Սննդամթերքի որ տեսակները չի կարելի օգտագործել սեռական ակտից առաջ․ պարզաբանում է սեքսոպաթոլոգը

Մարդու սննդակարգը շատ կարևոր նշանակություն ունի նրա ընդհանուր ինքնազգացողության ու առողջական վիճակի համար, ուստի զարմանալի չէ, որ այն կարող է իր ազդեցությունն ունենալ նաև սեռական կյանքի ու առողջության վրա՝ անդրադառնալով ինչպես դրական, այնպես էլ բացասաբար։ Սա է պատճառը, որ գոյություն ունեն սննդամթերքի տեսակներ, որոնցից հարկավոր է խուսափել սեռական հարաբերությունից առաջ, մինչդեռ սա քչերին է հայտնի։

Այս հարցի շուրջ Tert.am Medicine-ը զրուցել է Հայ-ամերիկյան առողջության կենտրոնի սեքսոպաթոլոգ, բ.գ.թ., դոցենտ Սևադա Հակոբյանի հետ՝ փորձելով պարզել՝ ինչպիսին պետք է լինի մարդու սննդակարգն առողջ ու սեռական կյանք վարելու համար

Հոթ-դոգ

Մասնագետի խոսքով՝ հոթ-դոգերը վնասակար են ոչ միայն մարմնի կառուցվածքի և առողջության համար: Դրանք նվազեցնում են սեռական ցանկությունը, ուստի սեռական ակտիվության ու հաճելի զգացողությունների պահպանման համար լավագույն տարբերակը կլինի դրանցից հրաժարվելը: 

Անանուխ

«Ոչ թարմ հոտը, իհարկե, չի նպաստում սեքսին, բայց պետք չէ այն «խեղդել» անանուխով», - նշում է բժիշկը՝ պարզաբանելով, որ այս բույսը նվազեցնում է տեստոստերոնի մակարդակը, ինչը կարող է հանգեցնել լիբիդոյի նվազմանը: 

Կարտոֆիլ ֆրի

Բժիշկ Հակոբյանի խոսքով՝ խրթխրթան կարտոֆիլի սիրահարները պետք է հիշեն, որ այս ուտեստը տղամարդու սեռական գրավչության թշնամին է: 

«Այն խաթարում է արյան շրջանառությունը և նվազեցնում տեստոստերոնի մակարդակը: Բացի այդ աղը, որը ընդունում եք կարտոֆիլի հետ, օգուտ չի տալիս: Այն հատկապես վնասակար է բարձր ճնշման հակվածություն ունեցող տղամարդկանց համար», - նշում է մասնագետը։

Պահածոներ

Սեռական ակտից առաջ պահածոներ ուտել այն կործանելու վստահելի միջոց է, նշում է բժիշկը: Բանն այն է, որ այս մթերքը ոչ միայն օգտակար չի առողջության համար, այլև կարող է դառնալ փորափքանքի առաջացման պատճառ: Բացի այդ, դրանք պարունակում են պահածոյացնող նյութեր, որոնք վնասակար են սեռական համակարգի համար: 

Ոգելից խմիչքներ

«Գինին և ոգելից այլ խմիչքները ևս սեքսից առաջ ոչ պիտանիների ցուցակում են: Իհարկե, մտերմությունից առաջ մի բաժակ գինի խմելը կօգնի ձեզ հանգստանալ և գտնել ճիշտ տրամադրություն, բայց խոսքը մի բաժակի մասին է, ոչ թե ամբողջ շշի: Ալկոհոլը նվազեցնում է զգայունությունը և թուլացնում օրգազմը: Հետազոտությունները ցույց են տվել, որ սթափ տղամարդիկ ավելի շատ են վայելում սեքսը», - նշում է բժիշկը։

Մրգեր հիմնական կերակուրից հետո

Մրգերը հաճախ դառնում են ռոմանտիկ ընթրիքի մի մաս, սակայն սա ևս սխալ է, վստահ է մասնագետը: Նման սնունդն արագ է մարսվում, ինչը կարող է սեքսի ընթացքում դառնալ տհաճ զգացողությունների և նույնիսկ որովայնային կծկումների առաջացման պատճառ: 

Էներգետիկ ընպելիքներ

«Շատերը կարծում են, որ էներգետիկ ըմպելիքներն էներգիան են հաղորդում սեքսի ընթացքում և դրանից հետո: Այնուամենայնիվ դրանք վնասակար են առողջության համար, ինչը պայմանավորված է շաքարի և կոֆեինի պարունակությամբ: Նշված բաղադրիչներն ուժեղացնում են լիբիդոն, սակայն կարճաժամկետ», - ընդգծում է մասնագետը՝ հավելելով, որ էներգետիկ ըմպելիքների փոխարեն ցանկալի է խմել սև հաղարջի հյութ, որը կխթանի և կբարձրացնի սեռական ցանկությունը։