2016թ.-ի դիմաՆԿԱՐԸ. տարվա կոմպոզիցիայի, գույների և ռիթմերի գամման

Tert.am-ի հարթակում 2016թ.-ի ամենանշանակալի իրադարձությունների ամփոփմամբ արդեն հանդես են եկել գրողները, քաղաքական գործիչները, ՏՏ ոլորտի ընտրախավը: Սակայն տարվա ավանգարդն առանց ավանգարդիստների ժամանակային և տարածական չափումների ներկայացնելն առնվազն կոռեկտ չէր լինի. 9 հարց ժամանակակից արվեստի հայտնի դեմքերին, որն այս դեպքում  միայն հարցախույզ չէ, այլ յուրօրինակ մեդիա ակցիա՝ 2016-ի չշնորհված մրցանակների հանձնման յուրօրինակ արարողություն: 

 

 

1.2016թ-ի ամենանշանակալի հասարակական-քաղաքական իրադարձությունը

 Նազարեթ Կարոյան- Ապրիլյան Պատերազմ։ Այն միացրեց հայ հասարակությանը այնպիսի մի ուժով, որ մի կարճ պահ, թվաց թե հնարավոր է սարեր շուռ տալ։ Ցավոք սրտի, արտաքին վտանգից բացի ուրիշ ոչ մի ուժ չի մնացել մարդկանց միաբանող ու ոտքի հանող։

 

Նորայր Այվազյան- 2016-ին պարզվեց,որ մեր իշխանությունները ծրագրի փոխարեն առաջնորդվում են իրենց կողմից մշակված ակցիաների ժողովածույով, որը առաջացնում է մեր ժամանակներին շատ հատուկ մի ծանր հիվանդություն, ԱԿՑԻՍՏԻՏ( ցանկության դեպքում՝ չշփոթել ցիստիտի հետ):

 

Աշոտ Ավագյան-Համատեղ զորախմբի ու հակաօդային համաձայնագրի ստորագրությունը։

 

Սահակ Պողոսյան - Իհարկե, Դոնալդ Թրամփի ընտրվելը՝ աշխարհում, իսկ Հայաստանում, իհարկե, Սասնա Ծռերի հեղափոխությունը..

 

Սէվ Հենրիկ - ԱՄՆ անհեթեթ ընտրությունները:

 

Արա Շահբազյան - Ապրիլյան դեպքերը՝ հասարակական զարթոնքը և քաղաքական դաշտի թշվառությունը։

 

Վիգեն Ավետիս - 2016-ին համաշխարհային նոր մարտահրավեր էր ԱՄՆ նախագահի ընտրությունը, որից, ուզած թե չուզած,  կախված է նաև Հայաստանի Հանրապետության ապագան: Իսկ ներքաղաքական կյանքում ապրիլյան պատերազմը, ռուս-ադրբեջանական ճնշումները, Արցախի շրջանների զիջման հավանականությունը ու այն խափանող  Սասնա ծռերի հուլիսյան  ապտակը: Այսպիսի իրականության մեջ Հայաստանում 2016-ին ամենանշանակալի հասարակական-քաղաքական իրադարձությունը համարում եմ Սասնա ծռերի բողոքի ծայրահեղ ձևը:

 

Արման Գրիգորյան-2016թ-ի ամենանշանակալի հասարակական-քաղաքական իրադարձությունը Դոնալդ Թրամփի ընտրությունն էր:

 

2.2016թ.-ի մշակութային ամենամեծ իրադարձությունը

 

Նազարեթ Կարոյան - Ավրորա մրցանակաբաշխությունը։ Չափանիշներ ստեղծող հաստատությունների բացակայությունը մեր հասարակական կյանքի ամենամեծ բացն է։ Իսկ միջազգային չափում ունեցող հաստատություն, որի միջոցով հայությունը կիսում է իր ունեցած աշխարհի հետ կարելի է ասել գրեթե չունենք։ 20-րդ դարում նման հաստատություն դարձավ Գյուլբեկյան հիմնադրամը։Ավրորան կարող է դառնալ նման մի հաստատություն։ 

Նորայր Այվազյան - Չեշիրյան կատվի ժպիտի հայտնվելը մշակույթի նախարարությունում:

 

Աշոտ Ավագյան -Հասմիկին մշակույթից հեռացնելը:

 

Սահակ Պողոսյան - Լոս Անջելեսում կին արվեստագետների ցուցասրահ բացվելը, Հայաստանում Մարկոս Գրիգորյանի ցուցահանդեսը Գաֆէսճեան թանգարանում

 

Սէվ  Հենրիկ - Ողջ տարվա ընթացքում երկուսուկես գործ եմ արել…

 

Արա Շահբազյան - Հովհաննես Այվազովսկու աշխատանքների ցուցահանդեսը Տրետյակովյան պատկերասրահում՝ ավելի քան 235 հազար այցելու, միջազգային մեծ արձագանք և նկարչի գործերի գնի կտրուկ բարձրացում ու դրանց նկատմամբ հետաքրքրության մեծացում:

 

Արման Գրիգորյան -2016թ.-ի մշակութային ամենամեծ իրադարձությունը Բոբ Դիլանի նոբելյան մրցանակ ստանալը: 

 

3. 2016թ.-ի  ամենախոսուն գիրքը

Նազարեթ Կարոյան - Միշել Ֆուկո. «Գիտելիքի Հնաբանությունը»։ Ընթերցելիս, թվում է, թե այն ամենը ինչը մարդկության գիտելիքն ու ճանաչողությունն է առաջ մղել(գիտություն, արվեստ, փիլիսոփայություն), ճիշտ կառուցվածք ու գործառնություն չեն ունեցել ու ամեն ինչ պետք է սկսել նորից։ 

 

Նորայր Այվազյան -Դոստոևվսկի, «БЕСЫ»։

 

Աշոտ Ավագյան - Համլետ Դավթյան, «Մեզ անծանոթ Վարդանանց պատերազմը»։

 

 Սահակ Պողոսյան -…և նորից Միխայիլ Բուլգակով, «Շան սիրտը» և Ռուբեն Ավետիսյան: 

 

Սէվ Հենրիկ - Ջիդու Կրիշնամուրտիի ու ֆիզիկոս Դէվիդ Բոհմի երկխոսությունները “The Endin of Time” - Harper Colins®, 2014.

 

Արա Շահբազյան - А.Скляров, «Яхве против Баала - хроника переворота»

 

Վիգեն Ավետիս - Արթուր Արմին «Արեւի լեռան տիեզերական գաղափարաբանությունը»:

 

 Արման Գրիգորյան - Արմեն Հայաստանցու (Օհանյան) «Մայրենիք դրոշ» գիրքը:

 

4.2016թ.-ի ամենատպավորիչ ֆիլմը

Նազարեթ Կարոյան - Տիմբուկտու- Աբդեռահմանե Սիսակո։ Շատ տպավորիչ ֆիլմ է, սքանչելի պատկերներով, որտեղ անտանելի բռնությունը, ազատության երազանքն ու պատրանքները միահյուսված են։ 

 

Նորայր Այվազյան - «Մակբեթ» 2015թ. ռեժիսոր Ջաստին Կուռզել:

 

Աշոտ Ավագյան - Մոսկվացի հայ աղջկա մի ֆիլմ էր…

 

Սահակ Պողոսյան - Այս տարի Աշոտ Ադամյանի «Իմ կինոն» հաղորդաշարին հյուր լինելով նորից նայեցի ամբողջ Ֆելինին , հասկացա որ Ամարկորդից.. ուժեղ կինո դեռ չի նկարվել...

 

 Սէվ Հենրիկ - Այս ֆիլմը:

Արա Շահբազյան - Այս ֆիլմը: 

 

Վիգեն Ավետիս - Ռեժիսոր Հրանտ Վարդանյան. «Սպիտակ գառան երազը»:

 

Արման Գրիգորյան- Այս տարվա իմ տեսած վերջին ամենատպավորիչ ֆիլմը Հյու Հադսոնի Ալտամիրան էր:

 

5. 2016-ի հրապարակային ամենահնչեղ ելույթը

 

Նազարեթ Կարոյան -Նիկոլ Փաշինյանի ելույթը Խորենացի փողոցում, երբ «Սասնա ծռերը» գրավել էին ՊՊԾգունդը, իսկ մարդիկ ովքեր ոտքի էին նրանց նակատմամբ բռնություն թույլ չտալու, ծովում ալեբեկության ենթարկված անղեկ նավ էին հիշեցնում։Նիկոլը իր ելույթով մի կարճ պահ ցրեց այդ անկազմակերպ վիճակը եւ ուղենիշները ցույց տվեց։

 

Նորայր Այվազյան- Գոհար Վեզիրյանի ելույթը «Կենտրոն» հեռուստաընկերություն  «Հայկական ուրբաթ» հաղորդման սեպտեմբերի 30-ի թողարկումը: Թեման` ՀՀ նորանշանակ վարչապետ Կարեն Կարապետյան ու փոփոխություններ. https://www.youtube.com/watch?v=7mXtkeg5llI

 

Աշոտ Ավագյան - Սերժ Սարգսյանի ելույթը` դեսպանների ներկայությամբ:

 

Սահակ Պողոսյան - Հրապարակներում չեմ էղել...էս տարի..Ճանփեքին էի..

 

 Սէվ  Հենրիկ - Սա է: 

 

Արա Շահբազյան - Նման ելույթ չի տպավորվել, ուստի թույլ տվեք անցնել առաջ:

 

Վիգեն Ավետիս- Աշոտ Մանուչարյան. ի պաշտպանություն «Սասնա ծռերի»  հանրահավաքներից մեկում հնչած հրապարակային ելույթը:

 

Արման Գրիգորյան - Լևոն Տեր-Պետրոսյանի ելույթը ՀԱՅ ԱԶԳԱՅԻՆ ԿՈՆԳՐԵՍԻ 2-րդ համագումարում: 

 

6.2016թ.-ի ամենապոզիտիվն ու ամենանեգատիվը

Նազարեթ Կարոյան - Պոզիտիվ կարելի է համարել այն, որ օլիգարխների դիրքերը դարձել են երերուն, սասանվել է նրանց անպարտելիության մասին պատկերացումը։ Բայց մյուս կողմից, քաղաքական ճանապարհով երկում փոփոխությունների հասնելու հույսը դարձավ էլ ավելի աղոտ։ Սա էլ կարելի է համարել տարվա նեգատիվը։

 

Նորայր Այվազյան - Հպարտանալու աստիճան նեգատիվի նկատմամբ հաստատուն պոզիտիվ վերաբերմունքը:

 

Աշոտ Ավագյան - Սահմանին կանգնած ջահելները ու բիձեքի արագ արձագանքը ֆրոնտ գնալու համար:

 

Սահակ Պողոսյան - Ամենապոզիտի՞վը.մի շատ կարևոր ընկերոջս ու շատ հայտնի արվեստագետի առողջությունը չնայած առաջացած տարիքի՝ շատ լավ էր, իսկ նեգատիվը...մի շատ կարևոր ընկերոջ ու շատ կարևոր արվեստագետի առողջությունը՝  չնայած երիտասարդ տարիքի...շատ վատ էր..

 

Սէվ Հենրիկ- 2016-ը ամենալղոզված տարին էր վերջին հինգ, տասը տարիների մեջ, անհնար է որեւէ բան առանձնացնել …

Արա Շահբազյան - Ամենապոզիտիվը՝ Տիգրան Համասյանի բարեգործական ակցիան Գյումրիում. ամենանեգատիվը՝ ինչպես անցած ու նախանցած, այնպես էլ, ցավոք այս տարի՝ ամենաբարձր հովանու տակ գործող իշխանական գրպանահատների գոյությունը:

 

Վիգեն Ավետիս - Պոզիտիվ ու նեգատիվ չունեմ մատնանշելու: Ամբողջը միասին կյանքն  է:

 

Արման Գրիգորյան- Հ ռոմի պապի այցը Հայաստան, իսկ ամենանեգատիվը՝ քաղաքացիական պատերազմը Սիրիայում։ 

 

7.2016թ.-ի մասմեդիայի ամենաազդեցիկ հրապարակումը

Նազարեթ Կարոյան - Չեմ կարող հիշել։Մասմեդիան ամեն պահի էլ ազդեցիկ հրապարակումների է ձգտում։ Դա նրա գործելակերպն է ու լինելու բնույթը։

 

Նորայր Այվազյան- Գոհար Վեզիրյանի հրապարակումներն եմ հաճույքով կարդում: 

 

Աշոտ Ավագյան-Չեմ հիշում։

 

Սահակ Պողոսյան- Մասմեդիային երբեք չեմ հետևում, իսկ ՎԱՐԴ Սիմոնյանն ինձ համար «մասմեդիա»  չի.... 

Սէվ Հենրիկ- Մասմեդիայով վաղուց է չեմ հետաքրքրվում, իսկ այլընտրանքայինում մի քանի հրապարակումներ եմ հավանել… Սարո Սարոյանի, Արա Հարությունյանի եւ Վարդ Սիմոնյանի հրապարակումները…

 

Արա Շահբազյան - Գարեգին Խումարյան. «Եղիցի վերջ»:

 

Վիգեն Ավետիս - ՀՀ-ում միակ ընդդիմությունը մասմեդիան է իր չքնաղ լրագրողական կազմով:

 

Արման Գրիգորյան- Նունե Հախվերդյանի «Վարդապետի լռությունը»՝ խոսելու առիթ. հոդվածը: 

 

8.2016թ-ի ամենասուր հումորը

Նազարեթ Կարոյան - Թեւան Պողոսյանի առաջարկը՝ հերոսների սերմնահեղուկի բանկը սարքելու. այն հումորի պես հնչեց։ 

 

Նորայր Այվազյան - Այս տարվա սուր հումորը կրեց մասսայական բնույթ.7000 մարդ միաժամանակ դարձան ՀՀԿ անդամ:

 

Աշոտ Ավագյան - Կարեն Կարապետյանին վարչապետ նշանակելը։

 

Սահակ Պողոսյան - ԱՄՆի նախագահ ընտրվեց Դոնալդ Թրամփը։

 

Սէվ Հենրիկ- Ինչքան աշխարհում անհանգստությունն ու անվստահությունն ավելանում են, էնքան հումորը ավելի սուր է դառնում… դժվարանում եմ ամենա-ամենան վերհիշել, բայց վերջերս ուշադրությունս գրավածը սա էր: 

 

Արա Շահբազյան- Սերգեյ Դանիելյանի «Քաղաքացիական Ակտիվ Քայլ» կուսակցությունը:

 

Վիգեն Ավետիս - Ս. Դանիելյանի «Դիվադադար» հաղորդումը: 

 

Արման Գրիգորյան- Սերգեյ Դանիելյանի «Քաղաքացիական Ակտիվ Քայլ» կուսակցությունը:

 

9. Ամանորյա պաթետիկ կենացների փոխարեն՝ մասնագիտական 3 արժեքավոր խորհուրդ

 Նազարեթ Կարոյան - Սկսել այնպիսի գործը միայն, որը հնարավոր է հասցնել ավարտին։

Գնահատականներ հնչեցնելիս երբեք չշտապել ։

Ամենափոքրիկ իսկ հաջողությունների համար կարողանալ լիարժեք ուրախանալ։

Նորայր Այվազյան - Մի՛ խմիր այնքան, որ մյուս օրը չասես, ԷԼ ՉԵՄ ԽՄԵԼՈՒ.

 – Դու ինձ մի ասա, ես ինչ անեմ` ըստ Վահրամ Մարտիրոսյանի`

- Դու ինձ ասա, թե դու ինչ կանես...

Աշոտ Ավագյան -Ջահելներին.

ա.արեք ոնց կարողանում եք

բ. Արեք, ոնց ուզում եք

գ/ ոչ ոքի մի լսեք

Սահակ Պողոսյան - 1 շատ մի մտածեք...որ դուք մասնագետ եք

 2 երբեք մի մոռացեք...որ դուք մասնագետ եք

3 Ձեզ՝ բոլորիդ խաղաղ, առողջ, երջանիկ Նոր Տարի..

 

 Սէվ  Հենրիկ - Քանի որ ինքս ոչ մի բանի մասնագետ չեմ, ասածս խորհուրդ չեմ կարող անվանել, բայց ասեմ.

1.Շատ խոսողը կամ պիտի սուտ ասի կամ էլ գլուխ գովա…

2.Արդյո՞ք էս աշխարհում խոսելու կարիք կա։

3.Գերադասելի է խորհուրդ չտալ. Սա ամենակարճ ճանապարհն է ուրիշների խորհուրդները լսելուց խուսափելու համար…

Արա  Շահբազյան - Առաջին խորհուրդն ինձ՝ երբեք էլ ուշ չէ նորից սկսելը (ես գիտեմ, թե ինչ նկատի ունեմ):

Երկրորդ խորհուրդ – հորդորը լրագրողներին՝ տպագրության հանձնելուց առաջ, մեկ անգամ ևս կարդացեք ձեր գրածը՝ ընթերցողը մեղք է:

 

Երրորդ խորհուրդ - խնդրանքը Ձմեռ պապին՝  բոլորին հավասար աչքով նայիր…

 

Վիգեն Ավետիս- Կենացները պաթետիկ չեն, այլ հոգու խոսք, բարի ցանկություններ: Ես նախընտրում եմ բաժակաճառը ամբիոնաճառից: Մասնագիտական խորհուրդս՝ ազնիվ ապրել, հմայվել գեղեցիկով եւ մեծարել նվիրյալներին:

 

Արման Գրիգորյան - Որևէ արվեստի գործ հասկանալու համար պատկերացրեք, որ այդ գործը դուք էք ստեղծել և մտածեք, թե ի՞նչի համար դուք էդպիսի գործ կստեղծեիք: Հիշեք, որ արվեստը և գիտությունը իրար հակադիր չեն և ինչպես գիտության մեջ, նույնպես և արվեստում սուտը կամ կեղծը տեղ չունի: Լավ արվեստի գործն այն գործն է, որը Ձեզ դարձնում  է արվեստագետ:

 

 

«Ստեղծագործական Հայաստան-2016» մեդիանախագիծ

ՎԱՐԴուհի Սիմոնյան
Հեղինե Ասրյան

Սյուզան Թոսունյան
Անահիտ Խաչատրյան 
Արթուր Խաչատրյան