Վերաքննիչ դատարանը մերժեց Ռ. Քոչարյանի պաշտպանների՝ Ա. Դանիելյանին ներկայացրած ինքնաբացարկի միջնորդությունը (տեսանյութ)

11:45

Հովհաննես Խուդոյանի հարցադրումներից հետո դատախազ Պետրոս Պետրոսյանը օրենսդրության մի շարք դրույթներ թվարկեց, որոնք հիմնավորում են դատախազության դիրքորոշումը: Նա անթույլատրելի համարեց գործի վարույթում եղած նյութերի հրապարակումը, ըստ նրա՝ դա կարող է վնասել այլ անձանց շահերը։ Նա նշեց, որ առաջին ատյանի դատարանը թերագնահատել է այս հանգամանքը և գերագնահատել ընդհանուր գործի և առանձին վարույթ առանձնացված մասի միջև կապը:

Խուդոյանը պատասխանեց․ «Պարոն Պետրոսյանն իմ միտքն այնպես ձևափոխեց, որ եթե ես ինձ կողքից լսեի, կխնդրեի ինձ լիցենզիայից զրկել նման հիմարություն ասելու համար։ Ես չեմ ասում, որ նախաքննական նյութերի մեջ պետք է լինի դատարանում մեղադրանքից հրաժարվելու վերաբերյալ որոշում։ Ես ասում եմ, որ նախաքննական նյութերի մեջ առկա են և կարող են առկա լինել որոշումներ, օրինակ՝ այլ անձանց մեղադրանք առաջադրելու, մեղադրանքից հրաժարվելու, վարույթը կառչելու, որոնք կարող են հիմնական լինել այն որոշումների համար, որոնք մենք տեսել ենք  դատարաններում»։

11։24

Ռոբերտ Քոչարյանի պաշտպան Հովհաննես Խուդոյանը գործի մասով առաջարկեց մի քանի հարց քննարկել։ Առաջինը՝ արդյո՞ք դատախազությունը՝ Պետրոս Պետրոսյանի գլխավորությամբ գտնում է, որ պահանջվող նյութերում չեն կարող այնպիսի տվյալներ լինել, որոնք պաշտպանության կողմը կարող է որպես պաշտպանական պրակտիկա օգտագործել։

Խուդոյանը հիշեցրեց, որ 2008 թ. «Մարտի 1-ի» իրադարձությունների բացահայտման վերաբերյալ քրեական գործ է հարուցվել, ավելի ուշ ինտենսիվ քննություն է սկսվել ՀՀ հատուկ քննչական ծառայությունում, որը մինչև այսօր շարունակվում է։

«2019 թ. փետրվարին քրեական գործից թվով 76 հատոր է անջատվել, որոնք ծանոթացման են ներկայացվել, որից հետո ևս երեք հատոր ավելացվել է գործին, և այդ վիճակով էլ ուղարկվել է դատարան։ Ի՞նչ կար այդ առանձնացված նյութերի ծավալում։ Առաջին 13 հատորը՝ սկսած 2008 թ. մինչև 2018 թ. ներառյալ, «Մարտի 1-ին» տասը մահացածների գործերի կիսատ քննություններն են։ Այնտեղ կան բազմաթիվ նյութեր, որոնք վերաբերվում են Ազատության հրապարակում տեղի ունեցած իրադարձություններին և կոնկրետ մարտի 1-ին տեղի ունեցած իրադարձություններին»,- ասաց նա և հավելեց, որ ամեն դեպքում  Ռոբերտ Քոչարյանի՝ ՀՀ նախագահ չհանդիսանալու պահից հետո շատ գործեր են միացվել «Մարտի 1-ի» գործին, որոնք բացարձակ կապ չեն ունեցել այդ գործի հետ։

Ըստ նրա՝ ուսումնասիրելով բոլոր փաստաթղթերը՝ տեսնել է, որ նույն ցուցմունքը մի քանի տեղ դրված է, օրինակ՝  քսան անձի ցուցմունքներ կրկնվում են մի քանի տեղ։ Վկաների լրացուցիչ արձանագրություններն ուսումնասիրելով՝  փորձել է համեմատության գտնել հիմնական արձանագրությունը, սակայն տեսնել է, որ արձանագրությունը բացակայում է։

Քրեական գործի հատորների առաջին էջերին ծանոթանալով՝ տեսել է, որ  յուրաքանչյուր հատոր հավաքվել է մնացյալ քրեական գործի մի քանի  հատորներից։ Ըստ նրա՝ նույնիսկ 2018 թ. սկսված քննությունից ամբողջական նյութեր չեն ներկայացվել։

10։08

ՀՀ երկրորդ նախագահ Ռոբերտ Քոչարյանի գործով բողոքի քննությանը՝ Քոչարյանի պաշտպանների կողմից Վերաքննիչ քրեական դատարանի դատավոր Արմեն Դանիելյանին ներկայացրած ինքնաբացարկի միջնորդությունը մերժվեց։

Առայժմ դատարանը անցել է բուն բողոքի քննությանը։

10։05

Վերաքննիչ քրեական դատարանում հրապարակվում է ՀՀ երկրորդ նախագահ Ռոբերտ Քոչարյանի պաշտպանների՝ Վերաքննիչ քրեական դատարանի դատավոր Արմեն Դանիելյանին ներկայացրած ինքնաբացարկի միջնորդության վերաբերյալ որոշումը։

Հիշեցնենք, որ օրեր առաջ ՀՀ երկրորդ նախագահ Ռոբերտ Քոչարյանի պաշտպաններ Հովհաննես Խուդոյանն ու Արամ Վարդևանյանն ինքնաբացարկի միջնորդություն էին ներկայացրել Վերաքննիչ քրեական դատարանի դատավոր Արմեն Դանիելյանին, ում նախագահությամբ  մեկնարկել էր «Մարտի 1»-ի մայր գործով բոլոր նյութերը պաշտպաններին տրամադրելու գործով առաջին նիստը։

Ներկայացնելով մի շարք հիմքեր՝ պաշտպաններն ընդգծել էին, որ դատավոր Դանիելյանը չի կարող սույն գործով անաչառ որոշում կայացնել։ Նրանք հիշատակել էին, մասնավորապես, այն դատական նիստը, որի ժամանակ Արմեն Դանիելյանը թույլ չի տվել ելույթ ունենալ Ռ․ Քոչարյանին ու նրա փաստաբանական թիմի անդամներին։ 

Նշենք, որ ավելի վաղ պաշտպան Հովհաննես Խուդոյանը նախաքննության ընթացքում միջնորդություն էր ներկայացրել՝ պահանջելով տրամադրել «Մարտի 1»-ի մայր գործով բոլոր նյութերը։ Սակայն քննիչը մերժել էր: Փաստաբանը բողոք էր ներկայացրել դատարան, և 2019 թ․ նոյեմբերին Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, բավարարել էր բողոքը՝ պարտավորեցնելով ՀՔԾ-ին Ռոբերտ Քոչարյանի պաշտպաններին տրամադրել «Մարտի 1»-ի մայր գործով բոլոր նյութերը։ Դատախազությունը բողոքարկել է դատարանի նշված որոշումը։

Հիշեցնենք, որ նախորդ տարի հունիսի 25-ին Արմեն Դանիելյանը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին Արցախի ներկա և նախկին նախագահների անձնական երաշխավորությամբ ազատ արձակելու և Ռոբերտ Քոչարյանի և մյուսների վերաբերյալ գործի վարույթը կասեցնելու և ՍԴ ուղարկելու մասին որոշումները։