«Այս փուլում իմ դեմքին արված է միայն մեկ վիրահատական միջամտություն». Ռոմելա Սարգսյանը՝ մերկապարուհու դերի, ամուսնալուծության լուրերի և արտաքինի մասին

Դերասանուհի Ռոմելա Սարգսյանը լսարանին հայտնի է մի շարք հեռուստանախագծերից։  Նա այս օրերին նկարահանվում է «Լեռները կհիշեն» հեռուստասերիալում ։ Tert.am Life-ը զրուցել է դերասանուհու այս շրջանի զբաղվածության, արտաքին միջամտությունների, անձնականի և սուր կերպարի մարմնավորման մասին: 

Հեռուստասերիալում, որտեղ այժմ զբաղվածություն ունի դերասանուհին ի սկզբանե նկարահանվում էր՝ մարմնավորելով դրական հերոսուհու, բայց այժմ սցենարային զարգացումներն այլ կերպ են ընթանում: Ռոմելան նշում է՝ ինչպես կյանքում, այնպես էլ սերիալում լինում են անկանխատեսելի զարգացումներ: 

«Առօրյայում մենք ևս պայմանավորված իրադարձություններով լինում ենք տարբեր: Կյանքի որևէ փուլում, երբ քեզ վնասում են բնական է, որ ի հայտ են գալիս բացասական էմոցիաներ։ Հետևաբար ես մարմնավորում եմ հերոսուհու, որն ունի իր պատմությունը, տրամադրության անկումներն ու կյանքի տարբեր փուլերը, որտեղ ըստ իրավիճակի Արևն այլ կերպ է ինքնադրսևորվում»,- ասաց Ռոմելա Սարգսյանը։

Մի շարք հեռուստադիտողներ բացասական մեկնաբանություններ են թողնում կերպարի զարգացումների հետ կապված, քանի որ հեռուստասերիալում եղել է շրջադարձային փոփոխություն, բայց ըստ դերասանուհու գլխավոր հերոսուհու հիմնական գծերն անփոփոխ են: 

«Կարծում եմ, որ այնքան էլ տեղի չեն հնչող մեղադրանքները, քանի որ, եթե մանրամասն հետևեն սյուժեին՝ կհասկանան, որ Արևը մեղավոր չէր գլխավոր հերոսներից մեկի՝ Հայկի մահվան մեջ։ Ես որպես հերոսուհի իսկապես այդ ամենին նայում եմ, որպես դժբախտ պատահար, ոչ դիտավորյալ արարք»,- պատմում է դերասանուհին։

Խոսելով արտաքին փոփոխությունների մասին, դերասանուհին նշեց, որ հանուն այս դերի իրականացրել է արտաքին փոփոխություններ և մեզ հետ զրույցում անկեղծացավ՝ պատմելով արտաքին միջամտությունների մասին: 

«Իմ դեմքին արվել է միայն մեկ վիրահատական միջամտություն և դա քթի վիրահատությունն է, իսկ ֆիլլերային միջամտություններ այժմմ չկան, բայց պետք է նշեմ, որ սկզբում եղել է ֆիլլեր միայն շրթունքներիս հատվածում, որը հեռացրել եմ, իսկ արդյունքը ակնհայտ է»,- անկեղծացավ նա: Դերասանուհին չի սիրում խոսել անձնականից, բայց հարցազրույցներից մեկում հայտնել է, որ ամուսնացած է: Պայմանավորված նրանով, որ դերասանուհին չի հանրայնացնում անձնական կյանքը մամուլում պարբերաբար տարածվում են տեղեկություններ զույգի ամուսնալուծության մասին, իսկ դերասանուհին ո՛չ հերքում է, ո՛չ հաստատում: 

«Չեմ սիրում առհասարակ հանրայնացնել անձնական կյանքը։ Պտտվող խոսակցություններն էլ շատ ենթադրյալ կարող են լինել, որևէ մեկը մի բան է գրում և դա տարածվում է։ Չեմ ցանկանում մեկնաբանություններ տալ»,- հավելում է դերասանուհին։

Խոսելով նաև «Սևազգեստ կանայք» գեղարվեստական ֆիլմից, որտեղ Ռոմելան մարմնավորում էր գլխավոր հերոսի սիրուհիներից մեկին և խաղում էր բարդ կերպար: Այս գեղարվեստական ֆիլմում Ռոմելան մարմնավորում էր մերկապարուհու:

«Նման կերպար կերտելը բարդ էր, բայց ինձ տվեց համարձակություն և հետագայում ես կկարողանամ աշխատել մասշտաբային նախագծերում: Կերպարը ևս սուր էր, քանի որ հեռուստադիտողն ինձ չէր տեսել համարձակ կերպարում, իսկ ինչ վերաբերվում է քննարկումներին նրանք 72 ժամից ավել չեն շարունակվում: Այնուամենայնիվ, ուրախ եմ, որ թեկուզ քննադատությունների ձևաչափով կերպարը քննարկվել է և իր շուրջ ստեղծել է աժիոտաժ»,- եզրափակեց դերասանուհին: 

Սվետլանա Դավթյան