«Մենչի վերջը» stand-up-ի առաջնախաղը, հայտնի հյուրերը, բեմին շարված ծաղկեպսակները, «սև» հումորն ու կարևոր ասելիքը (տեսանյութ/ լուսանկարներ)

Վերջին նախապատրաստական աշխատանքներ, ձայնի և լույսի կարգավորում, առաջին խոսքի փորձ և հաշված րոպեներ անց լեփ-լեցուն դահլիճը դիմավորեց Արմեն Պետրոսյանին՝ Մենչին, որի «Մենչի վերջը» համերգը կայացավ երեկ: 

Վերջին տարիներին Մենչը բնակություն է հաստատել ԱՄՆ-ում իր ընտանիքի հետ միասին, բայց նա գալիս է Հայաստան, որտեղ ծավալում է իր աշխատանքային գործունեությունը, իսկ այս անգամ նա իր հավատարիմ հանդիսատեսին ներկայացրեց նոր հումորայիննոր stand-up-ը՝ «Մենչի վերջը»: Tert.am Life-ը ներկա է եղել առաջնախաղին և ներկայացնում է մանրամասներն ու լուսանկարները: 

Բացվում է վարագույրը և հենց առաջին րոպեներից հանդիսատեսը տեսնում է տեսաուղերձ, իսկ բեմում շարված են ծաղկեպսակներ և վառվող լամպ: 

«Սա հենց այն իրավիճակն է, երբ կարող ես ասել ինչ ցանկանում ես և լինել ընկալված: Ընտրել ենք «վախենալու» թեմա և դեկորացիաներ, երբ բացվում է վարագույրն ու բեմին շարված են ծաղկեպսակներ, բայց մենք չենք վախեցել բարդույթներից և բարդություններից: Վերջին 3 տարիների ընթացքում ես կորցրել եմ ընկերներ և այսօր հասկացա, որ նրանք ևս ունեին ասելիք, որը չհասցրին ասել ու պատմել: Հիմնական շարժառիթը եղավ, երբ տեսա՝ ինչ է կատարվել նրանց մահից հետո, երբ մարդու երգը հիթ դարձավ նրա մահից հետո, երբ կենդանության օրոք նրա երգն արդեն 2 տարի կար: Շատ դժվար էր այդ ամենը հասկանալով և հիշելով՝ խոսել այդ թեմաների շուրջ և ներկայացնել տարբեր թեմաներ և պատմություններ»,- անկեղծացավ Արմեն Պետրոսյանը:

Բեմից Մենչը ներկայացրեց կյանքի տարբեր շրջաններում իր հետ պատահած միջադեպեր և մեջբերեց ու խոսեց շոուբիզսնեսյան հայտնիներից, որոնց հետ աշխատել է, մասնավորապես՝ Միհրան Ծառուկյանի, Արփի Գաբրիելյանի, Գրիգոր Դանիելյանի, Գոռ Հակոբյանի, Աղաս Մանուկյանի և այոց մասին:
«Ես գիտեմ, թե ինչպես կատակել և ես վստահ եմ, որ նրանցից յուրաքանչյուրը գիտի՝ ինչ է հումորը, գիտի՝ ինչ վերաբերմունք ունեմ իրենց նկատմամբ և ես գիտեմ, որ որևէ մեկին չեմ վիրավորել: Կարևոր նախապայման է, որ կատակես մարդու հետ, որը կարող է հասկանալ այդ հումորը»,- հավելեց նա:

Համերգն ավարտվեց մենախոսությամբ, որը մտածելու տեղիք տվեց հանդիսատեսին, իսկ Արմեն Պետրոսյանի հիմնական նպատակը հենց դա էր, որ մարդուն պետք է գնահատել ու սիրել կենդանության օրոք:
«Ես կարող եմ ասել, որ այս ողջ համերգը հենց վերջին րոպեների համար էր: Կարևոր էր, որ հանդիսատեսը դահլիճը լքելիս հիշի լավ հումորները և խորհելու թեմաներ ունենա: Ես ուրախ եմ, որ այսօր այս առաջնախաղը կայացավ, ուրախ էի տեսնել դահլիճում ընկերներիս, գործընկերներիս և հարազատ մարդկանց, իսկ հետագայում կսպասեմ իմ հավատարիմ հանդիսատեսին»,- եզրափակեց նա: 

 

 

 

Посмотреть эту публикацию в Instagram

Публикация от Tert.am Life (@tert.am.life)