«Ուզում էինք տարբերվող անուն լինի, նաև` հետաքրքիր բացվում է». Էդգար Իգիթյանը` հայր դառնալու, երեխայի անվան ընտրության և կնոջը շնորհակալ լինելու մասին

Tert.am Life-ն իր ընթերցողներին հայտնել է, որ այսօր լույս աշխարհ է եկել դերասան Էդգար Իգիթյանի և ֆիթնես մարզիչ Լուսինե Չոբանյանի առաջնեկը։

Դերասանն ինչպես երեխայի սպասելու մասին առաջին հարցազրույցն էր վստահել Tert.am Life-ին, այնպես էլ հայր դառնալուց հետո առաջինը մեզ հետ զրուցեց։

Նորաթուխ հայրիկը դեռ չի հանդիպել որդուն. այժմյան կարգն է այդպիսին։

«Անհամբեր սպասում եմ մեր հանդիպմանը։ Ծնվելուց հետո ավելի մեծ է իրեն տեսնելու ցանկությունս, բայց ճարս ինչ, դեռ միայն տեսազանգով եմ տեսել։ Զգացողություններիս մասին ավելի ճիշտ կխոսեմ, երբ գրկեմ տղայիս, զգամ իր հոտը,- ասաց նա ու հավելեց, որ որդուն չհանդիպելու կարգին ըմբռնմամբ է մոտենում -Ես շատ եմ ուզում տեսնել իրեն, բայց գիտակցում եմ, որ եթե նման կարգ են սահմանել, ուրեմն այդպես ավելի լավ է երեխայի համար»։

Դերասանն ասաց, որ կինն ու որդին իրենց շատ լավ են զգում։ «Իհարկե, շատ դժվար էր, բայց փառք Աստծո, ամեն ինչ շատ լավ է անցել։ Մեր սեռը, երևի, լավ չի գիտակցում` ինչ անբացատրելի բարդ է կնոջ համար մեզ երեխա պարգևելը։ Պիտի շնորհակալ լինենք մեր կանանց։ Ես այդ հարցին ավելի գիտակցաբար եմ մոտենում ու, իսկապես, շատ շնորհակալ եմ Լուսինեին ինձ այս երջանկությունը պարգևելու համար»,- ընդգծեց նա։

Էդգարն ու Լուսինեն նախապես պարզել էին երեխայի սեռը, բայց գերադասել էին գաղտնի պահել այն։ Դերասանը վստահեցնում է` երջանիկ կլիներ երկու սեռի պարագայում էլ։

«Ինձ համար հատուկ տարբերություն չկար, բայց կյանքիս դժվարություններից ելնելով գիտեի, որ առավելություն է, երբ տան մեծը տղա է լինում Իհարկե, եթե աղջիկ էլ ունենայի, շատ կուրախանայի։ Ես ու Լուսինեն աղջկա անուն էլ էինք ընտրել։ Հետագայում անպայման աղջիկ էլ կունենանք, տղա էլ` հնարավոր է` 2 տղա, 2 աղջիկ։ Մենք ուզում ենք շատ երեխաներ ունենալ։ Մեր ազգին էլ հիմա տղաներ են պետք։ Հետաքրքիր է, որ վերջերս ավելի շատ հենց տղաներ են ծնվում։ Հիվանդանոցում էլ ասացին, որ հիմա գերակշիռը տղաներ են»,- ասաց նորաթուխ հայրիկը։

Անդրադառնալով անվան ընտրությանը` Էդգարը պատմեց, թե ինչպես է այն բացվում։ «Ուզում էինք տարբերվող անուն լինի։ Երկար ուսումնասիրում էինք տարբերակները, Լեոնը երկուսիս էլ միանգամից դուր եկավ, նաև հետաքրքիր բացվում է` Լուսինեի, Էդգարի որդի։ Ինձ համար հենց տղայի անուն է։ Համանուն ֆիլմն էլ շատ եմ սիրում, տպավորված եմ տղամարդկային կերպարով»,- եզրափակեց դերասանը։