«Կոչ ենք անում Կիևի արևմտյան հովանավորներին սանձել ուկրաինական իշխանություններին». Լավրովն ու Պեսկովն արձագանքել են Ազովի ծովում տեղի ունեցած միջադեպին

15:18 • 26.11.18

ՌԴ նախագահի գրասենյակն ու արտաքին գործերի նախարարությունն արձագանքել են Կերչի նեղուցում Ուկրաինայի ռազմածովային ուժերին պատկանող երեք նավերի մասնակցությամբ տեղի ունեցած միջադեպին:


«Դա շատ վտանգավոր սադրանք էր, որը հատուկ ուշադրություն և պարզաբանում է պահանջում»,- ասել է ՌԴ նախագահի մամուլի խոսնակ Դմիտրի Պեսկովը, փոխանցում է russian.rt.com-ը:


Իր հերթին, ՌԴ ԱԳ նախարար Սերգեյ Լավրովը միջադեպը Կիևի կողմից սադրանք է անվանել, գրում է interfax.ru-ն:


Լավրովի խոսքով՝ Ուկրաինան խախտել է միջազգային իրավունքի նորմերը և սպառնալիք ստեղծել Կերչի նեղուցի շրջանում նավերի տեղաշարժի համար: 


Ուկրաինայում ռազմական դրություն մտցնելը ՌԴ ԱԳՆ ղեկավարը Կիևի կողմից «իրավիճակից դուրս գալու» փորձ է անվանել: Նա կոչ է արել Արևմուտքի երկրներին հետ պահել Կիևին կոնֆլիկտի սրումից:


«Խստորեն կոչ ենք անում Կիևի արևմտյան հովանավորներին սանձել բոլոր նրանց, ովքեր փորձում են ռազմական հիստերիայի ֆոնին քաղաքական միավորներ շահել սպասվող ընտրությունների հետ կապված»,- ասել է Լավրովը:


Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով: Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին: Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:


Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ:


Ինչպես ավելի վաղ հաղորդել էր tert.am-ը, համացանցում են հայտնվել Ազովի ծովում ՌԴ սահմանը «խախտած» ուկրաինական նավերի լուսանկարներն ու տեսանյութերը: