«Շուկա մտնում եմ, մարդիկ թշերս պաչում են». Արաքսյա Մելիքյանը՝ տարվա լավագույն դերասանուհու կոչման և «Վաճառեք Ձեր ամուսնուն» ներկայացման մասին

«Սիրային եռանկյունի է: Սեր, դավաճանություն, ի վերջո, ընտանիքի կայունություն»,- Tert.am Life-ի հետ զրույցում դերասանուհի Արաքսյա Մելիքյանը պատմեց «Վաճառեք Ձեր ամուսնուն» ներկայացման մասին, որն օրերս հանդիսատեսի դատին հանձնվեց Թատրոն կայարանում:

«Ես կնոջ կերպարն եմ կերտում, թեթև կատակերգություն է, որը նաև մտածելու առիթ է տալիս»,-նշեց Արաքսյա Մելիքյանը:

Նրա խոսքով՝ ներկայացումը երիտասարդ ընտանիքներին լավ օրինակ կարող է ծառայել՝ ինչը կարող է հաղթել, արժի՞ արդյոք մտնել այդ եռանկյունու մեջ, թե՞ ոչ:

Խոսելով խաղընկերների՝ Քնարին Զաքարյանի և Իշխան Ղարիբյանի մասին, նա նշեց, որ մինչ այդ էլ Իշխանի հետ բեմում արդեն խաղացել է, իսկ Քնարիկի հետ առաջին անգամ էր խաղում:

«Շատ ուրախ եմ, որ շատ լավ խաղընկերներ ունեմ: Երկուսն էլ գերպրոֆեսիոնալ են և բարձր մարդկային արժեքներ ունեն: Դա շատ կարևոր է՝ ի նպաստ գործի: Լարվածություն չկա, ուղղակի ստեղծագործում ենք:

Բոլորին սիրով հրավիրում եմ դիտելու «Վաճառեք Ձեր ամուսնուն» ներկայացումը: ուղղակի popcorn ներկայացում չի, մտածելու տեղ կա»,- պատմեց դերասանուհին ու հավելեց. «Փորձել ենք անել մաքուր, գրագետ լեզվով, չկան վուլգար ու էժանագին հումորներ, արվել է թատրոնի օրենքների բարձր մակարդակով»:

Բեմադրության հեղինակը Կարապետ Քարաջյանն է, պարերը բեմադրել է Արտյոմ Գևորգյանը:

Անդրադառնալով տարվա լավագույն դերասանուհի կոչմանն արժանանալուն, դերասանուհին անկեղծացավ, որ կոչումն իրեն ոչինչ չի տվել բացի անսահման շնորհավորանքներից:

«Այս մրցանակի շնորհիվ ես հստակ տեսա այն մարդկանց սիրո քանակը, որն ուղղված է դեպի իմ անձը: Մինչ օրս փողոցում մոտենում են, գրկում, համբուրում: Շուկա մտնում եմ, մարդիկ թշերս պաչում են»:  

Արաքսյային խոսքով՝ մասնագիտական առումով կոչումն իրեն ոչինչ չի տվել, միշտ աշխատել է նույն տեմպով: «Անկեղծ, բացարձակ չէի սպասում, որովհետև ես ի սկզբանե ներկայացված չեմ եղել, շատ անսպասելի եմ հայտնվել այդ ցուցակում: Ես անգամ հագնվել էի միջին, մտածում էի՝ հանկարծ ծիծաղելի չլինեմ բեմում»:

Հեղինակ՝ Անի Մնացականյան