Ինչպես բնական ճանապարհով բարձրացնել տեստոստերոնի մակարդակը․ խորհուրդներ մասնագետից

Հայ Ամերիկյան Առողջության Կենտրոնի սեքսապաթոլոգ, դոցենտ Սևադա Հակոբյանն անդրադարձել է տղամարդկանց օրգանիզմում տեստոստերոնի մակարդակի նվազման խնդիրն՝ նշելով, որ շատ դեպքերում տղամարդիկ կարող են բարձրացնել իրենց տեստոստերոնի մակարդակը ՝ փոխելով կենսակերպը:

«Ցածր տեստոստերոնի ախտանիշներն են՝ սեռական մղման նվազում, մկանների զանգվածի կորուստ, սեռական թուլություն և տրամադրության, աշխատունակության անկում:

Ինչպես բնական ճանապարհով վերականգնել տեստոստերոնը.

Բարելավել քնի հիգիենան. տղամարդու օրգանիզմը տեստոստերոն ավելի շատ սինթեզում է, երբ նա քնում է: Արդյունքում, որքան քիչ է նա քնում, այնքան պակաս տեստոստերոն է արտադրում նրա մարմինը: Գիշերային քունը կարևորեք ՝ ամեն գիշեր յոթից ինը ժամ քնելու նպատակ ունենալով:

Կրճատեք կոֆեինի և ալկոհոլի օգտագործումը:

Պարբերաբար մարզվեք:

Քնեք և ամեն օր նույն ժամին արթնացեք:

Կառավարեք սթրեսը:

Քաշի կարգավորում. ճարպակալումը կապված է նաև ցածր տեստոստերոնի հետ: Սովորաբար, տղամարդու որոշ տեստոստերոն վերածվում է մեկ այլ հորմոնի, որը կոչվում է էստրոգեն: Այս գործընթացը սովորաբար տեղի է ունենում ճարպային բջիջներում: Այսպիսով, ավելորդ քաշ կամ գեր լինելը կարող է մեծացնել էստրոգենի վերածված տեստոստերոնի քանակը և, իր հերթին, նվազեցնել տեստոստերոնի ընդհանուր մակարդակը:

Տեստոստերոնի արտադրությունը կարող է խաթարվել որոշ դեղամիջոցների և հորմոնների միջոցով: Խուսափեք անաբոլիկ ստերոիդներից և հավելումներից:

Ցածր տեստոստերոնի ախտանիշներով, սեռական ցանկության նվազմամբ տղամարդկանց համար բժշկին դիմելը շատ կարևոր է: Մանրակրկիտ ֆիզիկական քննությունը կարող է բացահայտել ցածր տեստոստերոնի այլ հնարավոր պատճառներ, ինչպիսիք են բորբոքումը կամ վարակը:

Սեքսոլոգիական համալիր բուժումը հնարավորություն է տալիս լիարժեք վերականգնել սեքսուալ ֆունկցիան»: