Ֆրանկոֆոնիայի 17-րդ գագաթնաժողովը՝ Երևանում (տեսանյութ, թարմացվում է)

08:48 • 11.10.18

15։10

Հայաստանը հիշատակվեց որպես մի երկիր, որը բերում է աշխարհին նոր հույս, այն պարագայում, երբ միջազգային հանրությունը ժամանակ առ ժամանակ խորը հարցադրումներ ունի. Ֆրանկոֆոնիայի գագաթնաժողովին իր ելույթի խոսքում ասաց Միավորված ազգերի կազմակերպության կրթության, գիտության և մշակույթի հարցերով (ՅՈՒՆԵՍԿՕ) գլխավոր տնօրեն Օդրե Ազուլեն: 

«Մենք փորձել ենք նախևառաջ մտավոր ընդհանուր գծեր գտնել»,-ասաց նա և նշեց, որ այսօր ներկա սերունդը և հաջորդող սերունդը պետք է դիմակայեն մի շարք մարտահրավերների՝ բնապահպանական, դեմոգրաֆիկ, ծայրահեղականության տարածման հետ կապված հարցերի: 

«Մեր պատասխանատվությունն այս ամենի հետ կապված շատ մեծ է, սակայն Ֆրանկոֆոնիայի միջազգային կազմակերպությունում, նաև ՅՈՒՆԵՍԿՕ-ում կարող ենք այս հարցերի պատասխանները ստանալ»,-ասաց նա և օրինակ բերեց այն, որ կրթության ոլորտում ավելի քան 600 մլն երեխա չի կարողանում հասնել նվազագույն կրթական շեմերին:

«Բացի այդ, մի շարք նոր գիտություններ նորարություն են բերում գիտական ոլորտում և այս բոլոր նորարարությունների ոլորտում ֆրանկոֆոն երկրները պետք է գտնեն իրենց լիիրավ դերը»,-ասաց նա:

ՅՈՒՆԵՍԿՕ–ի գլխավոր տնօրենի ելույթին կարող եք ծանոթանալ այստեղ։

 





14։58


Հայաստանն այսօր կենդանի է և հարուստ. այն հարուստ է իր Սփյուռքով, որը Հայաստանը դարձրեց համաշխարհային երկիր: ՖՄԿ գագաթնաժողովին իր ելույթի ժամանակ այսպես ասաց կազմակերպության գլխավոր քարտուղար Միկայել Ժանը:

«Շառլ Ազնավուրն այդպիսի մի հայ էր: Եվ այսպիսով, պարո՛ն վարչապետ, աշխարհն է գտնվում Հայաստանում, Ֆրանկոֆոնիայի աշխարհը, և մեզ համար մեծագույն երջանկություն է հյուրընկալվել այստեղ»,– ասաց նա՝ դիմելով ՀՀ վարչապետ Նիկոլ Փաշինյանին: 

Միկայել Ժանի խոսքով՝ հայոց հողում իրենց ամեն ինչ պարտավորեցնում է հիշատակման արարողության և նաև սթափության: 

Խոսելով Ֆրանկոֆոնիայի դերի մասին՝ կառույցի Գլխավոր քարտուղարը նշեց, որ միշտ չէ, որ իրենք կարողացել են լուծել հարցերը: Նա նշեց, որ Ֆրանկոֆոնիան հիմնվել է գաղութատիրական կարգերի վրա՝ կարողանալով վերածնունդ ապահովել անդամ երկրներից յուրաքանչյուրի համար:

«Ֆրանսերենը դարձավ մեր լեզուն, այն փոխանցեց մեզ մարդասիրական ուժ, այն կարողացավ փոխանցել մեր մշակույթների բազմազանությունը և միաժամանակ հավասարազոր հարգանքը, որպեսզի կարողանանք լավագույնս դիմակայել այսօրվա մարտահրավերներին»,- ասաց նա:






14.39

Աշխարհը Ֆրանկոֆոնիայի կարիք ունի. Ֆրանկոֆոնիայի գագաթնաժողովին իր ելույթում ասաց Շվեյցարիայի նախագահ Ալեն Բերսեն: Նա նշեց, որ այս վեհաժողովն ընձեռում է հրաշալի հնարավորություն՝ կիսվելու այն մարտահրավերների շուրջ, որոնք իրենց անհանգստացնում են: 

«Շատ-շատ բաներ փոխվել են, բայց, այնուամենայնիվ, հիմնական տենդենցները դեռ ներկա են, և որոշ տենդենցներ ամրապնդվում են: Դիմակայելով առճակատումներին՝ մենք պետք է միշտ հիշեցնենք միջազգային համագործակցության արժեքները, լինի կլիմայական հարցերի շուրջ հավաքներ, այս բոլոր միջամտությունները պետք է լինեն արդյունավետ և ճշմարտացի, և դրանք կլինեն ճշմարտացի և արդյունավետ, եթե մենք կարողանանք բազմաբևեռ պատասխաններ բերել»,-ասաց նա:


Ալեն Բերսեն նկատեց, որ այսօր իրենք տեսնում են հակառակ տենդենցը, որը տանում է պետություններին փակուղի և իզոլացման:

«Այո, մենք այսօր ապրում ենք ժամանակներ, որտեղ առկա է բազմաբևեռ համագործակցության վստահության պակասը: Այս պարագայում ես վստահ եմ, որ Ֆրանկոֆոնիան մեծ արժեք է»,-ասաց նա:


Շվեյցարիայի նախագահի ելույթին կարող եք ծանոթանալ այստեղ։





14։35

ՅՈՒՆԵՍԿՕ-ի գլխավոր տնօրեն Օդրի Ազուլայը, ելույթ ունենալով ՖՄԿ գագաթնաժողովում, հիշատակեց ՄԱԿ-ի գլխավոր քարտուղար Անտոնիո Գուտերեշի խոսքերը Հայաստանի մասին, որ այն մի երկիր է, որ բերում է իր հետ մեծ հույս:

Խոսելով Ֆրանկոֆոնիայի արժեքները դավանելու մասին՝ Ազուլայը նշեց. «Ընդհանուր ապագա կերտելու գործը բոլոր պետությունների համար անցավ արհավիրքներով, սակայն սրան հետևեց միջազգային կազմակերպությունների ստեղծումը մեր կողմից, և քանի որ ի սկզբանե մտքերն են ստեղծում իրադրությունը, մենք փորձել ենք մտավոր ընդհանուր գծեր գտնել»,- ասաց նա:

Օդրի Ազուլայը նկատեց, որ ներկա և հաջորդող սերունդները պետք է դիմակայեն մի շարք մարտահրավերների՝ բնապահպանական, ծայրահեղականության զարգացման հետ կապված հարցերի և այլն: Մեր պատասխանատվությունն այս ամենի հետ կապված շատ մեծ է, սակայն ՖՄԿ-ում մենք կարող ենք տալ պատասխաններ այս հարցերին»,- ասաց նա:

 


14։10

Կենտրոնաֆրիկյան Հանրապետության ղեկավար Ֆաուստին Արչանջ Տուդերան, ելույթ ունենալով ՖՄԿ գագաթնաժողովին, նախ ներկայացրեց իրենց երկրում տեղի ունեցած ժողովրդավարական նվաճումները:

«17-րդ գագաթնաժողովի կարգախոսը՝ «Ապրել միասին», կիսել մարդասիրական արժեքները, հարգել տարբերությունները, շատ համահունչ են Կենտրոնաֆրիկյան Հանրապետությունում տիրող վիճակի հետ»-ասաց նա:

Ըստ նրա՝ այդ համընդհանուր արժեքներն ապրում են իր երկրում սահմանադրական կարգի հաստատումից հետո:

«Մենք խրախուսում ենք կենտրոնաֆրիկյան երկրներին, որ շարժվեն մարդասիրական արժեքներով: Կցանկանայի հատուկ ուշադրություն ուղղել Կենտրոնաֆրիկյան Հանրապետության երիտասարդությանը և կցանկանայի հորդորել, որ ջանքեր չխնայեն կրթության ոլորտում»,- ասաց նա:


13։29


Ես շատ հպարտ եմ Երևանում կազմակերպված համաժողովին մասնակցելու համար՝ հաշվի առնելով այն կապերը, որ կապում են մեր երկու երկրներին: ՖՄԿ գագաթնաժողովի ժամանակ իր ելույթում այսպես ասաց Լիբանանի նախագահ Միշել Աունը: Նա խոսեց լեզուներ սովորելու կարևորության մասին:


«Կյանքի ընթացքում սովորելով նոր լեզուները՝ մարդը հարստանում է»,- նկատեց Լիբանանի նախագահը:

Լեզուներ սովորելը հրաշալի կամուրջ է քաղաքակրթությունների միջև: Ֆրանկոֆոնիայի ներկայությունը Միջին Արևելքում ևս մեկ անգամ հաստատում է այն կապերը, որ գոյություն ունեն մեր միջև»,- ասաց նա:

Լիբանանի նախագահ Միշել Աունի ելույթը կարող եք կարդալ այստեղ։




13։27

Միասին ապրելն ավելի հեշտ է, երբ խոսում ենք մեկ լեզվով: ՖՄԿ գագաթնաժողովին ելույթ ունենալիս այսպես ասաց Մոնակոյի արքայազն Ալբերտ 2-րդը:

Նա կարևոր համարեց միասնական ջանքերով ահաբեկչության, ծայրահեղականության դեմ պայքարը, ինչն ամբողջ մարդկության կարևոր խնդիրներից է:


«Աշխարհը հաճախ գտնվում է ճգնաժամային իրավիճակներում և այս առումով ՖՄԿ-ի գործունեությունն իմաստավորվում է»,- ասաց նա:

Ըստ Մոնակոյի արքայազնի՝ իրենք պարտավորվել են Ֆրանկոֆոնիայի արժեքները փոխանցել այն բոլոր երկրների բնակիչներին, որոնք մաս են կազմում կազմակերպությանը: «Հատկապես կանաց և տղամարդկանց հարաբերությունների տիրույթներում և ահաբեկչության դեմ պայքարում ՖՄԿ-ը ունի շատ անելիքներ՚,- ասաց նա:

Մոնակոն, ըստ նրա, իր չափով խթանում է ՖՄԿ-ի բոլոր արժեքների զարգացման գործընթացներում և այդ ամենի տարածումն ինտերնետային տիրույթում:


«Մենք չպետք է ջանք խնայենք, որպեսզի կասեցնենք ծայրահեղության տարածումը: Կարևոր է հատկապես կրթության զարգացումը»,- ասաց նա:


Ալբերտ 2-րդի ելույթին առավել մանրամասն կարող եք ծանոթանալ այստեղ։




13.20
 

Նիգերը ֆրանկոֆոնիայի ակունքն է, ամեն ինչ արել է Ֆրանկոֆոնիայի կազմակերպության զարգացման և պահպանման համար: Այս մասին Ֆրանկոֆոնիայի գագաթնաժողովին իր ելույթում ասաց Նիգերի նախագահ Մահամադու Իսուֆուն: 


«Ֆրանկոֆոնիայի միջազգային կազմակերպությունը երկրորդ ամենամեծ կազմակերպությունն է ՄԱԿ-ից հետո»,-ասաց նա: 

Նա նշեց, որ Նիգերը միանում է ցավակցություններին, որ ամբողջ աշխարհն ուղղել է Շառլ Ազնավուրի մահվան կապակցությամբ:

«Իր հսկայական աշխատանքի ընթացքում Շառլը ֆրանսերեն լեզվի դեսպան է եղել, նա պետք է գտնվեր այստեղ՝ այս դահլիճում, մենք՝ բոլորս, անհամբեր սպասում էինք այն պահին, երբ Շառլը կերգեր սերը, մշակույթը: Շառլի կորուստը մեծագույն կորուստ է Ֆրանսիայի, Հայաստանի, մշակույթի աշխարհի և ամբողջ աշխարհի համար»,-ասաց նա:

Նիգերի նախագահի խոսքին առավել մանրամասն կարող եք ծանոթանալ այստեղ։



12։43

Ֆրանկոֆոնիայի գագաթնաժողովին ելույթ ունեցավ Կանադայի վարչապետ Ջասթին Թրյուդոն, ով նախ շնորհակալություն հայտնեց ՀՀ վարչապետ Նիկոլ Փաշինյանին, հայ ժողովրդին, հիշատակեց Շառլ Ազնավուրին և նշեց, որ նա ֆրանսերեն լեզվի բոլոր նրբերանգները մանրամասն տեսնում էր:

«Նույն ոգին այստեղ ևս առկա է: Սա բնավ չի նշանակում, որ մենք համաձայն ենք ամեն ինչի հետ, բայց միասին կարողացել ենք ստեղծել մի տիրույթ, որտեղ առաջնորդվում ենք իրար հանդեպ հարգանքով, մի տիրույթ, որտեղ մեր երկրները կարող են զարգանալ, լսել իրար և այդ ամենը ֆրանսերենով: Ձեր երկիրն ունենա 99 միլիոն բնակչություն, թե ինը միլիոն, դուք այս կազմակերպության լիիրավ անդամ եք»,-ասաց նա:

Կանադայի վարչապետն ասաց, որ իրենք պետք է նախ համախմբվեն ոչ միայն ճառերի շուրջ, այլ ապագայի շուրջ, որը ցանկանում են կառուցել:

«Շատ քաղաքացիներ իրենց հեռու են զգում գլոբալիզացիայի խոստումներից, մոռացված՝ այդ խոստումներից, բնիկ ժողովուրդներ կան, որոնք իրենց ևս մոռացված են զգում, ոչ մի երկիր չի կարող գրանցել հաջողություններ առանց բոլորի մասնակցության, անկախ նրանց կրոնական և ազգային պատկանելիությունից»,-ասաց նա և նշեց, որ ֆրանկոֆոն երկրները լավագույնն են դիրքավորված այս արժեքների առաջամարտիկը լինելու համար:


Կանադայի վարչապետի ելույթին առավել մանրամասն կարող եք ծանոթանալ այստեղ։ 


12։37


Երևանում մեկնարկած ՖՄԿ 17-րդ գագաթնաժողովին ելույթի ժամանակ այսպես ասաց Ֆրանսիայի նախագահ Էմանուել Մակրոնը: «Կցանկանայի շնորհավորել լավագույնս կազմակերպելու համար Ձեզ համար շատ խորհրդանշական պահին»,- ասաց նա:

Ֆրանսիայի նախագահը նշեց, որ հայտնի է, թե ինչ տեղ է գրավում Հայաստանը ֆրանսիացիների սրտում: «Ամենուր ձեր անունը հնչեցնելիս շատ նուրբ զգացում է  առաջանում»,- ասաց նա:

Էմանուել Մակրոնը մատնանշեց, որ Հայաստանի անունը կապվում է ազգերի արհավիրքների հետ, որոնք հիշեցնում են դեմքեր, որոնք Ֆրանսիայում կարևոր դերեր են զբաղեցրել, ովքեր անսահմանորեն սիրում են Ֆրանսիան, և Ֆրանսիան բացել է իր սրտերն այդ մարդկանց համար:

«Հայաստանի համար Ֆրանսիան և Ֆրանկոֆոնիան խորհրդանշում են նաև մեկ ձայն»,- ասաց նա՝ հիշատակելով ֆրանսահայ երաժշտին՝ Շառլ Ազնավուրին, որը երգում էր, պահպանում հայկականությունը, կազմակերպում էր նաև օգնություն:

Ֆրանսիայի նախագահի ելույթին ավելի մանրամասն կարող եք ծանոթանալ այստեղ։

 




11։54

Ֆրանկոֆոնիայի միջազգային կազմակերպության 17-րդ գագաթնաժողովին ՀՀ վարչապետ Նիկոլ Փաշինյանն իր ելույթն սկսեց նախ իր ցավն արտահայտելով աշխարհահռչակ ֆրանսահայ շանսոնյե Շառլ Ազնավուրի մահվան կապակցությամբ:

«Կցանկանայի նախ արտահայտել այն անսահման ցավը, որն ինձ համակում է, երբ մտածում եմ Շառլ Ազնավուրի մասին: Նա այնքան կցանկանար լիներ մեր կողքին՚,- ասաց Նիկոլ Փաշինյանը՝ նշելով, որ շանսոնյեն, նրա գլուխգործոցները կմնան մեր հիշողություններում: «Մենք սգում ենք, որովհետև սիրում ենք»,- ասաց նա:

Նիկոլ Փաշինյանի խոսքով՝ Շառլ Ազնավուրը, լինելով  նաև մեր դեսպանը, բարձր է պահել մեր անունը: «Մենք հավերժ երախտապարտ կլինենք նրան դրա համար: Նա հեռացավ մեզնից, բայց այսօր ներկա է մեր մտքերում»,- ասաց նա՝ առաջարկելով նրա հիշատակը ծափահարություններով հարգել: 

ՀՀ վարչապետը, դիմելով գագաթնաժողովի մասնակիցներին, նշեց, որ ուրախ ենք Երևանում 17-րդ գագաթնաժողովն ընդունելու համար:

Բոլորին մաղթեց բարի գալուստ հայկական հող, քրիստոնեական բնօրրան, հազարամյակների պատմություն և մշակույթ ունեցող Հայաստան, որն այս ամիս նշում է իր մայրաքաղաքի 2800-ամյակը: 

ՀՀ վարչապետը նշեց, որ կարևոր է հետևել այս երևանյան գագաթնաժողովի կարգախոսի՝ «Ապրելով միասին»-ի սկզբունքներին, և համախմբվել դրանք կլյանքի կոչելու համար: 

Նա նշեց, որ գագաթնաժողովի ընթացքում քննարկվելու են ֆրանկոֆոն երկրներին վտանգ սպառնացող հակամարտություններն ու ճգնաժամերը, անդրադարձ կատարեց ԼՂ հակամարտությանը: 

Նիկոլ Փաշինյանի ամբողջական ելույթը կարդացեք այստեղ։




10։53

Ֆրանկոֆոնիայի գագաթնաժողովում մեկնարկել են ելույթները։ Առաջինը ելույթ է ունենում ՀՀ վարչապետ Նիկոլ Փաշինյանը։ 


10։36

Ընտանեկան լուսանկարի արարողությանը հաջորդեց ՀՀ վարչապետ Նիկոլ Փաշինյանի և Ֆրանսիայի նախագահ Էմանուել Մակրոնի կողմից «Ֆրանսիայի Աշխարհահռչակ հայեր. Շառլ Ազնավուր» անվանումով գեղաթերթիկի մարումը:



10։23

Երևանում մեկնարկած Ֆրանկոֆոնիայի միջազգային կազմակերպության (ՖՄԿ) 17-րդ գագաթնաժողովում այս պահին տեղի է ունենում Ընտանեկան լուսանկարի արարողությունը: Լուսանկարվելուց հետո նախատեսված է ելույթների մասը:






10։15

Իր տիկնոջ՝ Բրիջիտ Մակրոնի հետ ժամանեց նաև Ֆրանսիայի Հանրապետության նախագահ Էմանուել Մակրոնը: Ֆրանսիան եզարափակում էր պատվիրակությունների դիմավորման պաշտոնական արարողությունը:


09:55

Կարեն Դեմիրճյանի անվան մարզահամերգային համալիր են ժամանել Բելգիայի և Կանադայի վարչապետներ Շառլ Միշելը և Ջաստին Տրյուդոն: Նշենք, որ արդեն տասնյակից ավելի ֆրանկոֆոն երկրների պատվիրակություններ են ժամանել գագաթնաժողովի վայր:



09:47

Երևանի Կարեն Դեմիրճյան անվան մարզահամերգային համալիրում տեղի է ունենում Ֆրանկոֆոնիայի միջազգային կազմակերպության (ՖՄԿ) գագաթնաժողովի բացման հանդիսավոր արարողությունը: Այս պահին գագաթնաժողովն ընդունող երկրի՝ Հայաստանի վարչապետ Նիկոլ Փաշինյանը  դիմավորում է պատվիրակությունների ղեկավարներին:


09.22


Երևանի Կարեն Դեմիրճյանի անվան մարզահամերգային համալիրում տեղի է ունենում Ֆրանկոֆոնիայի միջազգային կազմակերպության (ՖՄԿ) գագաթնաժողովի բացման հանդիսավոր արարողությունը: ՀՀ վարչապետին և նրա տիկնոջն առաջինը մոտացան՝ ՖՄԿ քարտուղար Միկայել Ժանը՝ իր ամուսնու հետ: Նրանք ևս Փաշինյանի հետ դիմավորում են պատվիրակությունների ղեկավարներին:

---------------------------------------------------------------------------------------------

Երևանում մեկնարկում է Ֆրանկոֆոնիայի միջազգային կազմակերպության (ՖՄԿ) 17-րդ գագաթնաժողովը: Նախատեսված է բացման հանդիսավոր արարողություն, պատվիրակությունների պաշտոնական դիմավորման արարողություն:

Լիագումար նիստի աշխատանքների մեկնարկը տրվելու է 1+4 ձևաչափով: Նախատեսված է նիստի բացում լիազորություններն ավարտող նախագահի կողմից (բաց նստաշրջան), նախագահության լիազորությունների փոխանցում Մադագասկարի և Հայաստանի միջև, համաժողովի բյուրոյի հիմնում, օրակարգի նախագծի հաստատում և աշխատանքների պլանավորում, կազմակերպությանը անդամակցության կամ կարգավիճակի փոփոխության մասին հայտերի քննարկում:

Նշենք, որ Հայաստանում անցկացվող Ֆրանկոֆոնիայի գագաթնաժողովին իրենց մասնակցությունն են հաստատել 26 պետության ղեկավարներ, այդ թվում ՝ Ֆրանսիայի նախահագ Էմանուել Մակրոնն ու Կանադայի վարչապետ Ջասթին Տրյուդոն, ովքեր արդեն ժամանել են Հայաստան: 


Գագաթնաժողովի թեման է «Ապրել միասին՝ հարգելով համերաշխությունը, մարդասիրական արժեքներն ու բազմազանությունը՝ իբրև խաղաղության և բարօրության հիմք ֆրանկոֆոն տարածաշրջանում»։ Համընդհանուր արժեքների վրա խարսխված այս թեման հնարավորություն կտա արտացոլել Ֆրանկոֆոնիայում խաղաղությունը, համերաշխությունը և զարգացումը։