Որոնք են աղիների քաղցկեղի մասին հուշող ամենավաղ ախտանշանները

Աղիների քաղցկեղը կամ կոլոռեկտալ քաղցկեղն այս հիվանդության ամենավտանգավոր տեսակներից մեկն է, որը տարեկան հազարավոր մարդկանց մահվան պատճառ է դառնում: Սա այն ախտաբանություններից է, որոնց բուժման արդյունավետությունը կախված է դրա վաղ ախտորոշումից, քանի որ ժամանակին հիվանդությունը չախտորոշելու դեպքում բուժումը կարող է անարդյունավետ լինել։ Սա է պատճառը, որ մասնագետները հորդորում են զգոն լինել, պարբերաբար բուժզննում անցնել և անուշադրության չմատնել խնդրի մասին հուշող ախտանշանները, քանի որ միայն այդ դեպքում կհաջողվի հայտնաբերել հիվանդությունը զարգացման վաղ փուլերում և միջոցներ ձեռնարկել դրանից ազատվելու համար։ Սակայն խնդիրն այն է, որ աղիների քաղցկեղը կարող է դրսևորվել ոչ շատ ակնհայտ ախտանշաններով, ուստի շատերը դրանք անգամ չեն նկատում կամ վերագրում են այլ խնդիրներին, ինչի հետևանքով հիվանդությունն ախտորոշվում է չափազանց ուշ։ Նման խնդիրներից խուսափելու համար մասնագետները ներկայացրել են կոլոռեկտալ քաղցկեղի մասին հուշող այն ախտանշանները, որոնք ոչ մի դեպքում չի կարելի անուշադրության մատնել։

Ուռուցքաբանության ամերիկյան միության մասնագետների խոսքով՝ զարգացման վաղ փուլերում կոլոռեկտալ քաղցկեղը դրսևորվում է ախտանշաններով, որոնք հաճախ նման են լինում թութքի ախտանշաններին, ինչի հետևանքով էլ մարդիկ շփոթում են այս հիվանդությունները և չարորակ նորագոյացությունը շարունակում է զարգանալ: Նման խնդիրներից խուսափելու համար հարկավոր է սովորել տարբերել նաև քաղցկեղի այս տեսակի մասին հուշող այլ ախտանշանները, ինչը թույլ կտա ժամանակին դիմել բժշկին:

Ամերիկացի ուռուցքաբաններն առաջին հերթին խորհուրդ են տալիս ուշադրություն դարձնել կղանքի բնույթին, քանի որ աղիների աշխատանքի փոփոխությունը կարող է լինել այս հիվանդության մասին հուշող առաջին ախտանշանը: Նման դեպքերում կարող է նկատվել ինչպես փորլուծություն ու փորկապություն, այնպես էլ կղանքի ցանկացած այլ արտասովոր փոփոխություն, որը պահպանվում է մի քանի օր շարունակ:

Աղիների քաղցկեղի մասին հուշող մյուս հնարավոր ախտանշանը կղանքի մեջ արյան հետքերի առկայությունն է: Այս դեպքում անգամ չնչին արյունահոսությունը պետք է լուրջ պատճառ հանդիսանա բուժզննում անցնելու համար:

Բացի այդ, այս հիվանդությունը զարգացման վաղ փուլերում կարող է դրսևորվել նաև աղիների ոչ լիարժեք դատարկված լինելու զգացողությամբ, ուստի նման տհաճ ախտանշանի առկայության դեպքում ևս հարկավոր է դիմել բժշկին:

Կոլոռեկտալ քաղցկեղի վաղ փուլերի մասին կարող է հուշել նաև փորափքանքը, որը պարբերաբար մեղմվում է՝ փոխարինվելով որովայնի ցավերով: Բացի այդ, մասնագետները խորհուրդ չեն տալիս անտեսել նաև անսպասելի ուժգին հոգնածությունը, թուլությունն ու քաշի նվազումն առանց որևէ պատճառի:

Միևնույն ժամանակ ուռուցքաբաններն ընդգծում են, որ հաճախ այս ախտանշանների ի հայտ գալը խոսում է չարորակ նորագոյացության զարգացման մասին, ուստի դրանք ոչ մի դեպքում չի կարելի անուշադրության մատնել: Սա է պատճառը, որ աղիների քաղցկեղի դեպքում հիվանդությունը հնարավորինս վաղ փուլերում հայտնաբերելու համար հարկավոր է ժամանակ առ ժամանակ բուժզննում անցնել ուռուցքաբանի մոտ:

Այնուամենայնիվ հարկ է հիշել, որ նշված ախտանշանները ոչ միշտ են պայմանավորված լինում կոլոռեկտալ քաղցկեղով, ուստի խուճապի մատնվելու կարիք չկա, սակայն դրանց առկայությունը միևնույն է հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru