Սննդամթերքի տեսակներ, որոնք օգնում են բարելավել երիկամների աշխատանքը

Երիկամները մարդու կարևորագույն օրգաններից են, որոնց աշխատանքի խանգարումները խիստ բացասաբար են անդրադառնում օրգանիզմի վրա՝ դրսևորվելով մի շարք տհաճ ախտանշաններով ու վատթարացնելով նաև այլ օրգանների ու համակարգերի աշխատանքը։

Առողջ երիկամները հավասարակշռում են մարմնի հանքանյութային բալանսն ու առաջին հերթին աղերի ու կալիումի մակարդակները։ Այս օրգանների ճիշտ աշխատանքի շնորհիվ օրգանիզմում պահպանվում են օգտակար սննդարար նյութերը, իսկ վնասակար տարրերը դուրս են բերվում մեզի հետ։ Բացի այդ, դրանք նաև արտադրում են հորմոններ, որոնք ազդում են այլ օրգանների աշխատանքի վրա։ Սա է պատճառը, որ մասնագետները հորդորում են մշտական վերահսկողության տակ պահել երիկամների առողջական վիճակն ու հնարավորինս նվազեցնել հավանական խանգարումների զարգացման հավանականությունը։

Երիկամների և առհասարակ ամբողջ օրգանիզմի առողջության վրա շատ մեծ նշանակություն կարող է ունենալ մարդու սննդակարգը, որը կարող է ինչպես բարենպաստ ազդեցություն ունենալ, այնպես էլ խանգարել երիկամների աշխատանքը։ Ինչպես նշում է Times Now պարբերականը, գոյություն ունեն սննդամթերքի տեսակներ, որոնք պահպանում են երիկամների առողջ աշխատանքն ու նվազեցնում են վնասվածքների հավանականությունը։

Ձեր ուշադրությանն ենք ներկայացնում դրանցից մի քանիսը, որոնք հարկավոր է անպայման ներառել սննդակարգում։

Ջուր

Ջրի միջոցով տոքսինները հայտնվում են արյան մեջ, որից հետո արյունն անցնում է երիկամներով։ Օրգանիզմն այդ ջուրն օգտագործում է տոքսինները զտելու և մեզ ստեղծելու համար, որի միջոցով էլ օրգանիզմը մաքրվում է վնասակար տարրերից։ Սա է պատճառը, որ երիկամների լավ աշխատանքի համար հարկավոր է օրվա ընթացքում բավարար քանակությամբ հեղուկ օգտագործել։ Ընդ որում՝ այն չպետք է պարունակի աղ ու շաքար, ուստի լավագույն տարբերակը կլինի մաքուր ջուրը։

Միևնույն ժամանակ մասնագետները նախազգուշացնում են, որ երիկամների հիվանդությունների առկայության դեպքում միայն մասնագետը կարող է որոշել՝ օրական ինչ քանակությամբ ջուր ու սպիտակուց է հարկավոր օգտագործել։ 

Խնձոր

Խնձորը պեկտինի հիանալի աղբյուր է, իսկ այս լուծվող մանրաթելն օգնում է նվազեցնել արյան մեջ խոլեստերինի ու գլյուկոզայի մակարդակերը։ Բացի այդ, այն հարուստ է հակաօքսիդանտներով, որոնք նույնպես շատ կարևոր տարրեր են։ Այս միրգը շատ օգտակար է երիկամների համար, քանի որ օգնում է բարելավել արյունատար համակարգի աշխատանքն ու դրանով իսկ նպաստում է երիկամներին բավարար քանակությամբ արյան մատակարարմանը։

Ձուկ

Օմեգա-3 ճարպաթթուներն անփոխարինելի սննդարար նյութեր են, որոնք մարդու օրգանիզմը չի կարող ինքնուրույն սինթեզել։ Այս տարրերի հիանալի բնական աղբյուր են սառը ջրերում բնակվող յուղոտ ձկները, ուստի դրանք սննդակարգում ներառելը կարող է շատ օգտակար լինել։ Օմեգա-3 ճարպաթթուները նպաստում են զարկերակային ճնշման նվազմանը, ինչն էլ նվազեցնում է երիկամների վնասվածքների հավանականությունը։

Լոռամիրգ

Լոռամիրգը հայտնի է որպես հզոր բնական միջոց միզապարկի վարակների դեմ։ Այս մթերքի բաղադրիչները թույլ չեն տալիս բակտերիաներին կպչել միզապարկի պատերին՝ կանխելով վարակումը։ Նույն կերպ լոռամիրգը բարելավում է նաև երիկամների առողջությունը։

Սննդամթերքի տեսակներ, որոնցից հարկավոր է խուսափել

Վերոնշյալ սննդամթերքի տեսակները սննդակարգում ներառելուց բացի հարկավոր է նաև խուսափել որոշակի մթերքից, որը կարող է վնասակար լինել երիկամների համար։ Երիկամների հիվանդությունների դեպքում առաջին հերթին հարկավոր է նվազեցնել ֆոսֆոր ու կալիում պարունակող սննդամթերքի տեսակների գործածությունն ու նախապատվությունը տալ այս տարրերի ցածր պարունակությամբ մթերքին։

Ֆոսֆորի ու կալիումի քանակությունը ցածր է թարմ մրգերի ու բանջարեղենի, ինչպես նաև հացի, մակարոնեղենի, բրնձի ու եգիպտացորենի մեջ։ Ֆոսֆորի բարձր պարունակությամբ սննդամթերքի շարքին են դասվում միսը, թռչնամիսը, վարսակի փաթիլները, կաթնամթերքը, լոբին, պահածոները և գազավորված որոշ ըմպելիքները։