«Մեկ–մեկ հավատս չի գալիս, որ  Տաթևն իմ երեխան է». Հասմիկ Կարապետյանն իր դստեր մասին

Երգչուհի Հասմիկ Կարապետյանի երկար սպասված բալիկը ծնվել է անցած տարի։ Երգչուհին իր ամուսնուն դուստր է պարգևել։ Ծնողները նրան անվանել են Տաթև։ Tert.am Life–ը երգչուհու հետ զրուցել է իր զգացողությունների, երեխայի և առաջիկա ծրագրերի մասին։

 

 

-Հասմիկ, ինչպե՞ս է սկսվում Ձեր օրը հիմա:

 

-Պատասխանատվությամբ, հուզմունքով, ուշադրությամբ. այն կանայք, որոնք մայր են դարձել, կհասկանան` ինչպես է փոքրիկի հետ օրը սկսվում։ Առավոտյան, գրեթե, ժամանակ չեմ ունենում ինձնով զբաղվել։ Երբ փոքրիկս արթնանում է, կերակրում եմ ու լողացնում։

 

-Այդ հարցերում Շանթն օգնո՞ւմ է Ձեզ։

 

-Ամուսինս միշտ կողքիս է ու ամեն հարցում օգնում է ինձ։ Նա շատ ավելին կարող է անել, եթե ես թույլ տամ։ Կանանց մոտ ընդունված է նման աշխատանքներն ավելի շատ վստահել կանանց, քան տղամարդկանց։ Սակայն զգում եմ, որ պետք չէ այդպես անել։

 

 

-Ասում են՝ երեխայի ծննդից հետո շատ կանայք փոխվում են։ Ի՞նչ կասեք Ձեր մասին։

 

-Դուստրս ինձ փոխել է, թե ոչ,  չեմ կարող միանշանակ ասել։ Ինքս իմ մասին դժվարանում եմ խոսել։ Մտերիմներս, հարազատներս ու ընկերներս ասում են, որ մեծացել եմ։ Ոչ թե տարիքով, այլ կյանքի վերաբերյալ հայացքներով։ Շատերը չէին սպասում, որ ես մեծացող կանանցից եմ, որոնց մեջ անկախ տարիքից միշտ մնում է աղջկական հատկանիշները։ Մայր լինելն ավելի պատասխանատու ֆունկցիա է։ Կարծում եմ՝ արդարացրել եմ բոլորի սպասումները։

 

-Հասմիկ, երբ մամուլում տարածվեց, որ ծնվել է Ձեր առաջնեկը, համացանցը լցվեց շնորհավորանքներով ու բարեմաղթանքներով։ Ծանոթ, թե անծանոթ ուրախանում էին։ Ի՞նչ զգացողություններ ունեիք այդ ժամանակ:

 

-Ինձ համար կրկնակի, եռակի անգամ տոն էր, քանի որ երկար եմ սպասել այս երջանկությանը։ Ոչ ոքի համար գաղտնիք չէ, որ երկար ժամանակ իմ անձնականում նորություններ չկային, որովհետև ոչինչ չէր ստացվում։ Միշտ ասել եմ, որ ուզում եմ ունենալ առողջ լուրջ ընտանիք, բալիկ։ Կարծում եմ՝ յուրաքանչյուր կին պետք է իր կյանքում գոնե մեկ անգամ զգա մայրության բերկրանքը։ Ինչքան էլ այդ ամենն ինձ դժվար էր թվում ու շատ պատասխանատու, դա եղավ Աստծո օրհնանքով և լավ մասնագետի շնորհիվ։ Ուրախ եմ, որ հենց այս տարիքում մայրացա, քանի որ ինձ պետք էր փորձ, կամք, կյանքի ճանապարհ։

 

 

 

-Երբ ոչինչ չէր ստացվում, հիասթափվո՞ւմ էիք:

 

-Իհարկե, ժամանակ է եղել, որ մտածել եմ՝ երբևէ մայր չեմ լինի, միգուցե, ինձ տրված չէ այդ զգացողությունը։ Նմանատիպ բացասական մտքեր ունեցել եմ։ Այդ հուսահատությունները մինչև Շանթին հանդիպելն է եղել։ Երբ կյանքդ կապում ես լավ մարդու հետ, ամեն ինչ լավ է դասավորվում։ Շանթն ավելի լավատես է և իր լավատեսությամբ օգնում է ինձ։ Մեր համատեղ կյանքից 3 տարի անց ծնվեց Տաթևը։  Եթե ժամանակը հասունանում է, դա ինքնըստինքյան է կատարվում, դու չես էլ հասկանում` ինչպես եղավ։ Մեկ–մեկ  հավատս չի գալիս, որ  Տաթևն իմ երեխան է, որ ես այդ երեխայի մայրն եմ։

 

-Ինչո՞ւ Տաթև անունն ընտրեցիք։

 

-Մենք որոշեցինք, որ մեր դստեր անունը լինի հայկական անուն։ Եթե ես որոշեի, ապա կընտրեի հետաքրքիր միջազգային անուն, բայց այդ առումով զիջեցի ամուսնուս։ Շատ անուններ ենք քննարկել և վերջում կանգ առել Անի, Տաթև անունների վրա։ Որոշեցինք, երբ երեխան ծնվի, այդ ժամանակ էլ կհասկանանք՝ Անի՞ն է ծնվել, թե՞ Տաթևը։ Առաջին իսկ պահից միանգամից Տաթև անունը միտքս եկավ։ Ի դեպ, ես շատ եմ սիրում Տաթև անվան խորհուրդը` Տերը տա թև։ Հետաքրքիր մի նկատառում անեմ, Տաթևի թևերը իսկապես շատ ուժեղ են։ Շատ ուժեղ աղջիկ է, մկանային համակարգը շատ զարգացած է։ Արդեն իսկ երևում է, թե ինչ գեղեցիկ կառուցվածք ու դիմագծեր ունի։

 

-Ո՞ւմ է նման Տաթևը։

 

-Պետք է նշեմ, որ փոքրիկս շատ հետաքրքիր դիմագծեր ունի, շատ գեղեցիկ նուրբ աղջնակ է։ Ասում են՝ Տաթևը նման է և՛ ինձ, և՛ ամուսնուս, բայց կարծում եմ՝ ինքն իրեն է նման։ Հետաքրքիր տեսակ է։ Սիրում եմ, որ երեխաները ծնվում են յուրօրինակ կերպարով։

 

 

-Ի՞նչ մասնագիտություն կցանկանայիք, որ Տաթևն ընտրեր։

 

-Երբ Տաթևը մեծանա, ինքն է որոշելու իր մասնագիտությունը։ Իհարկե, մենք ինչ–որ բաներում կաջակցենք, բայց ինչ էլ, որ նա ընտրի, մենք կողմ կլինենք։ Չեմ ցանկանա, որ դուստր իմ ուղին ընտրի, եթե ընտրի էլ, ոչ այս երկրում, այլ արտերկրում։

 

-Գիտեմ, որ հիմա զբաղված եք Ձեր դստեր խնամքով։ Հետագայում կշարունակե՞ք ստեղծագործել։

 

-Իմ ցավոտ տեղն է։ Շատ եմ ցանկանում աշխատել, նոր տեսահոլովակ ներկայացել, բայց փոքրիկիս հետ համատեղ չեմ կարողանա։ Երբ մի փոքր մեծանա, անպայման նոր աշխատանքներ ներկայացնելու եմ։ Այս ընթացքում էլ ես աշխատում եմ, ստեղծագործում,  նոր երգեր սևագրում։

 

Հարցազրույցը` Մելինե Տոնոյանի