է, դրա համար էլ եկել է։ Ինչ վերաբերում է շարժմանը, նախկին ՀՀԿ-ական պատգամավորն ասաց. «Նիկոլը խափում է ժողովրդին»: 

Հարցին, թե ինչո՞ւ նախորդ օրերին ոստիկանությունը չէր թողնում փակել ճանապարհները, իսկ հիմա երբ փակում է Առաքել Մովսիսյանը, ոչինչ չի նախաձեռնում, ոստիկան Մալխասյանն ասաց. «Հանձնարարել ենք, որ ճշտեն», սակայն թե ինչն են ճշտում ոստիկանը չհստակեցրեց։

17։02

«Ելք» դաշինքի ղեկավար Նիկոլ Փաշինյանը և իր հետ երթով շարժվողները անցնում են Տերյան փողոցով:

16:46


Այս պահին Նիկոլ Փաշինյանը և երթի մասնակիցները անցնում են Աբովյան պուրակով:

16։23


Այս պահին Նիկոլ Փաշինյանն ու իր հետ երթով շարժվողները հասան Ազատության պողոտա:


16։10

Այսօր Երևանի Հանրապետության հրապարակը պետք է լեփ-լեցուն լինի, և հենց այդ գործոնն է, որ պետք է կոտրի իշխանությունների համառությունը: Այս մասին Քանաքեռ–Զեյթուն վարչական համայնքում հայտարարեց «Իմ քայլը» նախաձեռնության ղեկավար Նիկոլ Փաշինյանը:

«Այս պահին, իմ կարծիքով, մեր երթին մասնակցում է երեկվա հանրահավաքի չափ մարդ, տարբեր ուղղություններից հազարավոր քաղաքացիներ, երթով շարժվում են դեպի Երևան»,-ասաց նա:

 
15։58

Արարատ քաղաքում Սերժ Սարգսյանի վարչապետության դեմ ցույցի մասնակիցներին խոչընդոտել է քաղաքապետը:  Մասնավորապես` Հայկ Հայկյանը, երիտասարդներին մոտենալով, վերցրել է  նրանց ձեռքի թռուցիկները և ասել. «Ինչո՞ւ եք խանգարում մեր անդորրը: Չե՞ք ամաչում»: 

Երիտասարդները, ի պատասխան քաղաքի ղեկավարի քայլերի,  բացականչել են․ «Մեր քաղաքն է, իրավունք չունեք մեզ մեր քաղաքից հանելու»:  Նրանք շարունակել են իրենց քայլերթը՝ կոչ անելով միանալ իրենց երթին:


15։50

Մաշտոցի պողոտայում շարունակում է լարված մնալ իրադրությունը: Ոստիկանները փորձում են վահաններով հրել քաղաքացիներին՝ ճանապարհը բաց պահելու համար, սակայն քաղաքացիներն իրենք են հետ գնում: 

Պարբերաբար տարբեր ավտովարորդներ կանգնեցնում են իրենց մեքենաները ճանապարհին՝ միանալով բողոքին և կանգնեցնելով երթևեկությունը:


15։33

Սա ոչ բռնի, թավշյա հեղափոխություն է: Այս մասին հայտարարելով` Նիկոլ Փաշինյանը և երթի մասնակիցները քայլելով շարժվում են դեպի Քանաքեռ–Զեյթուն վարչական շրջան:

«Սա ժողովրդավարական, ոչ բռնի, թավշյա հեղափոխություն է, որի վերջնական հաղթանակը սարերի հետևում չէ և այդ վերջնական հաղթանակին պակասում է միայն ձեր անձնական մասնակցությունը: Դուրս արի փողոց և տեր կանգնիր քո իրավունքին»,-ասաց նա:







15։15

Մաշտոցի պողոտայում ոստիկանները փորձեցին բանակցել ավտովարորդների հետ, որ չկանգնեն, շարունակեն իրենց ճանապարհը: Սակայն նրանց մի մասը հրաժարվեց կատարել հորդորը: Ի վերջո, մեքենաները շարունակեցին ճանապարհը՝ ազդանշանները միացնելով:

15։09

Մաշտոցի պողոտայում կրկին լարված իրավիճակ է: Ոստիկանները բռնի ուժով մարդկանց են նստեցնում ոստիկանական մեքենաներ: Այստեղ վարորդները կանգնել են մեքենաները և միացրել իրենց ազդանշանային համակարգերը:

Քաղաքացիները նաև ոստիկաններին ցույց տվեցին իրենց մերկ ձեռքերը՝ բացականչելով՝ ոստիկանները մերն են։ Ցուցարարները բացեցին ճանապարհը, իսկ ոստիկանները հեռացան այդտեղից՝ ուղղվելով այլ կողմ:  

Այստեղ պարզվեց՝ քաղաքացիներից մեկը իր մեքենայով փակել է ճանապարհը: Նա չհամաձայնեց բացել ճանապարհը՝ ասելով՝ կոտրեք: Ոստիկանները հեռացրին վարորդին մեքենայից, և նրանցից մեկը դուրս հանեց մեքենան: Ճանապարհը բացվելուց հետո էլ վարորդները շարունակում են մնալ պողոտայում՝ չվարելով իրենց մեքենաները:  

14։56

Արարատ-Երևան ավտոճանապարհին ոստիկանները ստիպողաբար մեքենան նստեցրին նաև ավտոերթի մասնակիցներին: Քաղաքացիական հագուստով մեկը հարվածեց նաև «Ազատություն» ռ/կ-ի լրագրողին, նրա ձեռքից փորձեցին խլել տեսախցիկը: Լրագրողի հարցին, թե ինչու ոչինչ չեն ձեռնարկում, երբ հարվածում են քաղաքացուն, ոստիկանը միայն ասաց․ «Այն կողմ գնա»:

 
14։46

Արարատ-Երևան ավտոճանապարհին ոստիկանները մոտեցրին քարշակ՝ Նոր Կյանքի համայնքապետ Գարիկ Սարգսյանի ավտոմեքնան հեռացնելու համար:

Գարիկ Սարգսյանը պատմեց, որ զանգել է 1-02 և հայտնել, որ սեփական գույքին դիտավորությամբ հարված է հասցվել և սահմանափակել են իր տեղաշարժի իրավունքը:

Ոստիկանները ցանկանում էին մեքենան կանգնեցնել, սակայն քաղաքացիներ կանգնեցին մեքենայի դիմաց՝ թույլ չտալով էվակուացնել այն:

Այս ընթացքում կանգնեցրած մեքենայի շուրջն ավելացավ քաղաքացիների թիվը: Ավտոերթը խոչընդոտողներից մեկը հայհոյեց ավտոերթին մասնակցողներից մեկին, սակայն ոստիկաններն իրենց մեքենայի մեջ նստեցրին ոչ թե հայհոյողին, այլ ավտոերթի մասնակցողին:

Ոստիկանությունը հրահանգեց, որ ստիպողաբար՝ գրկելով հեռացնեն քարշակի մոտ կանգնող քաղաքացիներին: Ի վերջո, ոստիկաններին հաջողվեց մեքենան՝ մեջը նստած մարդկանցով, բարձրացնել քարշակի վրա:

14։22 

Նիկոլ Փաշինյանը և երթի մասնակիցներն արդեն Ավան վարչական շրջանում են և ողջունում են բնակիչներին:





14։21

Ոստիկանությունը շարունակում է փակ պահել Նիկոլ Փաշինյանի բողոքին ավտոերթով միանալ ցանկացող քաղաքացիների ճանապարհը: Նրանք Արարատ-Երևան ճանապարհի Արտաշատի հատվածում են: Արդեն մեկ ժամից ավելի է, այստեղ ճանապարհը փակ է: 

Վարորդներն ասում են, որ Ոստիկանությունը ոչ մի պատճառաբանություն չի ներկայացնում, թե ինչու իրենց չի թույլատրվում շարունակել ավտոերթը: Նկատելի է, որ ճանապարհի մի հատվածը բաց է, որտեղով անցնում են ավտոերթին չմասնակցող մեքենաները: 

«Ազատություն» ռ/կ-ի լրագրողի նկատառմամբ՝ ոստիկանների հետ կանգնած են քաղաքացիներ, որոնք ներկայացել են որպես համայնքապետներ և որոնք Արարատ քաղաքում խոչընդոտում էին այնտեղի քաղաքացիների՝ երթին մասնակցելուն: Լրագրողի հետ զրույցում նրանք նշեցին, որ չեն եկել խոչընդոտելու երթի մասնակիցներին, այլ փորձում են հետ կանգնեցնել մարդկանց սխալ քայլերից: «Իրենք Նիկոլին են պաշտպանում, մենք էլ մեր վարչապետին»,- ասաց նա՝ Սուրենավանի համայնքապետ Կարո Կարապետյանը: Վերջինիս նույն հորդորներով միացել էր Արարատ գյուղի համայնքապետը:

Նոր կյանքի համայնքապետ Գարիկ Սարգսյանը, որը ևս միացած էր ավտոերթին, պատմեց, որ իրենց ակցիայի մասին իրենք տեղեկացրել են ոստիկանությանը, համաձայնություն ստացել են: Հիմա, ըստ նրա, զարմացած են, թե ինչու են ճանապարհը փակել: 

Գարիկ Սարգսյանի խոսքով՝ իրենք տեղի ունեցածը ներկայացրել են իրավապաշտպանների, Մարդու իրավունքների պաշտպանի գրասենյակին, լրագրողին, սպասում են արձագանքի: 

Սուրենավանի և Արարատ գյուղի համայնքապետները մոտեցան Նոր Կյանքի համայնքապետին և փորձեցին համոզել նրան, որ գնա, նա էլ պատասխանեց, որ ոստիկաններն են փակել ճանապարհը:

Մի մեքենա հարվածեց ավտոերթի մասնակիցների մեքենային, ինչին Ոստիկանությունը չարձագանքեց: Դրան, ի պատասխան, Նոր Կյանքի համայնքապետը կոչ արեց քաղաքացիներին միանալ և թույլ չտալ, որ տաքսի մեքենան, որի մեջ ինքն էլ էր նստած, վնասեն:

Ոստիկաններից մեկը նշեց, որ կարգախմբի են հրահանգել, որ պարզեն, թե ինչ մեքենա է հարվածել ավտոերթի մասնակիցների մեքենաներին, չբացատրեց, թե ինչու տեղում կանգնած ոստիկանները ոչինչ չարեցին՝ հետ պահելու մեքենան հարվածողներին:

14։09


Այս պահին Նիկոլ Փաշինյանը և ցուցարարները շարժվում են Պաշտպանության նախարարության ուղղությամբ։  «Երեկ ես հայտարարեցի, որ Սերժ Սարգսյանը չի տիրապետում իրավիճակին: Այդ հայտարարությանն ի պատասխան, նա որոշել էր, որ այսօր մենք երթ չպետք է անեինք, բայց դուք տեսաք, որ մենք երթ իրականացնում ենք ՀՀ օրենքի տառին և ոգին համապատասխան։ Սա ևս մեկ անգամ արձանագրում է, որ Սերժ Սարգսյանը ՀՀ-ում իշխանություն չունի այլևս, և մնում է սրա մասին իրեն տեղեկացվի»,–ասաց Նիկոլ Փաշինյանը:


14:05

Այս պահին լարված իրավիճակ է Մաշտոցի պողոտայում: Ոստիկանները բռնի ուժով ոստիկանական մեքենաներ նստեցրին քաղաքացիների: Այստեղ կա ոստիկանական մեծ խումբ, որոնք չեն պատասխանում քաղաքացիների հարցերին, թե ինչու են բռնանում քաղաքացիների վրա:

Խմբով ոստիկանները վազեցին մի քաղաքացու ուղղությամբ և նրան բռնի նստեցրին ոստիկանական մեքենան:

13:30


Նիկոլ Փաշինյանի գլխավորությամբ ցուցարարներն այս պահին Մոլդովական փողոցով գնում են դեպի Պաշտպանության նախարարության շենք։


13:25


Երթի մասնակիցները հասան Նորքի երկրորդ զանգված: Բողոքի ցույցի մասնակից շատ աղջիկների ձեռքին վարդեր կան:


13։15

Ես դիմում եմ «Դաշնակցական», ավանդական կուսակցությունների մեր սփյուռքահայ գործընկերներին` բարձրաձայնեք ձեր կարծիքը: Այս մասին կոչ արեց Նիկոլ Փաշինյանը` հորդորելով ներկայացնել Սերժ Սարգսյանին իրավիճակը:

«Եթե իմ ձերբակալման, կալանավորման ապօրինի փորձ լինի` Ազգային ժողովի նիստ պետք է տեղի ունենա: Կոչ եմ անում այդ նիստի ժամանակ դուրս գալ փողոց, և դա կդառնա արդեն հեղափոխության վերջնական հաղթանակը»,- ասաց նա և նշեց, որ սա քաղաքական գործիչների պայքար չէ, այլ քաղաքացիների պայքար է: 

Նիկոլ Փաշինյանի ձևակերպմամբ` իր ընտանիքի անվտանգության համար մտահոգություն չունի, քանի որ ինքը և իր ընտանիքը մշտապես եղել են հանուն ՀՀ ազատության և օրինականության համար մղվող պայքարի մեջ: 

«Ես որևէ մտավախություն չունեմ, քանի որ դեռ տասը տարի առաջ եմ հայտարարել, որ իմ կյանքը դրված է հանուն Հայաստանի ազատության մղվող պայքարի զոհասեղանին, ես ոչ մի մտավախություն չունեմ: Եթե որևէ մեկը մտածում  է, որ այդպիսի գործոնով կարող է ինձ կանգնեցնել` նա ուղղակի ինձ չի ճանաչում և իմ ընտանիքին չի ճանաչում»,-ասաց նա:


13:01


Պատրաստ եմ քննարկել Սերժ Սարգսյանի հեռացման պայմանները: Այս մասին հայտարարեց Նիկոլ Փաշինյանը`արձագանքելով ՀՀ վարչապետ Սերժ Սարգսյանի` երկխոսության կոչին: 

«Երեկ ասացի, որ մենք վենդետաներ չենք ուզում, վրեժխնդրություն չենք ուզում, ուզում ենք, որ իշխանության փոխանցումը ժողովրդին մաքսիմալ անցնցում տեղի ունենա: Ես էլ եմ կարծում, որ կարող են լինել անդառնալի կորուստներ, դրա համար Սերժ Սարգսյանին կոչ եմ անում անհապաղ ընդունել մեր բոլոր պայմանները»,-ասաց նա:

Նիկոլ Փաշինյանը նշեց, որ ուլտիմատումով չի խոսում և որևէ մեկին խորհուրդ չի տալիս իրենց հետ այդպես խոսել: «Սա բխում է իրավիճակի սթափ գնահատականից»,-ասաց նա: 

Նիկոլ Փաշինյանը նշեց, որ եթե Սերժ Սարգսյանը մտավախություն ունի, որ իր ընտանիքը, թոռները վատ վերաբերմունքի կարժանանան, ինքը երաշխավորում է, ժողովուրդը երաշխավորում է, որ այդպիսի բան լինել չի կարող, քանի որ Հայաստանում ներհայաստանյան թշնամանքի էջը փակված է:

Նա նաև նշեց, որ «Մարտի 1»–ը չի կարող կրկնվել, քանի որ ի տարբերություն մարտի մեկի, այսօր ողջ հայությունն աջակցում է շարժմանը, և կոչ արեց սփյուռքի հայրենակիցներին այդ աջակցությունը մեծացնել, անընդհատ զանգերով, նամակներով ճնշել իշխանությանը: Որպես անարյուն փոխանցման երաշխավոր նա կոչ արեց  Սերժ Թանկյանին, Շառլ Ազնավուրին, Հայաստանի և սփյուռքի մտավորականներին անհապաղ խմբվեն և նախաձեռնություն ցուցաբերեն: «Ես չեմ հավատում, որ ՀՀ-ում կա ոստիկան, զինվորական, որ պատրաստ է մեզ վրա կրակել: Հայ ազգի ցանկացած ներկայացուցչի կրակոց պետք է ուղղված լինի շփման գծից այն կողմ` անհրաժեշտության դեպքում»,-ասաց նա և կոչ արեց այս իրավիճակը չհամեմատել այլ ժամանակների հետ, քանի որ ներկայումս ուրիշ իրավիճակ է, և որևէ եզր չկա նախկին իրադարձությունների հետ: 

Նա նշեց, որ այսօր ամեն քաղաքացի պայքարում է ընտանիքի արժանապատվության համար: 

Ես շփման համար փակ չեմ, բայց քննարկման թեման կարող է լինել Սերժ Սարգսյանի հեռացման պայմանները: Այս մասին շարունակեց պնդել Նիկոլ Փաշինյանը և նշեց, որ այդ պայմանները պետք է ընդունեն ոչ միայն ինքը, այլ շարժման մասնակիցներին:

«Սերժ Սարգսյանն իրականում չի տիրապետում իրավիճակին, ես կարծում եմ, որ այնքան էլ լավ չի պատկերացնում, թե ինչ է կատարվում Հայաստանում»-ասաց նա։ 


12:45

Նիկոլ Փաշինյանը ներողություն խնդրեց քաղաքացիներից անհարմարությունների համար, և նշեց, որ դա անում են ավելի մեծ անհարմարությունից ազատելու համար:

Նրան մոտեցավ մի կին և նշեց, որ քաղաքացիական հագուստով անձը հարվածել է իր 11-ամյա երեխային, կոտրել անձրևանոցը և մեկ ժամ է, ինչ չի կարողանում գտնել իր տղային: 

Նիկոլ Փաշինյանը կոչ արեց քաղաքացիներին` թև թեևի տված, կազմակերպված առաջ շարժվել, որպեսզի լարվածությունը թուլացնեն: Նշենք, որ  Նորքի 5-րդ զանգվածից երթի մասնակիցները շարժվում են դեպի Ավան:

12։34

Ապրիլի 21-ին, ժամը 11:30-ի դրությամբ ոստիկանության տարբեր ստորաբաժանումներ են բերվել 11 քաղաքացի: Այս մասին Tert.am-ի հետ զրույցում ասաց ՀՀ ոստիկանության լրատվական վարչության ԶԼՄ-ների հետ կապի բաժնի պետ Էդգար Ջանոյանը:

Նշենք, որ երեկ ժամը 18։00-ի դրությամբ ոստիկանություն էր տարվել 233 ցուցարար:

 
12։20

Նիկոլ Փաշինյանը քաղաքացիների` մանդկանց բերման ենթարկելու մտահոգությանը արձագանքեց, որ հազարավոր մարդիկ կան այնտեղ, ո՞ր մեկին են տանելու, և հարցադրում արեց, թե երկու միլիոն մարդ հնարավո՞ր է  տանել: Իսկ երեխաների վերաբերյալ նա ասաց. «Երեխեքի ցավը տանեմ, կգնան, երեք ժամ կհանգստանան, կգան: Սիրելի´ ոստիկաններ, ոնցոր միշտ անում եք, բերման ենթարկվածներին, խնդրում ենք, սուրճ հյուրասիրեք, կոնֆետ, քաղցրավենիք, որովհետև մենք ձեր եղբայրն ենք, դուք էլ մեր եղբայրն եք»: Այնուհետև հավաքի մասնակիցները երթով շարժվեցին առաջ դեպի Ավան թաղամաս:

12։12

Նիկոլ Փաշինյանը զանգահարեց Նոր Նորքի ոստիկանության բաժին և իրազեկեց հավաքի մասին: «Ես Ձեզ պաշտոնապես իրազեկում եմ, որ հավաքների ազատության մասին օրենքի 26-րդ, 27-րդ հոդվածներով, շտապ կարգով հավաք եմ  կազմակերպում»,-ասաց նա հեռախոսով և ներկայացրեց երթուղին` ըստ որի անցնելու են Ավանով, Պաշտպանության նախարարության կողմով և հասնելու են «Հարսնաքար» ռեստորանի խաչմերուկ:

Վալերի Օսիպյանը առաջարկեց կազմակերպիչ ոստիկանությանը ներկայացնել երթուղին, իսկ Նիկոլ Փաշինյանը նշեց, որ այդ մասին իրազեկել է տարածքային ստորաբաժանմանը: Վալերի Օսիպյանը պահանջեց չսահմանափակել տրանսպորտային միջոցների, շենք շինությունների աշխատանքը, և Ոստիկանությունը կապահովի երթը: «Խնդիր չկա»` արձագանքեց Նիկոլ Փաշինյանը և կոչ արեց ծափահարել ոստիկանությանը:

12։10

Սերժ Սարգսյանի վարչապետության դեմ պայքարի կազմակերպիչներից Դավիթ Սանասարյանը մի քանի աջակիցների հետ ավտոերթ է անցկացնում Էրեբունի վարչական շրջանում:


12։09

Ապրիլի 21-ին` ժամը 11:30-ի դրությամբ, ոստիկանության տարբեր ստորաբաժանումներ են բերվել 11 քաղաքացիներ: Այս մասին Tert.am-ի հետ զրույցում ասաց ՀՀ ոստիկանության լրատվական վարչության ԶԼՄ-ների հետ կապի բաժնի պետ Էդգար Ջանոյանը:

Նշենք, որ երեկ` ժամը 18։00-ի դրությամբ, ոստիկանություն էր տարվել 233 ցուցարար:

 




12։08

Գայի պողոտայում բավական լարված է իրավիճակը: Հատուկջոկատայիններն արդեն մոտ 10 հոգու բերման են ենթարկել: Այս մասին հայտնում է Tert.am-ի թղթակիցը:

Ոստիկանները մոտ 30 հոգով հեռացրել են փողոցը փակած մեքենան` այդ ընթացքում բավականին վնասելով այն:

Քաշքշոցի ընթացքում մարդկանցից մեկի ինքնազգացողությունը վատացել է: Նա այժմ պառկած է գետնին և սպասում է շտապօգնության մեքենային:

Tert.am-ի թղթակիցը նաև հայտնում է, որ ոստիկանությունն անընդհատ նոր ուժեր է ավելացնում:

12։04
 

Սիրելի ՀՀ ոստիկաններ և ժողովուրդ, ձեր ուշադրությունն եմ հրավիրում, սա ՀՀ օրենքն է հավաքների ազատության մասին: Այս մասին Նոր Նորքի հինգերորդ զանգվածում հայտարարեց Նիկոլ Փաշինյանը և ընթերցեց օրենքի համապատասխան հոդվածը:

«Հիմա ես պաշտոնապես հայտարարում եմ, որ այսօրվա հավաքը նվիրված է այն հարձակումներին, որոնք տեղի են ունեցել ակտիվիստների նկատմամբ քաղաքացիական հագուստով ինչ-որ անձանց կողմից, նրանք մեքենաներ են ջարդել»,- ասաց նա:

Վալերի Օսիպյանն ընդհատեց` հարցնելով. «Նախապես գիտեիք, որ ձեր ակտիվիստներից պետք է տուժեին, որ դեռ երեկվանից հայտարարել եք հավաքի մասին: Դուք ծրագրե՞լ եք»:

Նիկոլ Փաշինյանը նշեց, որ այս պահին իրենք կատարում են  ոստիկանների պահանջը` դե յուրե 7-րդ զանգվածի «Նոր տուն» խանութի մոտ սկսված հավաքը համարում են դադարեցված: «Սիրելի՛ ոստիկաններ, ձեր պահանջը դադարեցրինք։ Հիմա հավաքների ազատության մասին օրենքի 27-րդ հոդվածով հրավիրում ենք նոր շտապ հավաք` արձագանքելու համար այն ապօրինությունները, որոնք Հայաստանում տեղի են ունենում ակտիվիստների նկատմամբ»,-ասաց նա:





11։44

Էջմիածնում ևս բողոքի ցույցեր են: Մի քանի տասնյակ էջմիածինցիներ երթ են անցկացնում քաղաքի փողոցներով՝ կոչ անելով բոլորին միանալ իրենց: Ցուցարարների կողքով անցնող մեքենաները ազդանշաններ են տալիս՝ ի աջակցություն բողոքի գործողության: 

Նշենք, որ այսօր` ժամը 18:00-ին, Էջմիածնում նախատեսված է հանրահավաք անցկացնել:
 

11։43

Երևանի փոխոստիկանապետ Վալերի Օսիպյանը Նիկոլ Փաշինյանի հետ զրույցում զգուշացրեց պահպանել օրենքը: «Եթե հավաքը լիներ սահմանված կարգով, օրենքը չխախտվեր, բազմիցս ասել եմ, որ ուղեկցում ենք, ապահովում ենք երթի մասնակիցների անվտանգությունը, բայց բազմիցս խնդրել ենք, որ չսահմանափակվի տրանսպորտի ազատ տեղաշարժը»,- ասաց Վալերի Օսիպյանը: 

Նիկոլ Փաշինյանը նշեց, որ թե այս պահին ոչ մեկ չի սահմանափակել երթևեկությունը,  իսկ Վալերի Օսիպյանն ասաց, որ եթե չլիներ հորդոր, կլիներ այն պատկերը ինչ եղել է նախկին օրերին: 

Նիկոլ Փաշինյանը ժամանակ խնդրեց քննարկել առաջարկը: «Ժողովո՛ւրդ, մենք հիմա պետք է հասկանանք և ոստիկանության առաջարկը քննարկենք, մանրամասն և բազմակողմանի պետք է քննարկենք»,-ասաց նա:
 




11։37

Ոստիկանության և երթի մասնակիցների միջև քաշքշոց սկսվեց, ոստիկանները փորձում էին տարածքից հեռացնել ցուցարարներին, ինչի ընթացքում ոստիկաններից մեկը կարծես հարված ստացավ և ընկավ գետնին: Նիկոլ Փաշինյանը հայտարարեց, որ ով ոստիկանին հարվածում է, նա այս շարժման հետ կապ չունի:

«Ոստիկանին գցել գետին ո՞րն է»,- ասաց Երևանի փոխոստիկանապետ Վալերի Օսիպյանը և նրան պատասխանեցին, որ եթե եղել է այդպիսի բան անող, ապա նա սադրող է: 

Նիկոլ Փաշինյանը հայտնեց, որ ոստիկաններին վիրավորողը հանրապետական կուսակցության կողմից ուղարկված սադրիչներն են: Նիկոլ Փաշինյանը կոչ արեց մի քիչ հանգստանալ՝ կիրավիճակը հասկանալու համար:

11։30

Նիկոլ Փաշինյանը կոչ արեց մասնակիցներին համախմբվել իր շուրջ:  «Ես կոչ եմ անում Երևանի մյուս հատվածներում փակել փողոցներ, խաչմերուկներ, որպեսզի Ոստիկանությունը հնարավորություն չունենա ուժերը կենտրոնացնել: Բոլորդ մոտեցեք այստեղ, որպեսզի բերման ենթարկելու հնարավորություն չունենան, թև թևի մտեք»,-ասաց նա:

Նիկոլ Փաշինյանը ոստիկանների գործողությունների այս փոփոխությունը պայմանավորեց նրանով, որ նրանք հասկացել են, թե հեղափոխությունը տեղի է ունենում և նրանց թվում է թե դա կարելի է հետ շրջել, բայց նրանք սխալվում են: «Եթե ինձ տանեն, ձերբակալեն, բերման ենթարկեն, ես ՀՀ քաղաքացիներին կոչ եմ անում փակել ճանապարհները, ոստիկանական բոլոր բաժինները, գերատեսչությունները շրջափակել, դուրս գալ զանգվածային բողոքի ցույցերի և գալ ինձ ազատելու»,-ասաց նա:


11։26

Սա ժողովրդավարական թավշյա, ոչ բռնի հեղափոխություն է և այդ հեղափոխության վերջնական հաղթանակին պակասում է քո անձնական մասնակցությունը, և մենք ձեզ կոչ ենք անում դուրս գալ փողոց: Այս մասին հայտարարեց Նիկոլ Փաշինյանը՝ իր կողմնակիցների հետ շարունակելով երթը: Նա կոչ արեց մերժել կոռումպացված իշխանությանը և դուրս գալ փողոց՝ տեր կանգնել հայրենիքին, հաղթանակին:

Ոստիկանությունը փորձեց խոչընդոտել երթը և հրմշտոց սկսվեց: Չնայած դրան երթի մասնակիցները փորձեցին շարունակել երթը և Նիկոլ Փաշինյանը կոչ արեց բոլորին դուրս գալ փողոց:

Երևանի փոխոստիկանապետ Վալերի Օսիպյանը կոչ արեց դադարեցնել երթը: Նիկոլ Փաշինյանը նշեց, որ Անհայտ անձինք կոտրել են մեր շարժման մասնակիցների մեքենաները, և Ոստիկանությունը ոչինչ չի ձեռնարկել և սա բողոքի երթ է կողմնակիցների նկատմամբ հարձակումների կապակցությամբ:

«Օրենքը լիազորում է ցանկացած քաղաքացու առանց իրազեկման անցկացնել երթ, քանի դեռ երթը բնույթով խաղաղ է, Ոստիկանությունը պարտավոր է աջակցել հավաքի անցկացմանը»,-ասաց նա:

 
11։10

Նոր Նորքի 7-րդ զանգվածում Դավիթ Բեկի փողոցից մեկնարկեց Նիկոլ Փաշինյանի և նրա աջակիցների քայլերթը: Նիկոլ Փաշինյանը կոչ արեց ոստիկաններին ճանապարհը չփակել: «Հարգելի ոստիկաններ խնդրում ենք թողեք մեր երթը բնականոն ընթանա»,-ասաց նա: Այնուհետև երթի մասնակիցները վանկարկելով շարժվեցին առաջ:

11։00

Էդգար Գասպարյան անուն–ազգանունով օգտատերը ֆեյսբուքյան իր էջում տեսանյութ է հրապարակել, որում երևում է, թե Աբովյան փողոցում ինչպես են ոստիկանները մահակով և ոտքերով հարվածում փողոցը փակած ավտոմեքենային։ Տեսանյութը կարող եք դիտել ստորև։

––––––––––––––––––––––––––––––––––––––





ԱԺ «Ելք» խմբակցության ղեկավար Նիկոլ Փաշինյանի նախաձեռնած քաղաքացիական անհնազանդության շրջանակներում այսօր մի քանի տասնյակ ցուցարարներ փակել են Նոր Նորքի Դավիթ Բեկի փողոցը։ Մասնավորապես փակ է փողոցի` Վազգեն Սարգսյանի անվան ռազմական համալսարանի հատվածը:

Ինչպես բողոքի ակցիայի վայրից հայտնում է Tert.am-ի թղթակիցը, ժամանել է երկու ոստիկանական մեքենա։ Ոստիկաններն այժմ փորձում են բացել ճանապարհը: Մեկ մարդու արդեն բերման են ենթարկել։ 


Հիշեցնենք, որ Նիկոլ Փաշինյանը երեկ Հանրապետության հրապարակում տեղի ունեցած հանրահավաքի ժամանակ հայտարարել էր, որ իրենք պատրաստ են քննարկել վարչապետի Սերժ Սարգսյանի հրաժարականի ժամկետներն ու դրա հետ կապված որոշ պայմաններ:

Նիկոլ Փաշինյանը նաև պատասխանել էր երկխոսություն սկսելու իշխանությունների առաջարկին և նշել 4 պայման։ Մասնավորապես, ըստ նրա,  Սերժ Սարգսյանը պետք է հրաժարական տալի վարչապետի պաշտոնից, Ազգային ժողովը պետք է վարչապետ ընտրի ժողովրդի թեկնածուին, ձևավորվում է ժամանակավոր կառավարություն և Հայաստանի օրենսդրությամբ վարչապետ նշանակվելուց 20 օր հետո ԱԺ-ն պետք է հավանություն տա կառավարության ծրագրին և երբ ձևավորվի ժամանակավոր կառավարություն, քաղաքական պայմանավորվածության համաձայն Ազգային ժողովը չպետք է ընդունի կառավարության ծրագիրը, ինչից հետո իրավունքի ուժով պետք է տեղի ունենան արտահերթ խորհրդարանական ընտրություններ։